Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Tongonumai intau nongkon Yudea namangoi in Antiokhia bo notunduí kon intau mita inta mopirisaya ko'i Yesus. Mosia noguman kon aka mosia bo diaí sunaton naí inta pinarentah kon hukum i Musa, yo diaíbií mosaḷamat.
2 Daí totok binayowan i Paulus bo i Barnabas ing guman intau mita tatua. Pangabisannya sinantuídon simbaí ki Paulus bo ki Petrus takin tongonumai intau nongkon Antiokhia mayak in Yerusalem mopoyosingog in soaáḷ tatua takin rasul bo itoi mita kon tua.
3 Daí inatod in jama'at mita kon Antiokhia im mosia nodapot kon ḷuai ing kotaí, onda intua minayak nongin Penisia bo Samaria im mosia. Kon tua mosia nongonguman kon soaáḷ naíonda dapot intau mita inta de'eman Yahudi nobalií nopirisaya ko'i Allah. Habar tatua totok nokosanang kong gina in intau mita mopirisaya kon tua.
4 Naonda in no'iyaputmai kon Yerusalem, mosia sinomu in jama'at takin pia ing gina, daí rasul mita tatua bo intau mita inta sinonitoi monia kon jama'at tatua nongonguman kom bayongan rupa-rupa inta aindon pinomia i Allah inta pinongin i monia.
5 Ta'e tongonumai intau im Parisi inta ain nopirisaya ko'i Yesus namangoi bo noguman, "Intau mita inta de'eman Yahudi mustibií sunaton bo pokiaíidan onu inta pinarentah i Musa."
6 Daí soaáḷ tatua iyosingogdon noyotakin in rasul bo itoi mita inta noyosipun kon tua.
7 Totok no'onggot im pinoyosingogan monia kon soaáḷ tatua. Daí sinimindogdon ing ki Petrus bo nosingog, "Utatku mita! Kinota'auan bidon monimu kon aku'oi na'a im piniliíbií i Allah kon sigad monimu sim mopoyaput in Habar Mopia kom bayongan intau inta de'eman Yahudi, simbaí mosia mokidongog bo mopirisaya ko'i Yesus.
8 Bo ki Allah inta nonota'au kong gina im bayongan intau noponyatadon kon sinarima-Nya bidon im mosia; soaáḷ tatua pinonyata-Nya takin nobogoi in Roho-Nya ko'i monia naí inta ain inogoi-Nya ko'i naton.
9 Ki Allah tua in diaíbií mopoyo-poyoposi kon intau. Dinaritan-Nya ing gina monia sim mopirisaya im mosia.
10 Yo nongonu sin tana'a makow mo'ikow im mo'ibogbií moḷawang ko'i Allah bo mobogoi in atorang inta totok mororiga aidan in intau mita inta mopirisaya tanion, padahaḷ mogoguyangpa naton diaíbií doman mokoaíid kon tua komintan!
11 Kita komintan in nonota'au bo nopirisaya bidon kong kita im posaḷamaton lantaranbií tabi i Tuhan Yesus; naí doman tua im mosia."
12 Daí bayongan intau inta noyosipun kon tua komintan nongobioí. Bo inindongogandon monia turus onu inta ino'uman i Petrus bo i Barnabas tua. Mosia nongonguman kom bayongan tanda inta totok im mokoherang kon intau, inta ain inaidan i Allah ko'i monia kon yuaí-yuaík in intau inta de'eman Yahudi.
13 Naonda im mosia nopaḷut nosingog, ki Yakobus noguman, "Utat mita! Indongogaipa in singogku na'a.
14 Bagu dongka ininsilangan i Simon kon nongkon pinomangkoianpabiímai ki Allah nopo'ontongdon in tabi-Nya kon intau mita inta de'eman Yahudi, bo nomilií kon umat kon sigad in intau mita inta diaí mopirisaya. Tongaí kino'onggotannea umat inta pinilií-Nya tatua nobalií umat inta motoindudui ko'i-Nia.
15 Tua komintan nobalií naí inta aim pinoguman muna in nabi mita, inta pinais nana'a,
16 'Mopaḷut makow kon tua Aku'oi mamangoi bui,' natua ing kai Tuhan, 'Bui-Ku posindongon im baḷoi i Daud inta aindon no'umpag, bo tompia'an in rumbunnea, bodongka posindogon bui;
17 simbaí onda intau in Yahudi inta diaípa nopirisaya ko'i Allah komintan motayak ko'i Tuhan, takin bayongan intau inta de'eman intau in Yahudi inta aindon muna inoinií-Ku mobalií umat-Ku.' Natua ing kai Tuhan,
18 inta ain nopota'au intua komintan nongkon dungkuḷpamai."
19 "Tuamai aka naí kon raianku, sabanarnya kita in diaíbií mota'au mogaid kon atorang inta mokororiga kom bayongan intau inta mopirisaya ko'i Allah.
20 Ta' e kita im momaisdon kon surat bo mononggina ko'i monia, simbaí dona'ai moka'an kong ka'anon inta aim pinosumbah kon dewa, andeka moka'an kon tapuí im mahaḷuk inta sinagangan, andeka moka'an kon duguínya. Bo baí umuran mokopoyayuk im mosia kon oaíid mita inta mokotor.
21 Sin hukum i Musa nongkon dungkuḷmaipabií umuran bidon binaca pomuḷoi singgai in Sabat kom baḷoi mita pososambayangan, bo nodait pinoyaput kom bayongan kotaí kon tua."
22 Rasul bo itoi mita in jama'at takin bayongan jama'at kon tua noyopakatdon kom momiliídon kon tongonumai in intau kon sigad monia inta potabaí mayak in Antiokhia moyotakin i Paulus bo i Barnabas. Daí pinilií monia ing ki Yudas inta dinonoi ki Barsabas bo ki Silas. Taya dua na'a intau inta totok ing ko'insim im bayongan intau inta mopirisaya kon Yerusalem.
23 Takin totabaí mita monia tua mosia nokidia in surat inta nana'a im bonunya, "Hormat kom bayongan utat inta nongkon lipuí mita inta de'eman Yahudi inta nogutun kon Antiokhia, Siria bo Kilikia. Bo hormat doman nami, rasul mita bo itoi in jama'at takin bayongan jama'at kon Yerusalem.
24 Aindon dinongog nami kon oyuíondon intau nongkon sigad nami in namangoi ko'i monimu bo mongacau poḷat mopoyaying im pirisaya monimu. Padahaḷ mosia tua diaíbií pinotabaí nami.
25 Tuamai kami notobatuídon kong gina bo nomilií poḷat nopotabaí in tongonumai intau mamangoi ko'i monimu moyotakin i Barnabas bo i Paulus inta kino tabi nami.
26 Taya dua na'a in aim bidon nopotaru in nyawa monia sin lantaran pirisaya monia ko'i Tuhan naton inta ki Yesus Kristus.
27 Daí manangka intua pinopoaíngoidon nami ing ki Yudas bo ko'i Silas ko'i monimu mopoyaput in onu inta pinais kom bonu in surat tana'a.
28 Sin na'abií inta kino'ibog in Roho i Allah -- bo mopia doman gina nami -- simbaí mo'ikow diaí poki-aidan in oaíidan inta lebe mobogat nongkon oaíidan mita tana'a;
29 dika moka'an kong ka'anon inta aindon pinosumbah kon dewa; dika moka'an kon duguí, dika moka'an kon tapuí im mahaḷuk inta minatoi sinagangan, bo poyayuídon in oaíid inta mokotor. Aka aidandon monimu intua komintan, yo mangalenya mo'ikow aindon nogaid kon inta mopia. Natuapa, saḷamat!"
30 Naonda in nogumandon kom mobui, mosia inta pinotabaí tatua nopobayakdon in Antiokhia. Kon tua mosia nogoinií doman kom bayongan jama'at noyosipun sim pinopoyaputan ing koyow mita tatua.
31 Naonda im binaca im bayongan jama'at in surat tatua, totok nosanang ing gina monia sin noko'ulií kon hiburan.
32 Ki Yudas bo ki Silas inta tumpaḷa nabi tua, no'onggot nongongumanmai takin utat mita inta mopirisaya kon Antiokhia tatua sim nononggina baí diaí moíondok im mosia.
33 Naonda in nolin onggotdon nogutun kon tua in taya dua, mosia inatodon bui in intau mita inta mopirisaya kon Antiokhia poḷat nokidia in salam kon intau mita inta nopotabaí ko'i monia mangoi.
34 [Ta'e ki Silas noguman kom mogutunpa in sia kon Antiokhia.]
35 Daí ki Paulus bo ki Barnabas nogutunpa doman kon tua tongonumai degaí nosinggai. Kon tua mosia umuran mopoyaput in Habar Mopia inta nongkon i Tuhan noyotakin intau mobarong ibanea.
36 Diaí no'onggot bo noguman ing ki Paulus ko'i Barnabas, "Igai baí mayak ing kitada mokipodungkuḷ kom bayongan utat mita inta mopirisaya ko'i Yesus Kristus kong kota-kotaíannya. Kong kotaí mita inta aindon pernah binaya'an naton; simbaí kota'auan naton in ka'ada'an monia."
37 Ki Barnabas mo'ibog doman modia ko'i Yohanes inta donoionmai ki Markus,
38 ta'e irasa i Paulus kon diaí mopia modia ko'i Markus inta doií mogaid moyotakin bo nonaḷaímai ko'i monia kom Pampilia.
39 Daí taya dua noginggabatanmai in singog, sahingga noyotangadon taya dua tua: Ki Yohanes inta dinonoi ki Markus tantuíbií dinia i Barnabas sinumakoi kon uangga bo minayak in Siprus.
40 Yo ki Paulus in nodia ko'i Silas takinnya. Bo nobuatdon doman mosia naonda in sinambayangan makow im bayongan jama'at kon Antiokhia tua.
41 Mosia minayak nolibu kon Siria bo Kilikia; kon tua mosia umuran moginropotmai kong gina im bayongan intau inta mopirisaya ko'i Tuhan Yesus.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA