Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Rat ni Yahuda, demulun Yésus Keristus, idi kinanak Yakub — Kuan lemulun luk tinawar Allah luk mulun bang awa Allah Taman idi luk inita Yésus Keristus:

² Do' éi', awang, idi awa amé'-amé' mula kuan muyuh.

³ O amung-amung luk inanku mawa, ui pelaba pian ngayud surat kuan muyuh ratnan ulun tau luk pad-pad ineh, iamo' niatku nesigio pad ui ngayud pad ngecuk nemuyuh pesingaro bang anu luk pangeh biré Allah sekua' mo' kuan amung-amung pupuNeh.

⁴ Ngaceku inan lemulun luk na manu nesemeut luk ngisu' bala ratnan katu Allah tau, pad ngelinged kekamendeh luk melutak. Idi ideh ngarung Yésus Keristus, Allah Tuhan tau luk Sebuleng ineh. Idi mon pangeh ginala' bang Surat allah ratnan ukum luk tinina' kuan lemulun ineh.

⁵ Sagan pana' muyuh kali' amug ini, ui sikal mada' nemuyuh ratnan kudeng apeh Tuhan nengulun pupu Israil luk inuitNeh remuat rat bang bawang Masir, iamo' muci Ieh nengaté lemulun luk na manu.

⁶ Ngerawé amung-amung melaikat luk nelemaba lakan lalud luk litep kuandeh, idi luk nenecan su luk inandeh tudo. Melaikat-melaikat ineh pange kiling ku kaling luk meruked pa liang tana' bang su luk medacem, pad macing Aco Ngukum luk rayeh ineh.

⁷ Ngerawé Sodom, Gemora, idi bawang-bawang luk pelengit bawang ineh, su luk inan lemulun nenganau' luk kikem melaikat ineh pana'. Ideh pasét, idi deléi dengan deléi nenganau' luk inandeh na pekalai. Ideh inukum ku apui luk meruked ineh, mangun ku luk pinginud kuan amung lemulun.

⁸ Kudeng ineh teh lemulun ini luk mileh nier ngelutak bururdeh sebuleng. Ideh ngebeneh lalud Allah, idi ngedat pudut-pudut luk buren déi' dita'.

⁹ Iamo' Mikail, lun rayeh melaikat ineh pana' na nenganau' kudeng ineh. Kareb ieh nepekedaluh dengan Iblis, idi didueh nepesaad ratnan idé luk miak ngalap butung Musa, idi na Mikail mekuu' ngukum Iblis dengan nguyo neneh, iamo' keburi'neh, "Aganeh Tuhan mebpeng namu!"

¹⁰ Iamo' lemulun ini nguyo anun-anun luk na nekali'deh, idi anun-anun luk nekali'deh dengan na ileh, mepad kudeng pung luk meliput, ieh ineh luk ngacing até kuandeh.

¹¹ Ideh pelaba susa' ngaceku ideh nemaya' lawé Kain. Ideh nemaré bururdeh maya' sala' Bilam pad ngalap tabpar. Ideh sikal metueh mepad kudeng Kora, idi uen ngusag mepad kudeng ieh teh.

¹² Ideh mangun ku aceh sabeng luk melutak bang irau muyuh, kareb ideh mabuk dengan na migu'. Ideh ngerawé burudeh sebuleng mo'. Ideh mepad kudeng laput pinalid ku bui; mepad kudeng lawa kayuh luk na kebua' bang kareb, luk petulu, luk dueh kua' maté, idi luk mebubput dengan uatneh;

¹³ mepad kudeng ribut, luk bang abpa' rayeh, idi kekamendeh luk inan migu' mepad kudeng lapa'. Ideh mepad kudeng gituen luk nalan, idi kuan lemulun ineh dacem luk pingot-pingot pangeh tinina' macing ruked-ruked.

¹⁴ Idi kuandeh ineh teh Enok, mupun luk keanem ratnan Adam, nemada' atun, keburi'neh, "Siruh, Tuhan macing dengan tuda'-tda' ngepulu' ribu melaikatNeh luk meligan,

¹⁵ pad ngacing ukumNeh kuan amung-amung lemulun idi ngukum lemulun luk dat ngaceku amung-amung kekamendeh luk dat ineh luk pangeh inau'deh, idi ngaceku amung-amung kuyo lun luk dat ineh inan Allah!"

¹⁶ Lemulun ini dureng-dureng idi ngadu'-ngadu'. Ideh maya' pian bururdeh sebuleng, idi ngubur bururdeh sebuleng idi ngedita' nelun baken pad ngalap tabpar kuan bururdeh sebuleng.

¹⁷ O luk inanku mawa, do' muyuh ngerawé ratnan luk bila rasul-rasul Tuhan tau Yésus Keristus atun.

¹⁸ Kebaladeh nemuyuh, "Kareb aco luk kekiped lemulun miak macing situnga nemuyuh, ieh ineh lemulun luk maya' pian bururdeh luk dat ineh."

¹⁹ Idi ideh luk ngatad lemulun, idi maya' pian bururdeh, idi na luk idi Roh bang nedeh.

²⁰ Iamo' muyuh ini, O luk inanku mawa, do' naped burur muyuh luun diri anu muyuh luk meligan, idi sembayang bang Roh Meligan.

²¹ Do' matar burur muyuh bang awa Allah, idi nganét éi' Tuhan tau Yésus Keristus luk maré ulun luk meruked nemuyuh.

²² Idi do' méi' kuan lemulun luk merapang;

²³ ngeruid nedeh ineh rat bang apui, idi ngulun nedeh. Idi kuan lun baken do' muyuh mé' idi matot, dengan megateh ku ayungdeh luk melutak ratnan lili tana' ini.

²⁴ Idi kuan Allah luk melalud matar nemuyuh pad muyuh na metebaceng, idi luk naped nemuyuh dengan na sala' pa atun rayehNeh, dengan awang niat,

²⁵ ieh ineh kuan Allah Lun Nengulun netau luk Sebuleng: rayeh, dita', tueh, idi lalud, ratnan Tuhan tau Yésus Keristus luk idi rat pun-pun idi nekini pana', idi macing ruked-ruked peh! Amin.

Yudas

Video Yudas 1

Ikuti Kami:

KONTAK | PARTISIPASI | DONASI