Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Surat enda i bas aku nari, Judas, suruh-suruhen Jesus Kristus dingen senina Jakup. Surat enda man kalak si nggo idilo Dibata, si nggeluh i bas keleng ate Dibata Bapa dingen i bas kepkepen Jesus Kristus.

² Dibatalah mereken man bandu dem perkuah ate, kemalemen ate ras kekelengen.

³ O teman-teman si kukelengi! Aku ersura-sura erbahan surat man bandu kerna keselamaten si nggo sinanami ras-ras. Tapi genduari perlun kuakap erbahan surat man bandu guna pegegehi kam gelah tetap iperjuangkenndu kiniteken si nggo ibereken Dibata man anak-AnakNa sekali seh rasa lalap.

⁴ Sabap lit piga-piga kalak si la ngakui Dibata alu la sieteh nggo bengket ku tengah-tengahta. Iputarbalikkenna berita kerna lias ate Dibatanta guna mbenarken perbahanen-perbahanenna si nggesuh e. Itulakna Jesus Kristus: Ia ngenca Penguasa, Ia ngenca Tuhanta, la lit sideban. Nai nari nggo leben lit tersurat i bas Pustaka Si Badia kerna ukumen si IalokenNa.

⁵ Aminna pe nggo ietehndu, kuturiken denga ateku man bandu kuga Tuhan mulahi kalak Israel i taneh Mesir nari, tapi kedungenna IkernepkenNa kalak si la tek man BaNa.

⁶ Ingetlah malekat-malekat si la tetap tading ringan i bas batas-batas kuasana si patut, tapi tadingkenna inganna jine. Malekat-malekat e igariken Dibata alu rante si la banci ceda seh rasa lalap i teruh i bas ingan si gelap. Itaban Dibata malekat-malekat e i je seh ia iukum i bas Wari Pengukumen.

⁷ Ingetlah kota Sodom ras kota Gomora, ras kota-kota si i kelewetna. Anak kota e bali perbahanenna ras malekat-malekat e. Ia campur sapih-sapih ia la bagi oratna. Anak kota e iukum alu api si la ernimpet-nimpet gelah jadi pertenget si tangkas nandangi kerina jelma.

⁸ Bage me pe, kalak si la ngakui Dibata e, bagi nipi-nipin ia kerna perkara-perkara si meganjang si erbahanca ia erdosa nandangi badanna jine. Megombang ia nandangi kuasa Dibata janah ipersilahangna mahluk-mahluk si mulia si lit i datas.

⁹ Pengulu malekat Mikael pe la pernah erbahan si bage. I bas perubatenna ras Iblis, asum ia erjengil kerna ise empuna mait si Musa, Mikael la pang numpahi Iblis, tapi nina, "Tuhan ngerawai kam!"

¹⁰ Tapi kalak si la ngakui Dibata e ilawanna alu megombang kasakai si la iangkana. Janah kai si ietehna alu penggejapen, bagi rubia-rubia si merawa, e kal me si encedaken ia.

¹¹ Cilaka kal me ia! Nggo ikutkenna dalan Kain. Erkiteken duit nggo iendeskenna dirina guna ndalanken kesalahen bagi si ibahan Bileam nai. Berontak kalak enda bagi Korah nai, emaka bage ka nge kalak enda ikernepken.

¹² Asum kam ras man-man bagi kalak ersenina, kalak enda desken rintep-rintep si melket i tengah-tengahndu. Sabap kalak enda man alu merangap, la meteh mela janah dirina saja ngenca iranakenna. Bali ras embun si iembusken angin, tapi la mereken udan. Bali ras batang kayu si la erbuah aminna gia i bas perudan. Bali ras batang kayu si nggo iruah uratna nggo mate tuhu-tuhu.

¹³ Bali ras galumbang si mbelin i lawit teridah rugup-ugup; bage pe kalak enda ncidahken perbahanen-perbahanenna si man kemelanken e. Kalak enda bali ras bintang-bintang si erdalan ku jah-ku jenda, si man bana nggo isikapken Dibata ingan si seh kal gelapna seh rasa lalap.

¹⁴ Enoh, kesusuren pepituken i bas Adam nari nggo ernubuat nai kerna kalak enda nina, "Nehenlah! Reh me Tuhan ras meribu-ribu MalekatNa si Badia;

¹⁵ IadiliNa me kerina jelma guna ngukum kerina kalak perdosa si la ngakui Dibata erkiteken perbahanen-perbahanenna si ngelawan Dibata ras kerina cakap si ibelaskenna nimbak Dibata!"

¹⁶ Kalak si la ngakui Dibata la erngadi-ngadi jungut-jungut janah nalahken kalak si deban. Sura-surana si jahat ngenca idalankenna. Ipeganjangna bana janah ipuji-pujina kalak si deban gelah erdalan sura-surana.

¹⁷ Tapi kam kerina o si kukelengi! Ingetlah kai si nggo nai ituriken rasul-rasul Tuhanta Jesus Kristus man bandu.

¹⁸ Nina man Bandu "Nandangi wari-wari pendungi e pagi reh me kalak si nggombang-gombangi kam, e me kalak si ngikutken sura-surana si nimbak Dibata e."

¹⁹ Kalak si bage me si mecah-mecah i bas perpulungen, e me kalak si ikuasai kerincuhen kulana, si la lit i bas ia Kesah Si Badia.

²⁰ Tapi kam kerina o si kukelengi, tetaplah pegegehi bandu alu kinitekenndu si badia e. Ertotolah alu kuasa Kesah Si Badia,

²¹ janah tetaplah kam i bas keleng ate Dibata sedang kam nimai perkuah ate Tuhanta Jesus Kristus si mereken man bandu kegeluhen si tuhu-tuhu si la erkeri-kerin.

²² Cidahkenlah perkuah ate man kalak si la tetap ukurna.

²³ Selamatkenlah kalak si deban alu ngerintakken ia i bas api nari; cidahken perkuah atendu man kalak si deban alu ukur mbiar, tapi cigalah atendu nandangi uisna si nggo melket erdandanken kerincuhen kulana si dem alu dosa.

²⁴ Ia si ngasup ngkawali kam gelah ula celus, si ngasup pe maba kam ngadap ku adep-adepen Dibata si Mulia, alu dem keriahen ras la erpandangen --

²⁵ Ia ngenca Dibata Si Ngkelini kita arah Jesus Kristus Tuhanta, si akuilah KemulianNa, KedolatenNa, KuasaNa, ras PemerentahenNa nai-nai nari, genduari, ras seh rasa lalap. Amin.

Yudas

Video Yudas 1

Ikuti Kami:

KONTAK | PARTISIPASI | DONASI