Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Pira-pira ulun jak Yudea ratong mik Antiokhia rik ngajar ulun-ulun percaya di Antiokhia udi bahwa kik tian mak disunat menurut hukum Musa, tian mak dapok diselamatko.

² Paulus rik Barnabas menantang keras pendapat ulun-ulun udi. Akherni ditantuko in Paulus rik Barnabas rik pira-pira ulun bareh jak Antiokhia mik di Yerusalem untuk ngicikko masalah ano jama rasul-rasul rik jelma-jelma sai mimpin di dudi.

³ Jemaah di Antiokhia ngantak tian sampai luah kota, kak raduni tian mik ngeliu Fenisia rik Samaria. Di dudi tian nyeritako injuk repa jelma-jelma lain Yahudi radu nyerahko diri jama Allah. Kabar ano nyenangko nihan jelma-jelma sai percaya di dudi.

⁴ Waktu tian sampai di Yerusalem, tian disambut betik ulih jemaah, rik ulih rasul-rasul rik jelma-jelma sai mimpin. Raduni tian nyeritako jama ulun-ulun udi tentang sunyinni sai radu diguaiko Allah liwat tian.

⁵ Kidang pira-pira jelma jak golongan Farisi sai radu percaya, cecok rik cawa, "Ulun-ulun jak bangsa bareh sai radu percaya udi harus disunat rik diwajibko nutuk hukum Musa."

⁶ Raduni rasul-rasul rik jelma-jelma sai mimpin bekumpul untuk ngicikko masalah ano.

⁷ Saka nihan tian tukor pikeran. Akherni Petrus cecok rik cawa, "Puari-puari! Keti tenggalan pandai bahwa pira waktu sai radu Allah milih nyak jak hantara keti untuk ngabarko Kabar Betik udi jama ulun-ulun lain Yahudi, in tian pun ngedengi rik percaya.

⁸ Rik Allah sai kenal hati manusia radu nunjukko bahwa Ia nerima tian; Ia nunjukko hal ano ngeniko jama tian Ruh Allah gegoh injuk sai radu dikeniko-Ni jama ram muneh.

⁹ Allah mak ngebida-bidako ram jama tian. Ia nyuciko hati tian, mani tian percaya.

¹⁰ Nah, api sebab keti haga ngelawan Allah tano jama ngeni suatu kewajiban sai biak jama jelma-jelma sai nutuk inji, padahal nenek muyang ram rik ram tenggalan pun mak sanggup ngelaksanakoni.

¹¹ Sebalikni, ram percaya rik ram diselamatko ulihni belas kesian Tuhan Isa; injuk reno muneh tian."

¹² Maka hemado seluruh jelma sai bekumpul di dudi. Raduni tian ngedengiko Barnabas rik Paulus nyeritako luot seluruh keajaiban rik hal-hal luar biasa sai radu diguaiko ulih Allah liwat tian di hantara jelma-jelma bangsa bareh sai lain Yahudi.

¹³ Seradu tian cawa, Yakobus cawa, "Puari-puari! Cuba dengiko nyak.

¹⁴ Simon ampai gaoh nerangko injuk repa Allah pada mulani nunjukko perhatian-Ni jama ulun-ulun lain Yahudi, jama maksud milih jak tian ulun-ulun bareh sai haga jadi umat-Ni.

¹⁵ Udi cucok jama sai radu dinubuatko ulih nabi-nabi. Mani wat tetulis injuk reji,

¹⁶ 'Radu jak seno Nyak haga ratong luot,' ani Tuhan, 'Nyak haga ngebangun luot lamban Daud sai radu rubuh, rik nguyunko reruntuhanni, raduni negakkoni luot;

¹⁷ in seluruh jelma sai sisa dudi nyepok Tuhan, jejama seluruh bangsa bareh sai lain Yahudi sai radu Kuurau untuk jadi kedau-Ku.' Injuk renodo cawa Tuhan,

¹⁸ sai radu ngeni pandai hal ano jak tumbai."

¹⁹ "Jadi menurut pendapatku," ani Yakobus, "ram mak ngasi nyusahko ulun-ulun lain Yahudi ano sai nyerahko diri jama Allah.

²⁰ Kidang ram harus nulis surat jama tian rik nasihatko tian in tian dang nganik kanikan najis sai radu dipersembahko jama berhala, atau nganik daging binatang sai mati dicekik, atau nganik rah. Rik juga in tian ngejaohko diri jak perbuatan-perbuatan hajor.

²¹ Mani hukum Musa radu jak tumbai dibacako unggal rani Sabat di lamban-lamban ibadah, rik dikabarko di seluruh kota."

²² Rasul-rasul rik jelma-jelma sai mimpin, jejama seluruh anggota jemaah udi memutusko untuk milih pira-pira jelma jak tian sai haga diutus mik Antiokhia jejama Paulus rik Barnabas. Maka tian milih Silas rik Yudas sai disebut juga Barsabas. Kerua jelma inji yakdo jelma-jelma sai terkemuka di hantara ulun-ulun percaya di Yerusalem.

²³ Jejama jama utusan udi tian ngirim muneh sai surat bunyini injuk reji, "Untuk sunyinni puari-puari sai asalni jak bangsa-bangsa bareh sai lain Yahudi, sai tinggal di Antiokhia, Siria rik Kilikia. Salam jak sekam, rasul-rasul rik jelma-jelma sai mimpin, yakdo puari-puarimu.

²⁴ Sekam ngedengi wat pira jelma jak hantara sekam sai radu mik jama keti rik ngacauko rik ngebingungko keti jama ajaran-ajaran tian. Padahal sekam mawat ngayun tian ngelakuko ano.

²⁵ Udi sebabni sekam radu berunding rik sunyinni setuju untuk milih pira jelma rik ngutus tian jama niku. Tian haga mik jejama jama Puari Barnabas rik Paulus sai sekam kasihi.

²⁶ Kerua jelma inji yakdo jelma-jelma sai radu mempertaruhko nyawa tian ulihni Tuhan ram Isa Almasih.

²⁷ Jadi, sekam ngutus Yudas rik Silas mik jama Puari-puari. Tiando sai haga nyampaiko tenggalan secara langsung jama niku kabar sai tetulis delom surat inji muneh.

²⁸ Ruh Allah radu setuju -- rik sekam juga setuju -- in keti dang dikeni kewajiban-kewajiban sai lebih biak jak kewajiban-kewajiban sai perlu inji gaoh:

²⁹ dang nganik kanikan sai radu dipersembahko jama berhala; dang nganik rah, dang nganik daging binatang sai mati dicekik, rik jaohko perbuatan-perbuatan sai hajor. Kik keti ngejaohko diri jak hal-hal ano, keti radu ngelakuko sai betik. Sampai reno gaoh, selamat!"

³⁰ Radu jak nangguh, tian sai diutus ano berangkat mik Antiokhia. Di dudi tian ngurau sunyinni anggota jemaah bekumpul raduni nyampaiko surat udi.

³¹ Waktu anggota-anggota jemaah ngebaca surat udi, tian senang nihan isi surat udi sai ngehibur hati tian.

³² Yudas rik Silas, sai juga nabi, saka ngicik jama puari-puari sai percaya di Antiokhia udi untuk ngeni durongan rik kebanian jama tian.

³³ Radu jak Yudas rik Silas tinggal di dudi pepira saka, ulun-ulun percaya sai di Antiokhia udi ngirim tian muloh rik ngayun tian nyampaiko salam jama ulun-ulun sai ngutus tian.

³⁴ [Kidang Silas mutusko untuk tetap tinggal di Antiokhia.]

³⁵ Paulus rik Barnabas juga tinggal pepira saka di Antiokhia. Di dudi tian ngajar rik ngabarko cawa Tuhan jejama jama lamon jelma bareh.

³⁶ Mak mesaka jak seno Paulus cawa jama Barnabas, "Ija ram muloh napol puari-puari sai percaya jama Isa di seluruh kota di dipa ram radu ngabarko cawa Tuhan; in ram ngeliak injuk repa keadaan tian."

³⁷ Barnabas haga ngusung Yohanes Markus,

³⁸ kidang Paulus ngerasa mak betik ngusung Markus, sai mak haga beguai jejama jama tian rik ninggalko tian di Pamfilia.

³⁹ Maka Paulus rik Barnabas betangkar nihan hingga akherni tian bepisah: Barnabas ngakuk Markus rik belayar jama ia mik Siprus.

⁴⁰ Paulus milih Silas raduni berangkat jama ia radu jak puari-puari sai di Antiokhia udi nyerahko tian jama rahmat Tuhan.

⁴¹ Tian pun ngelilingi Siria rik Kilikia; di dudi tian nguatko jemaah-jemaah.

Kisah Para Rasul

Video Kisah Para Rasul 15

Ikuti Kami:

KONTAK | PARTISIPASI | DONASI