Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Manga anạ u sěmbaụ kụ seng nikuiang dingangu ikẹ̌kěndagu Ruata i Amang, dingangu tẹ̌těntanudang baugu Mawu Yesus Kristus. Kere sěngkatau mẹ̌tatangkiang si Yesus Kristus e iạ -- i Yudas -- tuaring Yakobus,

² mẹ̌kẹ̌kahumang: Milumbạu Ruata e měngal᷊amatẹ̌, tatal᷊ěntụ dingangu karal᷊unsemahẹ̌ e kawuạ si kamene su pẹ̌daral᷊embo.

³ Manga anạ u sěmbaụ ikẹ̌kěndagẹ̌! Iạ e mạngiaking sěngapam botonge mapulu měnuratẹ̌ si kamene mạanung kasasal᷊amatẹ̌ kụ seng kinapěndangeng i kitẹ e. Arawe orasẹ̌ ini e iạ nakapěndang sẹ̌sahěsekangu měnal᷊ěntihọ u suratẹ̌ ini e si kamene tadeạu i kamene měněpasẹ̌ben munarang pěngangimang kụ seng nionggọ u Mawu Ruata e sěnsul᷊e sarang marěngụ-děngụ su apang umat'E.

⁴ Batụu ta nikahěnganeng i kitẹ e, kai piạ u němpělikosẹ̌ nahunsuẹ̌ nẹ̌těngkal᷊aụ dingang i kitẹ. I sire e kai taumata ral᷊akisẹ̌ měngẹ̌ngal᷊intuing habaru tatal᷊ěntụu Ruatang kitẹ, mědeạu makahombang lěsabu měnukạu abul᷊ing sire. Kụ i sire manuhudu Mawu Yesus Kristus, Měngangawasa mang sěmbaụ Mawung kitẹ. Ren dokeng kal᷊amona hukumang baug'i sire e seng nipěhengetang su ral᷊ungu Winohẹ Susi e.

⁵ Patikụ e seng su kasingkạ i kamene. Kaiso iạ e mapulu mapẹ̌tahěndung i kamene mạanung kereapa Mawu mapakasal᷊amat'u umatu Israel bọu wanuan Misirẹ̌, kutẹu samurine kawe mapakawinasang taumata apan tawe měmpangimang sutal᷊oaran sire.

⁶ Tahěndunge lai manga malạekatẹ̌ kụ seng nahěmpal᷊iu wọu kawasang sire, hakịu i sire naněntangu pẹ̌tatanakeng i sire. Mawu e něhapusẹ̌ manga malạekatẹ̌ e ringangu hante kakalẹ̌ e, su tampạ u kararěndung su al᷊ungu wanua e. I sire kạl᷊ahapusẹ̌ sene sarangkewen kanawoěngu hukumang si sire su Ěllo masěllahẹ̌ e sarung.

⁷ Kerene lai tahěndunge soan Sodom dingangu Gomora ringangkewen soa mạngělikụ e kụ apan tumanạ e měmpẹ̌kẹ̌koạ apang kinoạu manga malaekatẹ̌ ene. I sire měmpẹ̌kẹ̌koạ hal᷊ẹ̌ u pẹ̌sasasundal᷊ẹ̌ dingangu karal᷊amuhụ, hakịeweng i sire sẹ̌sigẹ̌sakengu hukumangu naraka kakalẹ̌, nakoạ tatahěndungang su patikụ taumata.

⁸ Kerene lai apang wẹ̌bal᷊iawangu i sire měbẹ̌baradosang badang i sire hala. I sire kai mapạkasanạu kawasang Duata ringangu měnẹ̌namedẹ̌ tumanạu Sorga mawawantugẹ̌.

⁹ I Mikhael sẹ̌sane mananěmbonangu malạekatẹ̌ e, tawe někẹ̌koạ kerene. Su tempon i sie mědẹ̌darendehu setang su ral᷊ungu pẹ̌sasitori mědẹ̌darendehu i sai sarung makahombang bal᷊unangu wadang i Musa, i Mikhael e tawe wahani měhukungu setang dingangu manga sasamede. I Mikhaelẹ̌ e tumbạeng nẹ̌bera, "Mawu e sarung mẹ̌buheang si kau!"

¹⁰ Kai ringangkewen manga sasamedẹ̌ e i sire němpanelorẹ̌ apạeweng tawe nikạěnnaěng i sire. I sire mẹ̌sul᷊ungu manga binatang tawẹ naunge, kụ tumbạeng masingkạ u patikụ e ual᷊ingu kal᷊okone. Kaiso kawe ual᷊ingu ene makạbinasa si sire.

¹¹ Kạěngkěhang i sire! I sire seng timol᷊e raral᷊engang i Kain. Mědeạu i sire makaěbạ doitẹ̌, i sire nẹ̌těngkahumagu watangeng i sire su wal᷊ang kapapal᷊idẹ̌ mẹ̌sul᷊ung i Bileam. Kụ i sire mal᷊aing nipakawinasa ual᷊ingu němpěnggohaeng kere i Korah.

¹² Su tempong i kamene měmpẹ̌sal᷊imbang e, lulun sire e su tal᷊oarang kamene makạdarěnting. Batụu i sire e kai apạewe makakombang mahungkaěnge ringangu tawe měngkamamea, ringangu tumbạeng měngẹ̌ngěnna watangeng hala. I sire e kai tabidạu kere winawa nitiụ u anging, kai tawe makakarasehẹ̌. I sire e mal᷊aing kere kakaluang tawe mẹ̌bawua maning su musungu pẹ̌bawawua, kakaluang kụ hamụe seng niěbụ dingangu selaing nahěgu-hěgu.

¹³ Mẹ̌sul᷊ungkewen luạ mal᷊aihạ su sasị e mẹ̌děnduị'u sěbu, kerene lai i sire mạpal᷊ěton sěbung kal᷊awọu kakanoạ i sire makạmea. I sire e kai mẹ̌sul᷊ung'u manga wituing mẹ̌pẹ̌palilị dingangu apan sen niriahiang'u tampạ e kahian Duata su ral᷊ung'u kararěndung kaěllikang'e sarang marěngụ-děngụ.

¹⁴ I Henokh hěnto kapitune wọu i Adam nạung kal᷊amona e wọu naněbal᷊u kakakoạ i sire. I Henokh nẹ̌berau, "Kakělla, Mawu e sarung duměnta ringangu manga malạekate susi hiwune

¹⁵ baugu měhukungu patikụ taumata. Mawu e sarung měhukungu taumata raral᷊akisẹ̌ e ual᷊ingu kakanoạ i sire mal᷊amuhụ. Dingangu i sire sarung měhukungu taumata waradosa e ringangu duruhaka e ual᷊ingu kal᷊awọu wawerane lahinakang iwẹ̌berane."

¹⁶ I sire e měngkate tạ umpade kụkurubụ dingangu mapẹ̌sal᷊ang bal᷊ine e. I sire mẹ̌bẹ̌biahẹ̌ tụtuhụ ewe kal᷊awọu ěnning i sire mararosa e. I sire měngkate tụtahimorasu kakakoạ i sire hala e, ringangu mělẹ̌lewa taumata mědeạu makareạ untune.

¹⁷ Arawe i kamene manga anạ u sěmbaụku ikẹ̌kěndagẹ̌, pẹ̌tahěndungko apang nạung seng nibawerang manga rarolohangu Mawung kitẹ Yesus Kristus.

¹⁸ I sire seng naul᷊ị kal᷊imona si kamene u kakạsandigeng, ěllong kiamatẹ̌e sarung suměpụ taumata mělaheghesẹ̌ si kamene, i sire e apang měmpẹ̌bẹ̌biahẹ̌ tụtol᷊e kal᷊awọu ěnning i sire waradosa.

¹⁹ I sire ini e kai taumata makạkoạ pẹ̌dal᷊ahae. I sire e tawe tumatatuhụ kawasang Rohkẹ̌ u Ruata e, kaiso kawe tụtuhụ kal᷊awọu ěnningu dunia e.

²⁰ Arawe i kamene manga anạ u sěmbaụku, pakatal᷊ěmbuhu e we turusẹ̌ pẹ̌bawiahi kamene su laěmpahu pangangimang si Yesus Kristus. Pěngangimang i kamene e mambeng susi kahěnga-hěngang: Těntal᷊ang ene e pěmpẹ̌kal᷊iomaneng bue su ral᷊ungu Rohkẹ̌ u Ruata e;

²¹ kụ pěmpẹ̌biahẹ̌ sidutu su ral᷊ungu kakěndagu Mawu Ruata karěngụeweng i kamene mạngampal᷊ẹ̌ kakěhangu Mawu Yesus Kristus Mawung kitẹ e kụ sarung mangonggọu pẹ̌bawiahẹ̌ tutune ringangu kakalẹ̌ si kamene.

²² Kụ baugu i sain naunge tụtaghiawahẹ̌ e, ute i kamene pěmpenodẹkong tatal᷊ěntụ e.

²³ Kụ bẹ̌bol᷊engkong kamene sol᷊ong l᷊ikude taumata e wọu ral᷊ungu putung tadeạu i sire masalamatẹ̌. Su wal᷊inẹ ete wue ute i kamene pěmpanodẹbeng pẹ̌kakěndagẹ̌ piạ takụe, kaiso pěmpẹ̌binsị u l᷊ai pakeang i sire kụ seng něngkal᷊amuhụ u ěnning i sire waradosa e.

²⁴ Duata e kawasa maněntanudẹ̌ si kamene mědeạu kumbahang i kamene manawo, ringangu kawasa mangal᷊ạ si kamene sol᷊ong těngon'E mawantugẹ̌ e, ringangu ral᷊uasẹ̌ ore lai tawẹ turạ e,

²⁵ u kai i Sie Ruata, něnal᷊amat'i kitẹ e su ral᷊ungu Mawung kitẹ i Yesus Kristus. Kai i Sie Ruata mawantugẹ̌, masěllahẹ̌, makawasa, ringangu piạ pěhěngking'E dongkeng nạung kal᷊amona sarang orasẹ̌ ini, ringangu sarang marěngụ-děngụ! Aming.

Yudas

Video Yudas 1

Ikuti Kami:

KONTAK | PARTISIPASI | DONASI