Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ 'O taunu mogiooko de soata 'ipasa, 'asa de ngoi taieli 'o Yerusalemude daku, towi'asa 'o Barnabas de mita 'o Titus.

² Ngoi totagi 'o Yerusalemude sababu ma Jo'oungu ma Dutu woisulokokau 'ato salingou totagi. Ge'enaka daku gee yosibalu-balusu yomalomuno de tosiwaiti 'o Habari ma Owa gee tosiha-habari ko 'o Yahudiwa ma nyawaka, sababu tooluku 'ai manarama gee ma sirasi bolo ne'ena naga kaiparacuma.

³ 'O Titus gee womote-moteke de de ngoi, 'una ge'ena 'o Yunanioka ma yosibalu-balusu go'ona kowipakisaawa 'ato salingou womasuna,

⁴ ngaro naga 'o nyawa gee yoeluku 'ato 'ona ka moi de de ngone yopakisaa ma ngale ge'ena. 'Ona yomasiganunou naga ngoneka kayomasiriidino, ma ngale yomau yanako ma diai gee ngone kopoyongosuawau ma ngale kopomotekuwau 'o Yahudioka manga 'agama ma besesongo sababu pomarimoi de ma Yesus Kristus. 'Ona manga singinaka 'inasigilio 'o Yahudioka manga 'agama ma besesongika la ma ngale kapogilaongosi.

⁵ Ma ngomi ge'ena kogee ka ma eta ma komiakidomotekuwa, sababu ngomi miomau la 'o Habari ma Owa ma ngale ma Kristus gee miositota-totara nginika ge'ena 'uwa yatagali la kaiti-tiai.

⁶ Ngaro koge'ena, duga yosibalu-balusu gee yakiho-horomati go'ona koisigegotuawau 'o kianikia gee ma du'uru. Moteke ngoi, gee yakiho-horomati bolo ko'uwa ge'ena kaimatero. Sababu ma Jo'oungu ma Dutu 'una kowoiri-irikuwa.

⁷ 'Ipulutu so ka 'onali yongose 'ato ngoi ma Jo'oungu ma Dutu woisuloko 'o Habari ma Owa tositotara ko 'o Yahudiwa ma nyawaka, 'isoka 'o Petrus 'una wosihabari 'o Yahudi ma nyawaka.

⁸ Sababu ma Jo'oungu ma Dutu wokulakau 'o guata so 'o Petrus wodadi ma Jou wi su-suloko wakileleani 'o Yahudioka, koge'enali mita ma Jou woikulakau 'o guata ngoino sigado todadi 'o su-suloko takileleani ko 'o Yahudiwa ma nyawa.

⁹ 'O Yakobus, 'o Petrus de 'o Yohanes, 'ona ge'ena yakinako 'o jamati ma balu-balusu, 'ona mita yongose 'ato ngoi ne'ena ma Jo'oungu ma Dutu woisuloko ta'ao 'o manarama ne'ena. Sigado 'o Baranabas de mita ngoi mimaka'aokasi de de 'ona ma ngale ma no-nako 'ato mimarimoi. Ge'enaka de 'ona de de ngomi miosimoteke ma ngale ngomi dua miomanarama miositotara 'o Habari ma Owa ko 'o Yahudiwa ma nyawaka, de 'ona yomanarama 'o Yahudi ma nyawaka.

¹⁰ To 'ona manga ga-ga'asoko ka 'o ngai moi, ge'ena la salingou ngomi mioriwo 'o nyawa yosusa-susaka, de ge'ena to ngoi 'ai du-duaka.

¹¹ Gee 'o Petrus waino 'o Antiokhiano de towisingelo katowisito-tobionikau, sababu 'una watasala.

¹² Ma si-siraka yomasido'odomosi de ko 'o Yahudiokawa gee yongaku-ngakuokau. Ma gee 'o Yakobus wakisulo-suloko yoboano de 'una womatingaikau, de woolukou yomasido'odomo de ko 'o Yahudiokawa, sababu wakidomodongo 'o nyawa gee yongose 'ato ma Jo'oungu ma Dutu 'awi kawasa 'iodumu salingou yomasuna.

¹³ So ma rai 'o Yahudioka munuka mita yoma'uca-'uca 'isoka 'unali sigado nanga 'esa moi 'o Barnabas mita wakidomoteke.

¹⁴ Gee takilega-lega 'ena manga di-diai koimakadaenuawau de 'o do-dotoko 'iti-tiai ma ngale 'o Habari ma Owa, de ge'ena 'o nyawa yoboa-boano yoodumu manga bionoka de katongosekau 'o Petrusika, "Nako ngona 'o Yahudioka de no'ahu 'isoka 'o Yahudiokawau, de 'ido'oa so 'o nyawa 'iregu nakipakisaa la yomadiai 'isoka 'o Yahudioka?"

¹⁵ Moteke to ngomi mia 'asali, ngomi ne'ena 'o Yahuidoka, so "ko 'o nyawa 'ireguwa gee yosowo-sowono ma ngale kowinako-nakowa ma Jo'oungu ma Dutu".

¹⁶ Ngaro koge'ena ma ngomi mianako 'ato ngone 'o nyawa 'idadi pomarimoioli de ma Jo'oungu ma Dutu ge'ena duga kapongaku ma Yesus Kristusika. So ko ma ngalewa 'ato sababu pamoteke 'o 'agama ma besesongo. Ngomi ma sirete mita miongaku 'o Yesus Kristusika la 'idadi mimarimoioli de ma Jo'oungu ma Dutu, sababu 'amia ngo-ngaku ge'ena. So ko ma ngalewa 'ato sababu miamoteke 'o 'agama ma besesongo. Sababu ka 'o 'agama ma besesongo pamoteke, ge'ena komoiwa 'idadi pomarimoioli de ma Jo'oungu ma Dutu.

¹⁷ Ngomi mimariwo miomau mimarimoioli de ma Jo'oungu ma Dutu, ma ngekomo mio'ahu mimarimoi de ma Kristus. Ma nako ngomi miadiaiokau koge'ena, 'ena yongose ngomi 'o nyawa miosowo-sowono 'isoka 'o Yahudiwa ma nyawa, 'ato ne'ena ge'ena ma ngale ma Kristus so ngomi miosowono? Ma raiokau ko'uwa!

¹⁸ Nako ngoi tosidagioli 'o 'agama ma besesongo gee tapi-piakorokau, ge'ena ngoi tosidumutu 'ato ngoi ne'ena 'o besesongo tapare-parene.

¹⁹ 'O 'agama ma besesongou matero kaiso-songene ngoi. So ngoi mita matero katosongenokau 'o 'agama ma besesongika ge'ena la kotamotekuwau 'o 'agama ma besesongo ge'ena. La ngoi to'ahu ma ngale towile-leleani ma Jo'oungu ma Dutu. Ngoi towimoteke ma gou-goungu ma Kristus so ngoi kaimatero de 'isidisidelokau de ma Kristus.

²⁰ Ma ngale to'ahu ne'ena duga ka ngoiwau ma 'ena de ma Kristus. Ngoi to'ahu ne'ena ge'ena la to'ahu sababu tongaku ma Jo'oungu ma Dutu wi Ngowaika gee woisiboso-bosono, de womasisarakaniokau wiso-songene sababu woidora ngoi.

²¹ Ngoi tooluku taitomo ma Jo'oungu ma Dutu 'awi dora. Sababu nako ngone 'o nyawa pomarimoioli de ma Jo'oungu ma Dutu sababu pamoteke 'o 'agama ma besesongo, ge'ena ma ngale ma Kristus wosongene ma faedaa koi'iwa.

Galatia

Video Galatia 2

Ikuti Kami:

KONTAK | PARTISIPASI | DONASI