Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Naria bara sako-ndua *toYahudi nakava ri Antiokhia lako ri bagia Yudea anu nomparasaya i Yesus. Ira nompatuduki topangoseaka i Yesus ri sia ivei: "Ane komiu ledo *rasuna nantuntuni Atura-atura nipapola Nabi Musa, komiu ledo mamala rapakasalama."

² Tapi i Paulus bo i Barnabas mpuu-mpuu nosinjanai nte ira bo nangeva pepatudukira. Jadi kaupuna, todea topomparasaya nompakatantu i Paulus bo i Barnabas ante bara sako-ndua topomparasaya ntanina lako ri sia, kana hau ri ngata Yerusalem ala molibu ante suro-suro bo pakeni ntopomparasaya ntanina hamai bo mombatesaki pepatuduki haitu.

³ Todea topomparasaya ri ngata Antiokhia nanggeni gi Paulus sampe nakava ri savaliku ngata. Lako ri ngata haitu ira noliu ri propinsi Fenisia bo bagia Samaria. Bo nitesara munimo ka topomparasaya ri sia nadea tona ledo toYahudi nombakabasaka pomparasayara nggaulu ala mangoseaka Alatala. Kareba haitu mpuu-mpuu nompakadamba rara ntopomparasaya ri sia.

⁴ Nakavapa ri ngata Yerusalem, i Paulus ante roana nikadambanaka nu suro-suro, pakeni-pakeni, bo todea topomparasaya ntanina. I Paulus nombatesa ka ira pura-pura anu nipovia nu Alatala ri polipara bara ipia nanggeni Kareba Belo ka tona ledo toYahudi.

⁵ Tapi bara sako-ndua *toFarisi anu nomparasaya i Yesus neangga bo nanguli, "Ane tona ledo toYahudi nomparasaya i Yesus, ira kana rasuna bo rapatuduki mangoseaka Atura-atura nidekei Nabi Musa ka kita."

⁶ Jadi suro-suro bo pakeni-pakeni ntanina nolibu motesaki panggava ntoFarisi pangane.

⁷ Nasae mpuu ira nosinjula pekiri. Kaupuna neanggamo i Petrus bo nanguli, "Sampesuvu-sampesuvu! Nisanimiu mboto bara sakuya kasaena naliu, Alatala nompelisi yaku lako nte komiu mompatolele Kareba Belo ka tona ledo toYahudi ala ira muni mangepe bo momparasaya.

⁸ Bo Alatala anu nangisani isi rara ntai manusia, nantarima tona ledo toYahudi. Nisanita, sabana nidekeiNa Nosa GasaNa ka ira, nasimbayu mpo nidekeiNa ka kita muni.

⁹ Alatala ledo nompoposisala kita toYahudi ante ira ledo toYahudi. Ia nompakagasa rarara, sabana ira nomparasaya.

¹⁰ Jadi nakuya komiu ledo nadota nantarima anu nipovia nu Alatala sii-sii? Nakuya komiu aga madota mompasuu ira mantuntuni atura-atura anu nakaja mpuu raoseaka? Totuata nggaulu bo kita mboto ledo nompakule nangoseaka atura-atura haitu.

¹¹ Tapi kita nomparasaya bo kita nipakasalama sabana kabelo rara i Pue Yesus. Bo ivesia muni ira!"

¹² Naupu i Petrus notesa ivesia, pura-pura tona nasiromu ri sia nalinomo bo nompetalingai i Barnabas bo i Paulus notesa mpanjili kabaraka-kabaraka bo tanda-tanda anu nipokumaaka nipoviara nte kuasa nu Alatala tempo ira naria ri ngata ntona ledo toYahudi.

¹³ Naupu ira notesa, nangulimo i Yakobus, "Sampesuvu-sampesuvu. Epemo tesaku!

¹⁴ I Simon Petrus dako notentei ka kita tove nu Alatala ka tona ledo toYahudi. Lako ri pamulana, Alatala nompekirika ira. PatujuNa, rapelisiNa lako nte ira tona majadi todeaNa.

¹⁵ Haitu nasimbayu mpo anu niuli nu nabi-nabi nggaulu, apa naria nitulisi ivei:

¹⁶ Alatala nanguli: 'Maupu haitu, Yaku makava mpanjili ka muli *ntoIsrael anu niparenta i Daud bara ipia. niparenta i Daud bara ipia. Basa Yunani: "Yaku mombabangu mpanjili banua i Daud." anu nagero. Kupovia haitu ala pura-pura manusia ntanina mangelo Yaku, bo pura-pura tona ledo toYahudi anu nipelisiKu majadi todeaKu.' Ivesiamo tesa nu Alatala

¹⁷ (15:16)

¹⁸ anu nompopaisani patujuNa lako nggauluname."

¹⁹ I Yakobus nompapola tesana, "Jadi sampesuvu-sampesuvu, ivei panggavaku: nee rapakasusata katuvu ntona ledo toYahudi anu natundu nte Alatala.

²⁰ Tapi kita kana motulisi sura manguli ka ira nee mangande kandea anu naruto sabana nipesomba ka tupu-tupu ntanina, bo nee mangande bau nu binata nikoje, anu ledo nisuvuraka raana, bo nee mangande raana. Bo muni ala ira nee mosampaturu ante tona ledo bereira mboto.

²¹ Aga atura-atura haitu raperapita raoseakara ala mombajagai kasintuvura nte toYahudi, sabana nompamula lako ri nggauluname, Atura-atura i Musa haitu nipatolelemo ri pura-pura ngata, bo nibaca ri *eo-eo penonto ri banua-banua petupu ntoYahudi." anu pata-ngaya haitu.

²² Nangepe tesa i Yakobus, nasitujumo suro-suro bo pakeni ntanina bo pura-pura topomparasaya mompelisi bara sako-ndua tona lako nte ira mboto ratudu hau ri ngata Antiokhia nosanggani-nggani nte i Paulus bo i Barnabas mompasimbayu asele nu polibu ka topomparasaya hamai. Nipelisiramo i Silas bo i Yudas anu nidae muni i Barsabas. Tona randua haitu nibila ntodea topangoseaka i Yesus ri Yerusalem.

²³ Jadi nitulisira santau sura rakeni ntona randua pangane. Sura haitu nanguli ivei: i "Sampesuvu-sampesuvu sampomparasaya anu ledo toYahudi, anu nonturo ri ngata Antiokhia bo ri propinsi Siria bo Kilikia: i Nadea tabe lako nte kami, suro-suro bo pakeni-pakeni ntodea topomparasaya. i

²⁴ Niepe kami naria bara sako-ndua tona lako nte kami tou nte komiu nompakasusa bo nompakaingu komiu ante pepatudukira. Tapi kakanana ledo nitudu kami ira movia ivesia.

²⁵ Haitumo sabana, kami nolibu ri sii bo kami pura-pura nasintuvu nompelisi bara sako-ndua tona, bo nombatudu ira tou nte komiu mompasimbayu asele polibu kami. Ira tou singgani-nggani ante sampesuvuta i Barnabas bo i Paulus anu nipotove kami.

²⁶ I Paulus bo i Barnabas mai, ledo natove rarara nte katuvura mboto, nau rapatesi ntona, ira bate-batena mokarajaa ka Tuputa Yesus Kristus.

²⁷ Kami nantudu i Yudas bo i Silas tou nte komiu nosanggani-nggani ante i Paulus bo i Barnabas. Ira mompakapola isi nu sura hitu ka komiu ante tesara mboto. i

²⁸ Sampesuvu-sampesuvu, hitumo asele polibu kami anu nipokono nu Nosa Gasa nu Alatala bo nipokono kami muni, ala komiu ledo mandasa mantuntuni atura-atura nakaja. Aga atura-atura hitu paraluu raoseakamiu: i

²⁹ Nee rakandemiu kandea nipesomba ka tupu-tupu ntanina. Nee rakandemiu raa, bo nee rakandemiu bau lako ri binata nikoje, haitumo anu ledo nisuvuraka raana. Bo nee mosampaturu ante tona ledo bereimiu mboto. Ane raoseakamiu atura-atura haitu, nabelomo. i Sampe ri siimo ruru isi sura kami."

³⁰ Naupupa ira ampa nopalakana, notuamo ira hau ri ngata Antiokhia. Nakava sumai, nipasiromura puramo topomparasaya bo nidekeira sura haitu ka ira.

³¹ Nadamba mpuu rara ntodea topomparasaya nobaca sura haitua, apa isi sura haitu nompakavoe rarara.

³² Naliu haitu, i Yudas bo i Silas nasae notesa nte topomparasaya ri Antiokhia ala mompakadidi rarara bo mompakaroso pomparasayara, apa ira randua nabi anu nompakule mompasimbayu tesa nidekei nu Alatala ka ira.

³³ Naupu i Yudas bo i Silas nonturo sumai bara sakuya kasaena, nidekei ntoAntiokhiamo ira manjili hau ri ngata Yerusalem. Topomparasaya ri Antiokhia nanguli ka ira, "Pakabelo ri dala. Pakavote tabe kami ka tona nantudu komiu."

³⁴ [Tapi kaupuna ledo hau i Silas. Niulina monturo ri ngata Antiokhia ruru.]

³⁵ I Paulus bo i Barnabas muni nonturo bara sakuya kasaena ri ngata Antiokhia. Ri sia ira nompatuduki bo nompatolele tesa i Pue Yesus, nosanggani-nggani ante roa deara ntanina.

³⁶ Ledo nasae kaliuna haitu, i Paulus nanguli ka i Barnabas, "Hau kita manjili ri ngata-ngata nikalauta bara ipia nompatolele tesa nu Alatala. Kita kana hau manggita sampesuvu-sampesuvu anu nomparasaya i Yesus hamai, ala rakitata berimbamo katuvura."

³⁷ Nangepe haitu nasitujumo i Barnabas. Ia madota manggeni i Yohanes-Markus muni,

³⁸ tapi i Paulus nanguli, "Ledo nabelo manggeni i Markus, apa nipalaisina kita bara ipia ri propinsi Pamfilia, bo ia ledo nokarajaa sampe naupu."

³⁹ Jadipa i Paulus bo i Barnabas nosinggarau mpuumo bo kaupuna ira nosimpogaamo. I Barnabas nangala i Markus bo ira nesavi kapala hau ri levuto Siprus.

⁴⁰ I Paulus nompelisi i Silas momporoa ia. Bo topomparasaya ri ngata Antiokhia nosambaya ala Alatala mompoasi bo mombajagai ira randua riara polipara. Naupu haitu nalaimo ira.

⁴¹ Ira nombalintiku pura-pura propinsi Siria bo Kilikia. Nipakarosora pomparasaya ntopangoseaka i Yesus hamai.

Kisah Para Rasul

Video Kisah Para Rasul 15

Ikuti Kami:

KONTAK | PARTISIPASI | DONASI