Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Tuda'-tuda' burur lemulun nacing rat Yudia idi nemada' kinanak-kinanak ineh, keburi'deh, "Kudeng na muyuh uen nunat maya' Ukum Musa, na muyuh miak ngalap ulun."
2 Idi ideh nepesaad ni Paulus idi Barnabas ratnan ineh. Kekipedneh ideh nemili' Paulus idi Barnabas dengan tuda'-tuda' lun baken rat Antiokia pad ideh amé' déi' Yerusalim ngitun rasul-rasul idi lun rayeh-rayeh ratnan ineh.
3 Lun sidang ineh nenated nedidueh, idi kareb didueh nelemaba Punikia idi Samaria, idi didueh nemada' ratnan lun pupu baken pangeh nengalap Yésus. Bala ineh nengacing awang niat luk rayeh kuan amung-amung kinanak ineh.
4 Kareb didueh nacing déi' Yerusalim, idi lun sidang idi rasul-rasul idi lun rayeh-rayeh nenguit nedidueh dengan mawang niat, idi didueh nemada' ratnan amung-amung luk inau' Allah kuan didueh.
5 Iamo' tuda'-tuda' lun manu ratnan babpat lun Parisi, netuped idi nepebala, "Meluun do' nunat amung lemulun ineh, idi ngecuk nedeh maya' Ukum Musa."
6 Rasul-rasul idi lun rayeh-rayeh ineh nepamung sikal ngerawé ratnan ecuk ineh.
7 Kareb ideh mio pegayam, idi Pétrus nudur idi nepebala, "O kinanak-kinanakku, muyuh kali' mon Allah nemili' negku rat arang muyuh pad ui mada' nelun pupu baken, pad ideh pana' ninger idi manu teh.
8 Idi Allah luk kali' niat lemulun nengegala' ratnan Ieh mawang niat nelun ineh, ngaceku Ieh nemaré kuandeh Roh Meligan mepad kudeng Ieh nemaré kuan tau.
9 Idi Allah na mili' arang tau dengan lemulun ineh, idi Ieh nemaru' niatdeh ngaceku ideh manu.
10 Ngaceku ineh ngudehké muyuh nutun Allah idi sikal nganau' babeh ineh luun tudung lun manu ineh luk nateh binabeh tepun tau idi tau ini pana'?
11 Na! Tau manu idi uen ngulun ngaceku katu Tuhan Yésus, mepad kudeng ideh teh."
12 Idi amung-amungdeh pirud, idi neninger bala Barnabas idi Paulus luk nemada' ratnan amung tanu' idi kekamen luk nan mawa luk inau' Allah arang lun pupu baken dengan burur didueh.
13 Kareb didueh pangeh nepebala idi Yakub nengor bala didueh, kebalaneh, "O Kinanak-kinanakku, ninger muyuh balaku!
14 Simun pangeh nemada' ratnan kudeng apeh Allah pun-pun nengikak nelun pupu baken, idi nemili' rat nedeh aceh pupu kuanNeh.
15 Idi bala ineh petulu dengan amung-amung bala nabi-nabi, mepad kudeng luk inayud ini.
16 'Kebala Tuhan, Muci Ui sikal lemubed, idi mudut baruh imet Daud luk inusag ineh. Ui mudut baruh teh luk inusag ineh, pad ieh meraben,
17 pad lun baken miak nakap Tuhan, ieh ineh lun pupu baken luk tinawar mangun ku pupuKu.
18 Kudeng ineh bala Tuhan, luk pangeh nengelio ineh rat pun-pun.'"
19 Idi teh kebala Yakub, Bang terawéku, na petulu ngesabeng nelun pupu baken ineh luk pangeh lumi inan Allah.
20 Iamo' do' tau nguyud surat kuan lemulun ineh, pad ideh na kuman anun-anun luk melutak ngaceku biré kuan akang, idi pad ideh na pasét, idi na kuman pung luk naté nekaling, idi dara' pana'.
21 Ngaceku rat mon Ukum Musa pangeh bica' bang amung-amung ruma' sembayang kareb anid-anid Aco luk inan Mudeng. Idi bala Musa ineh badén bang anid bawang."
22 Rasul-rasul idi lun rayeh-rayeh dengan amung lun sidang ineh nemutut pad mili' lemulun rat arangdeh, luk dukendeh amé' déi' Antiokia dengan Paulus idi Barnabas. Idi ideh nemili' Yudas luk titen Barnabas, idi Silas, ieh ineh dueh burur luk buren lun sidang.
23 Idi ideh nemaré sebuleng surat ini itendeh: "Tabi' ratnan rasul-rasul, lun rayeh-rayeh idi kinanak-kinanak muyuh kuan kinanak-kinanak rat nelun pupu baken déi' Antiokia, Siria, idi Kilikia.
24 Kai neninger inan tuda'-tuda' lemulun luk neremuat rat arang kai luk nengagau nemuyuh dengan bala luk ngagap niat muyuh, sagan pana' kai na nengecuk lemulun ineh.
25 Ngaceku ineh kai pangeh neperurum ngamo mili' tuda'-tuda' lemulun luk miak amé nemuyuh maya' ni Barnabas idi Paulus luk inan kai mawa ineh,
26 idi luk pangeh nemaré ulun didueh ngaceku ngadan Tuhan tau Yésus Keristus.
27 Kai pangeh nenecuk Yudas idi Silas amé' nemuyuh, idi didueh miak mada' bala surat ini kuan muyuh.
28 Ngaceku petulu dengan pian Roh Meligan idi pian kai teh, na kai ngerareng luun tudung muyuh babeh luk meluun berat ratnan luk petap ini,
29 ieh ineh aleg kuman akan luk biré kuan akang, idi aleg kuman dara' idi pung luk naté nekaling, idi teh aleg muyuh pasét. Kudeng muyuh matar burur muyuh sebuleng ratnan amung ini, samal kuan muyuh. Tabi' kuan muyuh."
30 Lun luk pinili' nated bala ineh icuk nalan, idi ideh iné' Antiokia. Idi ideh nengamung amung lun manu idi nemaré surat ineh nedeh.
31 Kareb ideh nemaca' surat ineh, idi ideh mawang niat ngaceku bala luk ngubuk ineh.
32 Idi Yudas idi Silas ineh nabi teh. Idi didueh nengubuk nelun manu ineh, pad ideh mekuu' idi metueh.
33 Kareb didueh pangeh netudo mio sesuut, idi kinanak-kinanak ineh nengecuk nedidueh muli' dengan awang amé' inan lun luk nengecuk nedidueh atun.
34 [Iamo' Silas pian tudo déi'.]
35 Paulus idi Barnabas tudo tuda'-tuda' io déi' Antiokia, idi nemada' idi nengelio bala Tuhan dengan tuda'-tuda' lun baken teh.
36 Na mio ratnan ineh idi kebala Paulus ni Barnabas, "Amé' kiteh ngikak kinanak-kinanak bang anid-anid bawang su luk inan kiteh nemada' bala Tuhan atun, idi nier kudeng apeh ulundeh."
37 Idi Barnabas sikal nguit Yahya Markus amé' maya' nedidueh.
38 Iamo' Paulus nengerawé na do' nguit neneh, ngaceku ieh na nemaya' nedidueh ruked lawé didueh. Iamo' ieh nenecan nedidueh déi' Pampilia.
39 Idi didueh nepesaad pad didueh nepatad. Idi Barnabas nenguit ni Markus maya' neneh, idi nemaya' kapal iné' Siprus.
40 Paulus nemili' Silas, idi kareb kinanak-kinanak pangeh nemaré neneh bang palad Tuhan idi ieh nenalan peh.
41 Ieh nenalan nelemaba bawang Siria idi Kilikia, idi nengeraben amung-amung sidang ineh.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA