Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sementara Apolos wat di Korintus, Paulus sedang ngejelajahi pedalaman daerah udi raduni sampai di Efesus. Di disan ia betungga jama pira-pira jelma sai radu percaya jama Isa.

² Ia betanya jama tian, "Radu kedo Puari-puari nerima Ruh Allah waktu keti percaya jama Isa?" Tian ngejawab, "Makkung. Malah sekam mak pernah ngedengi bahwa wat Ruh Allah."

³ "Kik injuk reno, jama baptisan api keti dibaptis?" tanya Paulus. "Jama baptisan Yohanes," jawab tian.

⁴ Raduni Paulus cawa, "Yohanes ngebaptis jelma untuk nyatako bahwa jelma-jelma udi radu betubat jak dusa-dusa tian. Kidang sementara ano juga Yohanes ngeni pandai jama jelma-jelma Israel bahwa tian harus percaya jama Jelma sai haga ratong kak raduni jak ia, yakdo Isa."

⁵ Waktu tian ngedengi ano, tian dibaptis atas gelar Tuhan Isa.

⁶ Rik pada waktu Paulus ngepikko culukni di atas tian, Ruh Allah nguasai tian, raduni tian mulai cawa delom bahasa-bahasa sai aneh rik nyampaiko kabar jak Allah.

⁷ Jumlah tian sunyinni wat kira-kira rua belas jelma.

⁸ Selama telu bulan Paulus terus bani cawa jama ulun-ulun di lamban ibadah rik bedebat jama tian untuk ngeyakinko tian injuk repa Allah memerintah sebagai Raja.

⁹ Kidang pira-pira jak hantara ulun-ulun udi keras ulu rik mak haga percaya. Di hadapan seluruh jelma sai bekumpul di dudi tian ngereneh ajaran mengenai rencana Allah untuk nyelamatko manusia liwat Isa. Ulihni seno Paulus ninggalko tian, raduni mik jama jelma-jelma sai nutuk Isa mik ruang belajar Tiranus. Di dudi unggal rani ia betanya jawab jama jelma-jelma.

¹⁰ Ia ngelakuko hal seno terus-menerus rua tahun sakani sampai sunyinni jelma sai tinggal di provinsi Asia, baik jelma Yahudi maupun jelma bareh, sunyinni ngedengi cawa Tuhan.

¹¹ Allah ngelakuko keajaiban-keajaiban sai luar biasa liwat Paulus.

¹² Kik setangan atau kain pengikok tengah sai pernah dipakai Paulus diusung jama ulun-ulun meruyuh, ruyuhni tian lebon rik ruh sitan pun luah jak tian.

¹³ Wat pira-pira dukun Yahudi sai mik dipa-dipa, nguser ruh jahat jak ulun-ulun. Dukun-dukun udi nyuba-nyuba juga makai gelar Tuhan Isa untuk nguser ruh-ruh sitan udi. Tian cawa jama ruh-ruh sitan udi, "Atas gelar Isa sai dikabarko ulih Paulus udi, nyak nguser niku!"

¹⁴ Wat pitu sanak bakas jak sai imam kepala, gelarni Skewa, sai ngelakuko hal injuk reno.

¹⁵ Kidang ruh sitan udi cawa jama tian, "Nyak kenal Isa rik Paulus pun kukenal, kidang niku inji sapa?"

¹⁶ Raduni jelma sai kekurukan sitan udi lumpat rik nerkam ia ganas nihan sampai tian tegar jak lamban udi jama katan-katan rik riluk, mani kawaini tian dicabik jak badan tian.

¹⁷ Sunyinni jelma Yahudi rik jelma bangsa bareh sai tinggal di Efesus ngedengi tentang kejadian ano, raduni tian jadi rabai. Maka gelar Tuhan Isa makin dipuji-puji.

¹⁸ Lamon jelma sai radu jadi percaya jama Isa, ratong ngaku di hadapan umum perbuatan-perbuatan tian di waktu sai radu.

¹⁹ Rik tian sai biasa ngejalanko ilmu guna-guna, ngumpulko buku-buku tian rik nyuahko di hadapan ulun lamon. Rega buku-buku udi kik dijumlahko sunyinni wat kira-kira lima puluh ribu duit perak.

²⁰ Injuk renodo jama cara sai hibat ano cawa Tuhan makin tesebar rik makin kuat pengaruhni.

²¹ Radu jak kejadian-kejadian ano, Paulus memutusko untuk mik di Makedonia rik Akhaya raduni terus mik Yerusalem. "Radu mik disan, nyak harus mik di Roma juga," ani Paulus.

²² Maka ia ngutus rua jelma jak jelma-jelma sai ngebantuni, yakdo Timotius rik Erastus untuk mik di Makedonia, sementara ia tinggal pira-pira waktu sakani lagi di provinsi Asia.

²³ Kira-kira pada waktu senodo tejadi keributan sai balak di Efesus ulihni ajaran mengenai Isa.

²⁴ Mani di kota udi wat sai jelma tukang perak gelarni Demetrius, sai nyani lamban-lambanan diwa untuk Dewi Artemis. Usaha jelma udi ngeratongko penghasilan sai balak untuk tukang-tukangni.

²⁵ Ulihni seno ia ngumpulko tukang-tukangni jejama jama tukang-tukang nyani perak barehni, raduni cawa, "Puari-puari! Puari pandai bahwa ram mansa penghasilan jak guai inji.

²⁶ Tano Puari radu ngeliak rik ngedengi tenggalan api sai disani ulih si Paulus udi. Ia cawa bahwa diwa-diwa sai disani ulih manusia sama sekali lain hak diwa. Rik ia radu behasil nyani lamon jelma percaya jama ajaranni, lain angkah di dija di Efesus, kidang hamper di seunyinni daerah Asia muneh.

²⁷ Bahayani yakdo bahwa usaha ram inji haga mansa gelar burak. Rik lain angkah seno, melainko lamban Dewi Artemis pun haga dianggap remeh rik kebesaranni diilik-ilik; padahal ia dewi sai dipuja ulih seluruh jelma di Asia rik seluruh dunia!"

²⁸ Waktu ulun-ulun udi ngedengi ano hati tian jadi panas, raduni tian mekik-mekik, "Hurik Artemis, dewi ulun Efesus!"

²⁹ Maka kekacauan udi meluas sampai mik seluruh kota. Raduni gerombolan pengacau udi nangkok Gayus rik Aristarkhus, yakdo ulun-ulun Makedonia sai ngerik Paulus delom lapahni, raduni nyiret tian mik lapangan kota ano.

³⁰ Paulus haga kuruk nutuk tian, kidang jelma-jelma sai percaya jama Isa di disan ngelarang ia.

³¹ Pira-pira pejabat provinsi Asia ano pun, sai besahabat jama Paulus, ngayun ulun ngeni pandai jama Paulus in ia dang ngeliakko diri di lapangan ano.

³² Sementara ano jelma-jelma sai bekumpul di lapangan udi radu jadi kacau balau. Wat sai mekik injuk reji, wat sai mekik injuk reno, mani kelamonan jak tian mak pandai api sebab tian bekumpul di dudi.

³³ Sebagian jak ulun-ulun udi ngira Aleksander biang keladini, mani iado sai didurong mik hadap ulih jelma-jelma Yahudi. Maka Aleksander ngeni isyarat jama culukni untuk ngilu dikeni kesempatan ngebela diri di hadap jelma-jelma udi.

³⁴ Kidang reno tian ngeliak bahwa ia ulun Yahudi, maka tian mekik keras-keras sakani rua jam, "Hurik Artemis, dewi ulun Efesus!"

³⁵ Akherni pejabat kota behasil menenteramko ulun lamon udi. Ia cawa, "Warga Efesus! Unggal jelma pandai bahwa Efesusdo kota sai memelihara lamban Dewi Artemis rik batu suci sai gugor jak langit.

³⁶ Mak sai jelma pun dapok ngebantah hal seno. Ulihni seno tenangdo rik dang ngelakuko sai hal jama garap-gurup.

³⁷ Jelma-jelma inji, keti usung mik dija lain hak mani tian radu ngerampuk lamban diwa atau mani tian radu ngehina dewi ram.

³⁸ Kik Demetrius jama tukang-tukangni udi ngedok suatu pengaduan tehadap sai jelma, tagando tian ngusung perkarani udi mik pengadilan. Pengadilan tebukak untuk seno rik pejabat-pejabat pemerintah pun selalu wat.

³⁹ Kidang kik masih wat lagi sai hal sai bareh sai keti mirak, udi harus diselesaiko delom rapat umum sai sah.

⁴⁰ Mani api sai tejadi rani inji dapok ngebahayako ram. Ram dapok dituduh ngadako pemberuntakan, mani ram mak ngedok suatu alasan pun untuk ngebenorko keributan inji."

⁴¹ Radu jak ngucakko sunyinni seno, pejabat kota udi ngayun jelma lamon udi mulang.

Kisah Para Rasul

Video Kisah Para Rasul 19

Ikuti Kami:

KONTAK | PARTISIPASI | DONASI