Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Lit piga-piga kalak reh i Judea nari ku Antiokia janah iajarina kalak si nggo tek man Jesus nina, "Labo kam terkelin ibahan Dibata adi la kin kam isunatken bagi iaturken Undang-undang Musa."
2 Pengajaren kalak enda ilawan Paulus ras Barnabas tuhu-tuhu seh jadi perjengilen si mesangat. Emaka dungna ersada arih perpulungen gelah Paulus ras Barnabas bage pe piga-piga kalak anggota perpulungen berkat ku Jerusalem ndahi rasul-rasul ras pertua-pertua guna ncakapken persoalen enda.
3 Itaruhken perpulungen ia seh ku darat kuta. Jenari erdalan ia arah Penike ras Samaria. I bas kuta-kuta si ibentasina, iturikenna man kalak si nggo tek maka si la kalak Jahudi pe nggo robah. Meriah ukur perpulungen megi berita enda.
4 Kenca seh i Jerusalem, ngalo-alo perpulungen, rasul-rasul ras pertua-pertua. Iturikenna man kalak e kai si nggo ibahan Dibata arah ia.
5 Tapi tedis piga-piga kalak i bas kalak Parisi si nggo tek jenari nina, "Si labo kalak Jahudi e arus isunatken lebe, jenari ikutkenna Undang-undang Musa."
6 Emaka ersidang rasul-rasul ras pertua-pertua guna ncakapken persoalen e.
7 Kenca ndekah ngerana, janah percakapen e lalap la erkedungen, tedis Petrus, jenari nina, "O senina-senina, ietehndu maka nai nari aku nggo ipilih Dibata i tengah-tengahndu nari guna meritaken Berita Si Mehuli man si labo kalak Jahudi gelah ibegina dingen tek ia.
8 Janah Dibata, si nandai perukuren manusia, nggo encidahken maka si labo kalak Jahudi pe IakuiNa nge. IcidahkenNa e alu mereken Kesah Si Badia man kalak e bali ras IberekenNa man banta.
9 Labo erndobah IdahNa kita ras si labo kalak Jahudi. IbersihkenNa ukur kalak e perbahan ia tek.
10 Dage ngkai maka genduari icubaindu Dibata alu namaken baban si mberat man ajar-ajar e? Nininta nai bage pe kita jine labo ngasup mersansa.
11 Tapi sebalikna, tek kita, maka erdandanken lias ate Tuhan Jesus kita terkelin bali ras si labo kalak Jahudi."
12 Sinik kerina kalak si pulung e. Jenari ibegikenna Paulus ras Barnabas nuriken kerina tanda-tanda sengget si mbelin si nggo ibahan Dibata arah ia i tengah-tengah si labo kalak Jahudi.
13 Kenca dung ngerana Paulus ras Barnabas, ngerana ka Jakup, nina, "O senina-senina, begikenlah katangku enda!
14 Nggo ituriken Simon kuga nai tangtangna Dibata ndahi kalak si la nandai Dibata janah IpilihNa sada bangsa i bas kalak e nari jadi si KerajangenNa.
15 Si enda sue ras si ikataken nabi-nabi bagi tersurat i bas Pustaka Si Badia,
16 'Nina Tuhan: Kenca si enda mulihken Aku pagi; janah Kupajekken mulihi rumah Daud si nggo runtuh. Runtuh-runtuhna e Kubahan jadi mbaru janah Kubangun rumah e mulihi.
17 Gelah kerina kalak si deban ndarami Tuhan, kerina si labo kalak Jahudi si nggo Kudilo jadi si kerajangenKu.
18 Enda me si nggo ikataken Tuhan, si erbahanca nai ieteh kalak kerna si enda.'"
19 Iterusken Jakup ngerana nina, "Adi kuakap, ula sisusahi si labo kalak Jahudi si nggo erpengendes man Dibata e.
20 Tapi sibahanlah surat man bana gelah ula ipanna pangan si la bersih si nggo ipersembahken man dibata-dibata palsu; gelah ula ia erlagu la mehuli; gelah ula ipanna dareh ntah asuh-asuhen si mate la perbahan igeleh.
21 Sabap nai nari Undang-undang Musa iberitaken i tep-tep kuta, janah seh asa genduari iogeken i bas rumah persembahen tep-tep wari Sabat kalak Jahudi."
22 Jenari ersada arih rasul-rasul, pertua-pertua ras kerina ngawan perpulungen guna netapken utusen si berkat ras Paulus bage pe Barnabas ku Antiokia. Itetapkenna Silas ras Judas si igelari Barsabas. Kalak enda duana ihamati i bas perpulungen.
23 Arah ia isehken surat man si labo kalak Jahudi; isina bagenda, "Kami, rasul-rasul ras pertua-pertua, eme senina-seninandu, nehken berita mejuah-juah man bandu senina-senina kami si labo kalak Jahudi si ringan i kuta Antiokia, i Propinsi Siria ras Propinsi Kiliki.
24 Nggo ibegi kami berita, maka lit piga-piga i bas kami nari, si labo isuruh kami, nuhsahi ukurndu janah si erbahanca gulut akapndu alu pengajarenna.
25 Perbahan si e nggo ersada arih kami guna netapken piga-piga kalak si erberita man bandu. Ia berkat ras Barnabas bage pe Paulus, si ikelengi kami,
26 si nggo nggit berkorban guna gelar Tuhanta Jesus Kristus.
27 Dage isuruh kami Judas ras Silas gelah ikatakenna langsung man bandu isi surat kami enda.
28 Nggo itetapken Kesah Si Badia bage pe nggo itetapken kami maka ulanai itambahi aturen-aturen si deban man bandu, selain aturen-aturen si perlu enda;
29 ula pan pangan si nggo ipersembahken man dibata-dibata palsu; ula pan dareh; ula pan asuh-asuhen si mate la igeleh; janah ula erlagu la mehuli. Adi ipatuhindu enda maka kam nggo erbahan si mehuli. Sibar em. Mejuah-juah."
30 Emaka ipeberkat me rombongen e ku Antiokia. Kenca seh ia i Antiokia, isuruhna kerina kalak si tek man Jesus pulung, jenari iberekenna surat e man bana.
31 Meriah ukur perpulungen kenca iogena surat e, perbahan isi surat e netapken ukurna.
32 Judas ras Silas duana ia nabi; gedang ia ngerana man perpulungen e. Ipegegehina dingen ipetetapna ukur perpulungen e.
33 Kenca piga-piga wari dekahna ia i je, ipeberkat perpulungen e ia alu meriah ukur. Mulihken ia ndahi perpulungen si ngutus ia.
34 (Tapi mehuli iakap Silas maka ia tading i je.)
35 Paulus ras Barnabas ndekah ringan i Antiokia. Duana ia ras nterem kalak si deban ngajar dingen meritaken Kata Tuhan.
36 Piga-piga wari kenca si e nina Paulus man Barnabas, "Ota sidahi mulihi senina-seninanta ku kuta-kuta si nggo siberitaken i je Kata Tuhan. Gelah si idah dingen sieteh kuga perkembangenna."
37 Ate Barnabas ikut min Johanes Markus.
38 Tapi Paulus erpengakap maka Johanes Markus la mehuli ibaba, sabap Johanes Markus nadingken ia mbaru enda i Pampilia dingen lanai ia ikut ras-ras ndungi dahin e.
39 Perbahan si e turah perubaten i bas ia duana si erbahanca ia sirang. Barnabas ras Markus erlayar ku Kiprus.
40 Tapi Paulus, ipilihna Silas. Kenca perpulungen ngendesken ia ku bas lias ate Tuhan berkat ia.
41 Isiarina daerah Siria ras Kiliki janah ipegegehina kiniteken perpulungen si i je.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA