Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Samantaro si Apolos barado di Korintus, nan si Paulus sadang payi manjalani kuruak-kuruak daerah tu, mako sampailah inyo di Efesus. Tibo disinan inyo basuwo jo babarapo urang nan lah picayo kapado Isa Almasih.

² Inyo batanyo kabake urang-urang tu, "Alah koh Sudaro-sudaro manarimo Roh Allah, kutiko angku-angku muloi ba iman kapado Isa Almasih?" Urang-urang tu bi manjawab, "Alun lai. Alun ado lai kami mandanga baraso ado Roh Allah."

³ "Jikok baitu, jo pamandian apokoh angku-angku dipamandikan?" tanyo si Paulus. "Jo pamandian Nabi Yahya," kecek urang-urang tu.

⁴ Mako bakatolah si Paulus, "Nabi Yahya mampamandikan urang, untuak manyatokan baraso urang-urang tu lah batobaik dari doso-dosonyo. Tapi dalam pado itu, Nabi Yahya ma agiah tawu pulo kabake urang-urang Israel, supayo inyo musti picayo pulo, kapado Baliau nan tibo kudian dari Nabi Yahya, iyolah Isa Almasih."

⁵ Sasudah urang-urang tu mandanga nan bakcando itu, mako bi dipamandikanlah inyo dalam namo Tuhan Isa Almasih.

⁶ Dikutiko si Paulus malatakkan tangannyo kabake urang-urang tu, mako Roh Allah manguwasoi urang-urang tu, mako muloilah urang-urang tu mangecek jo bahaso-bahaso nan ganjie, sarato manyampaikan barito dari Allah.

⁷ Kasadonyo urang-urang tu ado kiro-kiro duwo baleh urang banyaknyo.

⁸ Salamo tigo bulan, si Paulus tatap babicaro sacaro barani, kabake urang-urang di rumah ibadaik, sarato badebaik jo urang-urang tu untuak mayakinkannyo, tantang baa caronyo Allah mamarentah sabagai Rajo.

⁹ Tapi ado babarapo urang di antaro inyo tu kareh kapalo, inyo indak namuah picayo. Di adok-an kasadonyo urang nan bakumpua disinan, inyo mancacek pangajaran tantang rancana Allah, untuak manyalamaikkan manusia malalui Isa Almasih. Dek karano itu, mako bajalanlah si Paulus maninggakan urang-urang tu, inyo payi ka tampaik ruwang kuliah nan banamo Tiranus, jo pangikuik-pangikuik Isa Almasih bagai. Disinanlah inyo satiyok ari batanyo jawab jo urang-urang nan bi tibo ka tampaik tu.

¹⁰ Si Paulus mangarajokan nan bakcando itu taruih manaruih, salamo duwo tawun, sampai kasadonyo urang nan tingga di propinsi Asia tu, biya urang Yahudi maupun urang banso lain, kasadonyo lah mandanga firman Tuhan.

¹¹ Allah mampabuwek mukjizat-mukjizat nan luwa biaso malalui si Paulus.

¹² Jikok salabeta, atau kain ikek pinggang nan lah panah dipakai dek si Paulus, dirawokkan ka badan urang-urang nan sakik, mako cegaklah panyakik urang tu, sarato kaluwalah roh setan dari diri urang-urang tu.

¹³ Ado babarapo urang dukun urang Yahudi, nan payi kian kumari, untuak ma usie roh jahek supayo kaluwa dari diri urang. Dukun-dukun tu, mancubo-cubo pulo mamakai namo Tuhan Isa Almasih, untuak ma usie roh-roh setan tu. Inyo bi bakato kabake roh-roh setan tu, "Ateh namo Isa Almasih nan dibaritokan dek si Paulus tu, aden ma usie kalian!"

¹⁴ Ado tujuah urang anak laki-laki, dari surang imam kapalo nan banamo Skewa, nan mangarajokan pulo karajo nan bakcando itu.

¹⁵ Tapi, bakatolah roh setan tu kabake inyo, "Aden tawu siya Isa Almasih, aden tawu pulo siya si Paulus, tapi nan wa-ang ko siya?"

¹⁶ Mako malompeklah urang nan kamasuak-an setan tu, sambia manggarumehi anak-anak Skewa tu sajadi-jadinyo, mako tapaso lari batilanjanglah anak-anak Skewa dari rumah tu, dek karano pakaiannyo lah diruntuni, badannyo lah luko-luko.

¹⁷ Kasadonyo urang Yahudi, sarato jo urang banso lain nan tingga di Efesus, lah mandanga kajadian tu, mako inyo bi tabik takuik. Namo Tuhan Isa Almasih batambah disanjuang-sanjuang.

¹⁸ Sambuah urang nan lah ba iman kapado Isa Almasih, datang ka adok-an urang nan banyak, untuak ma akui sagalo karajonyo nan salah dimaso nan lapeh.

¹⁹ Urang-urang nan biasonyo mangarajokan alemu sihie, inyo kumpuakan kasadonyo buku-bukunyo, sudah tu inyo baka di adok-an urang nan banyak. Jikok di etong arago buku tu kasadonyo, ado kiro-kiro limo puluah ribu pitih perak.

²⁰ Bakcando itulah jo caro nan luwa biaso, firman Tuhan batambah tasebar, sarato batambah kuwaik pangaruahnyo.

²¹ Sasudah kajadian-kajadian tu, mako si Paulus ma ambiak kaputusan untuak payi ka Makedonia, sarato jo ka Akhaya, sudah tu taruih ka Yerusalem. "Sasudah ka sinan," kecek si Paulus, "ambo musti payi pulo ka Roma."

²² Mako inyo utuihlah duwo urang pambantunyo, iyolah si Timotius jo si Erastus untuak payi ka Makedonia, nan inyo sandiri, untuak babarapo wakatu lai tatap di propinsi Asia.

²³ Kiro-kiro dikutiko itulah, tajadi eboh gadang di Efesus, dek karano di pangajaran tantang Isa Almasih.

²⁴ Dek karano dikota tu, ado surang tukang perak nan banamo si Demetrius, nan mambuwek rumah-rumahan dewa untuak dewi Artemis. Usawo inyo tu mandatangkan pangasilan nan gadang untuak anak buwahnyo.

²⁵ Dek karano itu, mako inyo kumpuakanlah anak buwahnyo, sarato jo anak buwah tukang perak nan lain bagai, sudah tu inyo bakato, "Oih sudaro-sudaro! Kalian lah tawu, baraso kito mandapek pangasilan dari usawo kito ko.

²⁶ Nan kiniko kalian lah maliyek, sarato lah mandanga sandiri, apo nan dipabuwek dek si Paulus tu. Inyo mangatokan baraso dewa-dewa nan dibuwek dek manusia, itu indak dewa tu doh. Inyo lah barasil, lah sambuah urang nan picayo kabake pangajarannyo tu, indak di Efesus ko sajo doh, tapi lah ampia di kasadonyo daerah Asia bagai.

²⁷ Bahayonyo iyolah, nan usawo kito ko ka mandapek namo buruak. Indak hanyo itu, mungkin pulo rumah dewi Artemis pun ka di anggap remeh, kabasarannyo ka dikalanyahkan; padohal inyo adolah dewi nan dipuji dek kasadonyo urang di Asia, sarato dek urang di muko bumi ko!"

²⁸ Baru mandanga nan bakcando itu, mako tabik sugalah urang-urang tu, sudah tu inyo bi ma ariak-ariak, "Samangkin mulielah dewi Artemis, dewi urang Efesus!"

²⁹ Mako eboh gadang tu, lah marambak sampai kasadonyo daerah kota. Kudian garombolan tukang eboh tu, manangkok si Gayus jo si Aristarkhus, inyo tu adolah urang-urang Makedonia nan mangawani si Paulus dalam pajalanan, sudah tu inyo dibawok masuak ka gaduang kasenian kota tu.

³⁰ Si Paulus nak masuak pulo manuruikkan si Gayus jo si Aristarkhus, tapi urang-urang disinan nan ba iman kapado Isa Almasih managah si Paulus.

³¹ Babarapo urang bapangkaik nan di propinsi Asia tu, nan bakanti jo si Paulus, manyuruah urang untuak ma agiah tawu kabake si Paulus, supayo inyo jan mampanampakkan diri di gaduang kasenian tu.

³² Samantaro itu, urang-urang nan bakumpua di gaduang kasenian tu lah kalibuik. Ado nan ma ariakkan nan bakcando iko, ado pulo nan ma ariakkan nan lain, dek karano kabanyakkan dari inyo tu, indak tawu duduak parkaro, baa mangko inyo bi bakumpua disinan.

³³ Sabagian dari urang-urang tu manyangko, si Aleksanderlah induak balanyo, dek karano inyolah nan ditulakkan dek urang-urang Yahudi ka adok-an. Mako si Aleksander ma agiah kode jo tangannyo, mamintak supayo inyo dibuliahkan untuak mangecek di adok-an urang-urang tu.

³⁴ Tapi, baitu urang-urang tu tawu, baraso inyo adolah urang Yahudi, mako sarantaklah urang-urang tu ma ariakkan sakuwaik-kuwaiknyo, "Samangkin mulielah dewi Artemis, dewi urang Efesus!"

³⁵ Akienyo juru tulih kota, barasil mananangkan urang nan banyak tu. Inyo bakato, "Oih panduduak Efesus! Satiyok urang lah tawu, baraso kota Efesus ko lah nan mamaliaro rumah dewi Artemis, sarato nan mamaliaro batu suci nan jatuah dari langik.

³⁶ Indak surang juwo doh urang nan dapek mambantah parkaro tu. Dek karano itu, tananglah, janlah mampabuwek sasuatu jo caro nan indak bakatantuan.

³⁷ Urang-urang ko, angku-angku bawok kamari, indak dek karano inyo lah marampok rumah dewa doh, atau dek karano inyo lah mahino dewi kito.

³⁸ Jikok nan si Demetrius jo anak buwahnyo tu, inyo punyo suatu pangaduan taradok surang urang, biyalah inyo bawok parkaronyo tu ka pangadielan. Pangadielan tabukak untuak itu, panjabaik-panjabaik pamarentah pun tatap ado.

³⁹ Tapi, jikok ado juwo lai sasuatu nan lain, nan angku-angku inginkan, itu musti disalasaikan dalam rapek nan sah, di adok-an urang nan banyak.

⁴⁰ Dek karano apo nan tajadi kiniko, bisa mambahayokan kito. Kito bisa dituduah ma adokan pambarontakan, dek karano kito indak ado punyo alasan, untuak mampatagak-i urang-urang nan mambuwek eboh ko."

⁴¹ Sasudah mangatokan kasadonyo tu, mako juru tulih kota tu manyuruah urang nan banyak tu bi pulang.

Kisah Para Rasul

Video Kisah Para Rasul 19

Ikuti Kami:

KONTAK | PARTISIPASI | DONASI