Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ba'tu pira-pira tau ratu jio mai tana Yudea male lako kota Antiokhia nnajahhi tomatappa' nakua, "Te'da mikullei dipasalama', ke te'dai midisunna' situru' to ada' nabenki' Nabi Musa."

² Apa cia' lalo Paulus sola Barnabas ntarimai joo pangngajahna. Katampakanna disuai sola dua na ba'tu pira-pira tomatappa' laen jio mai jamaa male de' kota Yerusalem la sipangkadaii joo sola rasulu' na pekaamberan laen jio.

³ Nasolanni jamaa ratu lako salean kota, namane' tarruh nnola tana Fenisia sola tana Samaria to nanii ncuritai kumua denmo to bangsa tangngia to-Yahudi mengkatoba' na matappa'. Gaja napumarioi to tomatappa' jio ntuu joo.

⁴ Ia tonna ratumo de' kota Yerusalem, natarima melo jamaa sola rasulu' na pekaamberan laen. Nacuritan ngasanni matumbai Puang Allataala ntulungngi nawa'ding njama jamanna.

⁵ Apa den to-Farisi to memmatappa'mo mengke'deh nakua, "Ia to tau jio mai bangsa laen to matappa'mo parallu disunna', nadisua nturu' atoranna Nabi Musa."

⁶ Sirempunmi to rasulu' sola to pekaamberan mbicarai to ianna joo.

⁷ Gaja sainni ssite'gehhi bangngi joo passalan, namane' ke'deh Petrus nakua, "Ee todipusile'to! Na miissen kumua Puang Allataala mpileina' tonna tee lan mai tangnga-tangngami la mpangpeissenan Kareba Kasalamatan lako bangsa tangngia to-Yahudi, dikua anna sa'dingngi nakatappa'i.

⁸ Natarruh Puang Allataala to penawanna tau. Namangkamo napamanassa kumua natarimamo to bangsa tangngia to-Yahudi. Iamo napamanassa tonna benni Roh Allataala susi to mangka nabenki'.

⁹ Te'da napasilaenanki' Puang Allataala na bangsa laen, nadampangan too ke matappa'i.

¹⁰ Ianna susi joo, matumbai milambali-bali Puang Allataala male mpapassanni atoran na pemali mabanda' tee tomatappa', na kita' una sola tojolota' tangdikulle mpugaukki?

¹¹ Sibalikanna takatappa'i kumua iara tadipasalama' nasaba' pangkamasean-Na Puang Isa, susi toomi to ia."

¹² Sikammatan ngasan to tau sirempun jio, namane' mpesa'dingngii to Barnabas sola Paulus ncurita pole'i matumbai Puang Allataala ntulungngi nawa'ding mpugauk mangrupa-rupa tanda mejangngaran lan tangnga-tangngana bangsa tangngia to-Yahudi.

¹³ Ia tonna mangkamo sola dua mangkada, nakuamo Yakub, "Ee todipusile'to, mipesa'dingngipi la mangkadana'!

¹⁴ Mane' mangkanna nacurita Simon Petrus kumua napangpekitanmo Puang Allataala to kameloan penawan-Na lako bangsa tangngia to-Yahudi, tonna mpilei umma'-Na lan mai tangnga-tangngana tonna tee.

¹⁵ Susi joo to mangka napau nabi. Sanga den diuki' lan Sura' Allataala susi tee:

¹⁶ Nakua Puang Allataala, 'La ratu pole'na', angkupake'deh pole'i to bolana Raja Daud mangka ro'pok. La kupake'deh pole'i, ke mangkai kusullei to maraponamo,

¹⁷ dikua naangahna' sininna bangsa tangngia to-Yahudi to mangkamo kupilei menjaji taung-Ku'.' Susi joo kadan-Na Puang, to la mpugauk ngasanni,

¹⁸ to mangka napangpeissenan tonna anu'."

¹⁹ Nakuapa Yakub, "Jaji, ia ke aku', danggi'mo tasussaii to bangsa tangngia to-Yahudi, to mpangbenmo kalena lako Puang Allataala.

²⁰ Apa paralluki' ngkiringanni sura' mpakainga'i, dikua danggi' nakande kande diharangan, susinna moda', rara na kande mangka dipassompan lako dewata, iarika danggi' namanggauk sala.

²¹ Susimi tee, nasaba' mellao jionapa mai nadipangpeissenanmo to atoranna Nabi Musa lan simesa'-mesa' kota ratu lako too allo, ianna Allo Katorroan dibaca omi lan bola passambajangan."

²² Mangkai joo too, mesa' kadami to rasulu' sola pekaamberan laen na jamaa jio kota Yerusalem, na mpilei dua tau todikasiri' lan tangnga-tangngana nadisua male lako kota Antiokhia sola Paulus na Barnabas. Ia joo tau disanga Silas na Yudas to disanga too Barsabas.

²³ Den too sura' dibenni, to nakua kumua: "Kamu' sola ngasan to jio mai bangsa laen to kipusile'tomo, to torro jio kota Antiokhia, tana Siria na Kilikia. Sallangki' sola ngasan kami' rasulu' sola pekaamberan to mipusile'to.

²⁴ Den kisa'ding kumua den ba'tu pira-pira to kisolan inde' male mati' nnajahhi sala kamu', mpapussak penawammi ammibata apa te'dara nakami' ssuai mpugaukki susi joo.

²⁵ Iamo joo angkimesa' kada mpilei Yudas sola Silas, kisuai male mati' sola Barnabas na Paulus to kipakamoja',

²⁶ na ntangga' toomo sunga'na sola dua, nasaba' Puangta' Puang Isa Almaseh.

²⁷ Ia to Yudas sola Silas iamo la mpauan kamu' issinna tee sura'.

²⁸ Nakabudai Roh Allataala na moi kami' to kumua danggi' midipapassanni atoran sola pemali to la'bi mabanda'na na ia to parallunna.

²⁹ Iamo joo danggi' mikandei to kande diharangan, moda', rara na kande mangka dipassompan lako dewata, iarika danggi' mimanggauk sala. Ianna te'damo mimanggauk susi joo, battuananna manggauk melomo kamu'. Anggemi ntee, pada salama'ki'!"

³⁰ Ia tonna pada mangkamo sisalama', malemi Yudas sola Silas lako kota Antiokhia. Nasua ngasanni to tomatappa' sirempun, nabenni joo sura'.

³¹ Gaja sannangngi sola ngasan tonna mangka mbacai, nasaba' mangpakatanai.

³² Ia joo Yudas sola Silas nabi todai, masainni sipangkada-kada sola tomatappa' jio kota Antiokhia mpaendek sumanga'na anna tatta' matappa'.

³³ Ia tonna ba'tu pira-piramo masainna sola dua torro jio, naeloranmi tomatappa' pole lako to tossuai. Nakuan tooi naparatuanni sallangna lako.

³⁴ [Apa torro bangngi ia Silas jio kota Antiokhia.]

³⁵ Ba'tu pira-pira todai masainna Paulus sola Barnabas torro jio kota Antiokhia. Buda tau laen nasolan mangngajahhi sola mpangpeissenan too Kareba Kasalamatan.

³⁶ Te'da namasai joo too nakuanni Paulus to Barnabas, "Melo ke male pole'ki' ngkitai to tomatappa'mo lako Puang Isa lan sininna kota to mangka tanii mpangpeissenan kadan-Na, antaissenni ba'tu la matumba-tumba unai."

³⁷ Madoangngi Barnabas la ssolanni to Yahya to disanga too Markus,

³⁸ apa te'da namadoang Paulus ke disolanni, sanga pole boko'i tonna jio tana Pamfilia, te'da napatarruh jamanna.

³⁹ Sipekkami Paulus na Barnabas, anna te'damo namale sola. Ia to Barnabas nakuanni to Markus, "Tamale sola mangkappala' lako pulau Siprus."

⁴⁰ Apa ia to Paulus, Silas to napilei nasolan male, tonna mangka to jamaa mpassambajanganni, dikua naampaii Puang Allataala.

⁴¹ Malei llilingngi tana Siria na Kilikia mpamawatang jamaa.

Kisah Para Rasul

Video Kisah Para Rasul 15

Ikuti Kami:

KONTAK | PARTISIPASI | DONASI