Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Empat olas taun sesampun nike, tiang lalo malik ojok Yerusalem bareng kance Barnabas dait Titus ẽndah tiang jauq.

² Tiang lalo ojok Yerusalem atas dasar wahyu lẽman Allah. Dait dalem sopoq sangkep saq husus kance pemimpin-pemimpin lẽq derike, tiang jelasang Kabar Solah saq tiang beriteang tipaq dengan-dengan saq ndẽq Yahudi. Sẽngaq tiang ndẽq mẽlẽ usahe tiang saq laẽq, atao saq mangkin, cume sie-sie.

³ Titus, saq bareng kance tiang, ie dengan Yunani, laguq ie ndẽq tepaksaq turut aturan sunat,

⁴ timaq araq dengan-dengan saq maksaq hal nike. Ie pade dengan-dengan saq tame secare tedoq-tedoq dait puraq-puraq jari semeton seiman. Ie pade tame tedoq-tedoq jari nyelidik kebẽbasan saq araq lẽq ite, sẽngaq ite araq lẽq dalem Deside Isa Almasih. Maksut ie pade milu nulakang ite lẽq keadaan saq semule sebagẽ hambe,

⁵ laguq tiang pade ndẽq mẽlẽ nyerah lẽq ie pade, sẽngaq tiang pade mẽlẽ jagaq adẽq Kabar Solah nike tetep murni tipaq side pade.

⁶ Laguq timaqne maraq nike, ndẽq araq hal-hal baru saq tetuntut lẽman tiang siq pemimpin-pemimpin nike -- umaq tiang ndẽq araq bẽdene dengan saq tehormat atao ndẽq, sẽngaq Allah ndẽq bẽde-bẽdeang dengan.

⁷ Sebalikne, ie pade ngakuq bahwe Allah sampun nugasang tiang jari beriteang Kabar Solah tipaq dengan-dengan saq ndẽq besunat, pade maraq Ie sampun nugasang Petrus jari beriteang Kabar Solah nike tipaq dengan saq besunat.

⁸ Sẽngaq Allah saq ngicanin Petrus kemampuan jari rasul umaq dengan-dengan saq besunat, ngicanin ẽndah lẽq tiang kemampuan jari rasul tipaq dengan-dengan saq ndẽq besunat.

⁹ Yakub, Kepas dait Yahya, saq teanggep jari pemimpin-pemimpin jemaah, ngakuq bahwe Allah sampun ngicanin tiang rahmat-Ne. Make ie pade besalaman kance Barnabas dait tiang sebagẽ tande persahabatan. Beterus ie pade dait tiang pade setuju bahwe tiang pade gen begawẽan lẽq antare dengan-dengan saq ndẽq besunat, dait ie pade lẽq antare dengan-dengan saq besunat.

¹⁰ Sopoq-sopoqne petunasan ie pade adẽq tiang pade merhatiang dengan miskin. Dait tiang malahan seneng ngelaksaneang hal nike.

¹¹ Sewaktu Petrus dateng ojok Antiokia, tiang nentang ie secare terang-terangan, sẽngaq ie salaq.

¹² Penembẽqne ie tokol bekelor bareng kance dengan-dengan saq ndẽq besunat. Laguq sesampun dengan-dengan utusan Yakub dateng, ie jaoqang diriqne lẽman semeton-semeton saq ndẽq besunat dait ndẽqne mẽlẽ malik bekelor kance ie pade, sẽngaq takut lẽq dengan-dengan saq mẽlẽ adẽqne selapuq dengan tesunat.

¹³ Semeton-semeton Yahudi saq lain ẽndah milu-miluan munapik maraq Petrus, sehingge Barnabas ẽndah milu maraq ie pade.

¹⁴ Sewaktu tiang serioq bahwe kelakuan ie pade sampun ndẽqne sesuai malik kance kebenaran Kabar Solah nike, tiang sampẽang tipaq Petrus lẽq julun selapuq dengan saq araq lẽq derike, "Lamun side dengan Yahudi idup maraq dengan saq ndẽq kenal kance Allah dait ndẽqne idup maraq dengan Yahudi, kembẽq mangkin side mẽlẽ maksaq semeton-semeton saq ndẽq besunat jari idup maraq dengan Yahudi?"

¹⁵ Menurut keturunan, tiang pade mule dengan Yahudi dait ndẽqne "dengan bedose lẽman bangse-bangse lain".

¹⁶ Timaq maraq nike tiang pade nenaoq bahwe dengan tejariang kenaq lẽq arepan Allah sehingge hubunganne kance Allah jari solah malik cume lantaran percaye lẽq Deside Isa Almasih, dait ndẽqne lantaran ngelaksaneang Hukum Taurat. Tiang pade ẽndah percaye lẽq Deside Isa Almasih, adẽq hubungan tiang pade kance Allah jari solah malik langan iman tiang pade lẽq dalem Almasih, ndẽqne lantaran tiang pade ngelaksaneang Hukum Taurat. Sẽngaq siq care ngelaksaneang Hukum Taurat, ndẽq araq sopoq dengan juaq saq bau miaq hubunganne kance Allah jari solah malik.

¹⁷ Tiang pade berusahe adẽq tiang pade tejariang kenaq lẽq arepan Allah sehingge hubungan tiang pade kance Allah jari solah malik langan idup lẽq dalem Almasih. Laguq lamun sesampun ngelaksaneang maraq nike, ternyate tiang pade tetep "dengan-dengan bedose" ẽndah maraq dengan-dengan saq ndẽq Yahudi, napi niki artine Almasih saq jari penyebap tiang pade bedose? Pasti ndẽqne maraq nike!

¹⁸ Lamun tiang mulai ngaraqang malik pengajahan Hukum Taurat saq sampun tiang sẽdaq, make tiang nyatayang bahwe tiang sampun ngelanggar hukum nike.

¹⁹ Laguq tiang sampun matẽ bagi Hukum Taurat -- tematẽq siq hukum nike mẽsaq -- adẽq tiang bau idup bagi Allah. Tiang sampun tepakuq lẽq kayuq salib ngiring Almasih.

²⁰ Mangkin ndẽqne malik tiang saq idup, laguq Almasih saq idup lẽq dalem diriq tiang. Dait idup saq tiang alamin mangkin niki, idup siq iman tipaq Bije saq asalne lẽman Allah saq ngasihin tiang dait saq sampun ngurbanang diriq-Ne umaq tiang.

²¹ Tiang ndẽq ngerẽmẽhang rahmat Allah. Lamun dengan tejariang kenaq lẽq arepan Allah sehingge hubunganne kance Allah jari solah malik lantaran ngelaksaneang Hukum Taurat, nike artine ninggalne Almasih ndẽq araq manpaatne!

Galatia

Video Galatia 2

Ikuti Kami:

KONTAK | PARTISIPASI | DONASI