Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ene piạ e i Apolos su Korintus, i Paulus kai kạl᷊uhune ul᷊ung banua e kụ nahumpạeng Efesus. Paị sene i sie nẹ̌sombangken pirang katau apang seng mạngimang su Mawu Yesus.
2 I sie nakiwal᷊o si sire, "I kamene nakatarimạ u Rohkẹ̌ u Ruata piạ i kamene němpangimang su Mawu Yesus?" I sire simimbang, "I kami e kal᷊ingung nakaringihẹ̌ u piạ Rohkẹ̌ u Ruata e, kai mang tala."
3 "Kamageng kerene, kai nisahaning sasahani sude tangu i kamene e?" angkuěng i Paulus. "Dingangu sasahaning Yohanes," angkuěngkeweng sire.
4 Mase i Paulus nẹ̌bera, "I Yohanes něnahani taumata e mědeạu pělahekang u i sire ene seng němpẹ̌tobatẹ̌ bọu kal᷊awọu rosan sire. Kai i Yohanes mal᷊aing kapělẹ̌habare su tau Israel u i sire hinong mangimang su taumata kụ sarung duměnta e samurin sie, kụ kai i Yesus."
5 Ene i sire nakaringihe ene, tangu i sire nisahanị e su arengu Mawu Yesus.
6 Kụ su tempong i Paulus naněllidu l᷊imane si sire, Rohkẹ̌ u Ruata e nẹ̌kawasa si sire, kụ bọu e i sire nanětạ e měmpěbẹ̌bera su ral᷊ungu haghing bawera makạdal᷊inaụ dingangu mạněpaseng habaru injilẹ̌.
7 Kakěpal᷊i sire e tangu mangawe mapul᷊o dua su kataune.
8 Gěnnangu těllu wul᷊ang karěngụe i Paulus měngkatewe měbẹ̌bisara ringangu tạ goẹ̌ e su taumata e su ral᷊ungu kanisa, měpẹ̌papangal᷊ạ dingang i sire baugu měngiaking i sire měnsang kereapa Mawu Ruata e mẹ̌parenta kere sěngkatau Ratu.
9 Kai pira-pirang katau e wọu i sire ene kai měmpẹ̌tẹ̌tungkětị u těmbọ i sire kụ tawe mapulu mangimang. Su těngon patikụ taumata mạtatampung sene i sire měngkate mělẹ̌hinakang těntiro mạanung Mawu Ruata waugu měngambang taumata e ual᷊ingu Yesus. Ual᷊ingu ene i Paulus naněntang i sire kụ natamai němpẹ̌paparingang dingangu manga murit'u Mawu Yesus simuẹ̌ sol᷊ong dal᷊ungu pẹ̌sasikol᷊aěng i Tiranus. Sene i sie apang kal᷊aěllo e měmpẹ̌kẹ̌kakiwal᷊o ringangkewen manga taumata e.
10 I sie měngkatewe tatapẹ̌ měkẹ̌koạ hal᷊ẹ̌ ene su ral᷊ungu sěntaung karěngụ e sarang kěbị taumata apang měmpẹ̌tẹ̌tanạ su propinsing Asia e, baẹ tau Yahudi arau kawanua lai wal᷊ine, kěbị-kěbị e rimaringihẹ̌ hengetangu Mawu e.
11 Duata e měkẹ̌koạ hal᷊ẹ̌ makạdal᷊inaụ tạ sihinge su ral᷊ung'i Paulus.
12 Kereu lenso arau papehẹ kụ seng bọu pẹ̌paketang i Paulus kụ bawaěnge sol᷊ong anun masasakị, tangu sakị i sire e mailang dingangu rohkẹ̌ u setang e mal᷊aing mahunsěbang bọu anun sire.
13 Piạko tau Yahudi pirang katau tahapěnokol᷊u setang lụl᷊uhu apang tampạ měngẹ̌nguserẹ̌ rohkẹ̌ dal᷊akisẹ̌ e wọu apan taumata. Piạko l᷊ai wahighan sire měpẹ̌pakẹ u arengu Mawu Yesus ipěnẹ̌nokol᷊ẹ̌ kal᷊awọu rohkẹ̌ u setang e. I sire němpẹ̌bera su manga rohkẹ̌ u setang ene, "Su arengu Mawu Yesus ilẹ̌habar'i Paulus ene, iạ měnokol᷊i kamene!"
14 Piạ manga rariọ esẹ pitung katau anạ u sěngkatau pangkate imang mawantugẹ̌ arenge i Skewa, měkẹ̌koạ hal᷊ẹ̌ kerene.
15 Arawe rohkẹ̌ u setange nẹ̌bera si sire, "Iạ masingkạ i Yesus dingangu iạ masingkạl᷊ain Paulusẹ̌ e, arawe i kamene ini e kai i sai?"
16 Mase tau kinasuěkangu setang e liminsọ e kụ měngkatewe timěmbo ringangu kawahanine, hakịu i sire nahuntal᷊ang bọu wal᷊e ene piạ lesẹ e ringangu těntol᷊e, batụu pakeang i sire e nipẹ̌gaghaghehẹ bọu wadang i sire e.
17 Kal᷊awọu tau Yahudi e ringangkewelaing kawanua wal᷊ine e mạtanạ su Efesus e nakaringihe apa nariadị e, tangu i sire něngkatakụ e. Kụ areng u Mawu Yesus mang sauneng dẹ̌daloěng.
18 Mal᷊awọ taumata e něngkakoạ taumata mạngimang su Mawu Yesus, dụděnta měmpạngakung pẹ̌sasal᷊an sire su těngon l᷊awọ, nạung su tempo nal᷊iu e.
19 Kụ i sire tiasa e nạung kawe mědẹ̌dal᷊ahopa e, němpěnampungu manga bukẹ̌ i sire kụ nasuen tutunge su těngon taumata l᷊awọ. Mangawe ipẹ̌tatamba kal᷊awọu arěgang bukẹ̌ i sire e mangawe limang pul᷊o su hiwune roitẹ̌ sal᷊aka.
20 Kerene sahen tatuwong hengetangu Mawu e nẹ̌timbangkewelain kawasane, kụ mangkeng kakạsawuhe ringangu mangkeng kakạtoghase wawodaị e.
21 Samuring karariadin tamai ene, i Paulus namutusẹ̌ u makoạ sol᷊ong Makedonia ringangu Akaya bọu ene matěpasu Yerusalem. "Kụ mạeng seng bọu pai ene," angkuěng i Paulus, "iạ mal᷊aing harusẹ̌ makaratingu Roma."
22 Tangu i sie něndolohu ruang katau wọu tumatimbange kụ kai nạung i Timotius dẹ̌duan Erastus mědeạu makoạ sol᷊ong Makedonia, těntal᷊angbe i sie mẹ̌tẹ̌tanạ sěngkatěmpo su propinsing Asia.
23 Luhudu su tempo ene kai piạ ganohạ masaria nariadi su Efesus, ual᷊ingu pěnaněntiro měbẹ̌běkeng kakakoạu Mawu Yesus.
24 Batụ u su soa ene kai piạ sěngkatau tukangu sal᷊aka arenge i Demetrius kụ měkẹ̌koạ tul᷊ada sal᷊aka rarodọ, tul᷊adang pangkunangu mahan duata wawine i Artemis. Hambaku tau ene kai makạonggọ u asěkine masaria su manga mělahal᷊ẹ̌ e.
25 Ual᷊ingu ene tangu i sie něnampungke manga mělahal᷊ẹ̌ e ringangkewelain manga mělahal᷊ẹ̌ u tukangu sal᷊aka wal᷊ine, kụ bọu ene nẹ̌bera, "Manga anạ u sěmbaụ! I kamene masingkạ u i kitẹ e kai makạhombang asěkine wọu munara ini e.
26 Kụ ini e i kamene seng nakasilọ e ringangu nakaringihẹ̌ hala apang kụ nikoạ i Paulusẹ̌ e. I sie nẹ̌bera u manga mahan duata kụ nạung seng nikoạ u taumata e mambeng bal᷊inewe ruata. Dingangu i sie seng nakakariadin taumata l᷊awọ e mạngimang u těntirone bal᷊inewe kětạeng sini su Efesus, kaiso kawe maraning mapěpidu kasěllahu wanuang Asia e lai.
27 Makạgěnggang ute kai madiringu munarang kitẹ ini e kawe makahombang areng mawuhụ. Dingangu wal᷊inewe kětạu ene, kaiso pangkunangu ruata wawine i Artemis mal᷊aing sarung koateng tạ mangal᷊ene, ringangu kawawantuge sarung ral᷊indaěng; sumbal᷊iau i sie kai ruata wawine kụ dẹ̌daloěng u patikụ taumata su Asia, ringangu su kasěllahu dunia!"
28 Kerene sarangke kal᷊awọu taumata e nakaringihẹ̌ ene naung i sire e něngkatětị, kụ bọu e i sire němpamansagẹ̌ u, "Biahẹ̌ i Artemis, ruatan tau Efesus!"
29 Tangu ghanohạ ene měngkatewe naměpidẹ̌ sěngkasoang. Bọu ene ghapaěngu mẹ̌gaghohaeng e měngkatewe němpanamẹ si Gayus dẹ̌duan Aristarkhus, tau Makedonia e dumararingang si Paulus su raral᷊engang e, bọu ene něhiud'i sire sol᷊ong stadiongu soa e.
30 I Paulus mapulu sumuẹ̌ mẹ̌těngkal᷊au dingang i sire, kaiso apang měmpạngimang su Mawu Yesus sene e němpẹ̌sěding i sie.
31 Pirang katau mapapangkatu propinsing Asia e apang měmpẹ̌dẹ̌dal᷊ahapị i Paulus, nangoro l᷊ai su taumata pělẹ̌habarẹ̌ si Paulus tadeạu i sie kumbahang lai mẹ̌těngkatodẹ u watangenge su stadion ene.
32 Ene apạeweng taumata měmpẹ̌kẹ̌komol᷊ẹ̌ su stadion ene kawe seng nạung němpẹ̌kal᷊imbuhung. Piạ e seng měmpěmẹ̌mansagẹ̌ kere ini, piạbe lain měmpẹ̌bẹ̌bansagẹ̌ kerene, u kal᷊awokang e wọu i sire e wěga wue měnsang kawe unụe i sire němpẹ̌tampung sene.
33 Sěnggạ bọu i sire ene měnẹ̌nikạ u kai i Aleksander nakoạ puěngu sitori, batụu kai i sie nisuhudu tau Yahudi sol᷊ong těngone. Tangu i Aleksander něnidạeng limane makịonggọ u l᷊oahe reng maul᷊ị u hinone su těngon taumata l᷊awọ e.
34 Kai kerene i sire nakasilọ e u i sie kai tau Yahudi, tangu sěngkahindọ e němpamansagẹ̌ maihạ-ihạ angkuěng: "Biahẹ̌ i Artemis, ruatan tau Efesus!"
35 Nadehọ katewe durutulisu soa e nakakal᷊ěda naungu taumata l᷊awọ e. I sie nẹ̌bera, "E i kamene tau Efesus! Patikụ taumata e masingkạ u kai soan Efesus nakoạ soa pẹ̌papadul᷊iangu pangkunang u ruata i Artemis dingangu watu susi kụ mạtěntung bọu l᷊angị e.
36 Tawẹu sarang sěngkatau makakarendehu hal᷊ẹ̌ ene. Ual᷊ingu ene tangu pakal᷊enehẹ̌ bue, ringangu kumbahang mẹ̌koạ apa kụ tawẹ sunạ e.
37 I sire ini e niwawang kamene sol᷊ong ini e wal᷊inewe ual᷊ingu i sire kai seng něhampasẹ̌ pangkunang u mahang duata arau kai ual᷊ingu i sire seng něhinakang duatang kitẹ.
38 Kereu i Demetrius dingangu manga mělahal᷊ẹ̌ e piạ pangaduhang e su pẹ̌sěngkatau e, ute walạ e kere i sire apẹ̌bawa perekarang sire su pẹ̌gaghaghutaěnge. Pẹ̌gaghaghutaěng e kạbawuka wue waugu ene ringangu manga mapapangkatu těmbonangu kawanua e sěntiniạ mang ene.
39 Kai kamageng u bědang l᷊ai piạ apa-apa wal᷊ine kụ ilẹ̌ěnning i kamene, ute ene e harusẹ̌ pakasuewe pahumbisarang kamene su pẹ̌dararudatong l᷊awọ e tuhụewe ral᷊enge.
40 Batụ u apang kụ nariadi su sahěllo ini e kiwuạ u kai makasilakạ si kitẹ. I kitẹ botonge itoke mẹ̌kẹ̌koạ pẹ̌gaghohaeng, ual᷊ingu i kitẹ e tawẹ apa sarang manga pungene kadidị-didị baugu mapakasěgadu hinong pẹ̌gaghaghohaeng ini e."
41 Bọuten namokạ u kěbị ene durutulisu soa e rimolohu taumata l᷊awọ e pinakapul᷊ẹ.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA