Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Sepulu empat tahun kenca si e mulihken ka aku nangkeng ku Jerusalem ras Barnabas. Ikut pe Titus kubaba.
2 Lawes aku nangkeng ku Jerusalem sabap ipetangkas Dibata man bangku maka aku arus berkat. Janah i bas perjumpan si khusus ras peminpin-peminpin si i Jerusalem, kubukaken man bana Berita Si Mehuli si kuberitaken man kalak si labo Jahudi. Sabap la ateku sia-sia kai si nggo kudahiken i bas paksa si nggo lepas, ntah si genduari.
3 Temanku Titus, aminna pe ia kalak Junani, la ia ipaksa guna isunatken.
4 Aminna pe lit piga-piga kalak si pekulah-kulah jadi senina, bengket ku bas perpulungen e, janah ersura-sura nunatken ia. Ipepayona kami alu nangko-nangko, atena guna meteh kerna kebebasen si ialoken kami erkiteken persadan kami ras Kristus Jesus. Ibahanna atena kami jadi juak-juak.
5 Tapi sitik pe kami la surut, gelah kebenaren Berita Si Mehuli e banci ijaga kami guna kam.
6 Tapi lit kalak si ipetempa-tempa peminpin. Maka bage ningku, sabap labo pangkatna kunehen. I bas Dibata la erpendobahen kerna pangkat manusia. Pangkat la nambahi kai pe nandangi Berita Si Mehuli si kuberitaken e.
7 Tapi iakuina maka aku nggo isuruh Dibata guna meritaken Berita Si Mehuli e man kalak si labo Jahudi, bali ras Petrus nggo isuruh Dibata guna meritaken Berita Si Mehuli man kalak Jahudi.
8 Sabap alu kuasa Dibata aku nggo jadi rasul nandangi kalak si labo Jahudi, bali ras Petrus nggo jadi rasul nandangi kalak Jahudi.
9 Jakup, Petrus ras Johanes, si kepeken si jadi peminpin e ngenca ngidah bekas pemere Dibata si khusus man bangku, minter isalamina aku ras Barnabas. Selaku teman si sada dahin, ersada arih kami kerina maka aku ras Barnabas erdahin i tengah-tengah kalak si labo Jahudi, janah rasul-rasul si deban erdahin i tengah-tengah kalak Jahudi.
10 Sada ngenca pemindonna eme gelah ula kami lupa nandangi kalak si musil i daerah Judea. Janah si enda kal me tuhu-tuhu ateku kudalanken.
11 Asum reh Petrus ku Antiokia, kupandang ia i lebe-lebe jelma si nterem, sabap terang ia ersalah.
12 Ope denga piga-piga kalak si isuruh Jakup seh i Antiokia, nggo biasa Petrus man ras senina-senina si labo kalak Jahudi. Tapi kenca seh kalak e, surut Petrus, janah isirangina senina-senina si la kalak Jahudi e. Lanai ia ras man, sabap mbiar ia nandangi si erpengakap maka sunat e penting tuhu-tuhu.
13 Senina-senina kalak Jahudi si deban e pe ikut pekulah-kulah, bali ras Petrus, janah Barnabas pe ikut ipengaruhina pekulah-kulah.
14 Asum kuidah maka perbahanenna la rikutken Berita Si Mehuli, ngerana aku man Petrus i lebe-lebe jelma si nterem e kerina, "Kam kalak Jahudi, tapi piga-piga wari si nggo lepas pergeluhndu bagi pergeluh kalak si labo kalak Jahudi. Dage, kuga nge nindu maksaken kalak si labo kalak Jahudi nggeluh bagi pergeluh kalak Jahudi?"
15 Tuhu, rikutken pertubuh kami, kami kalak Jahudi, janah la kami kalak si semal igelari: "kalak perbegu si perdosa".
16 Tapi amin bage gia ieteh kami maka manusia rembak ras Dibata, arah erkiniteken man Jesus Kristus ngenca, la arah ndalanken Undang-undang. Kami pe nggo tek man Kristus Jesus gelah iperembakken kami ras Dibata arah kiniteken man Kristus, janah labo arah ndalanken Undang-undang. Sabap labo lit sekalak pe iperembakken ras Dibata arah ndalanken Undang-undang.
17 Emaka iusahaken kami gelah rembak ras Dibata arah persadan ras Kristus. Erdandanken si e lit piga-pigga kalak ngataken maka kami nggo ka jadi kalak perdosa bali ras kalak perbegu. Bahanlah payo kai si ikatakenna e; adi bage Kristus kin si mabai kami gelah erdosa? Tentu lang!
18 Tapi adi mulihken ka kami ku cara ndalanken Undang-undang gelah rembak ras Dibata eme si nggo kutadingken, si e ertina maka tuhu-tuhu aku sekalak perdosa.
19 Nandangi Undang-undang e aku situhuna nggo mate, janah lanai lit sitik pe kuasa Undang-undang e nandangi aku seh maka banci aku nggeluh guna Dibata. Aku nggo ipakuken ras Kristus i kayu persilang.
20 Lanai aku si nggeluh, tapi Kristus kap si nggeluh i bas aku. Kegeluhenku si genduari i bas doni enda kugeluhken erdandanken kiniteken man Anak Dibata, si ngkelengi aku dingen ngendesken DiriNa man gunangku.
21 La ateku nia-niaken lias ate Dibata. Adi sekalak jelma banci rembak ras Dibata arah ndalanken Undang-undang, si enda ertina maka sia-sia nge kematen Kristus e!
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA