Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Oto pasat pulu epat ngarura burúnia, toili aku ka Jerusalem sambamai tai Barnabas, samba akuabbit leú et si Titus.
2 Akuei geti ka Jerusalem, kalulut aipatoilá ka tubukku Taikamanua masikua, buítá mei aku sedda. Samba ka parurukatmai sikokoiakenen sambamai sauté sedda, kolouakékungan leú et pagalaiat Katuareman Simaerú sipakakrakku ka tubudda taú sipuoni tai Jahudi. Aipoí tá kuobá ipusiboboi apa sigalaiakenenku siburú samba kineneiget néné.
3 Ka sia si Titus sipaalei aku néné, tai Junani lé nia, tápoi tá atupaksaaké nia itut'aké enung pususunat,
4 kenanen baí ai sia sipasiroron'aké nganganda ka tubunia. Iaté sia sipagalú tubunia ka mungkuatta samba sipakau tubunia kelé sarainanta. Sipinalipput lé araoi ka tubutta masitaiko puujaat siooi ka tubutta kalulut atapusara ka tubut Jesus Kristus. Ai lé poí rabebesíaké ratoiliaké sita mitsá mupagugulet kelé ka siburú.
5 Tápoi bulat beri goisó tá akukalaaké kai tubumai ka tubudda, kalulut kujago kai bulé imamurni isegé ka tubumui Katuareman Simaerú néné.
6 Tápoi kenanen kisedda, tá anai besíakenenda sibau sibara ka tubukku, ka sia oniakenen siabeu tiboi tubu néné, aipoí kaku, tá anai baggeinia, elé abeu pá tiboi tubudda elé tá, ka sia poí Taikamanua, tá irarasei sirimanuania.
7 Tápoi bailoknia mitsá, sia oniakenen siabeu tiboi tubu araakuian pauuddetna aku Taikamanua masipaarep Katuareman Simaerú ka tubudda taú sipuoni tai Jahudi, kelé aipauddet nia ka sia si Petrus masipaarep Katuareman Simaerú ka tubudda tai Jahudi.
8 Aipoí aikauan Taikamanua ka tubut Petrus puaagai, bulé ibaliu nia apostelda tai Jahudi, oto nia leú te amasiaké ka tubukku kaku puaagai bailiu apostelda taú sipuoni tai Jahudi.
9 Beringan ka sia si Jakobus, si Petrus sambat si Johannes, siagaita kelé siutéaké paamian leú et, araakuian aakéna ka tubukku kaku Taikamanua, pasikelat sikokoiakenen néné. Bulat pat salamrangan kai ruamai si Barnabas sambat aku leú et kaku, kelé sara toggaiat pasuruanganmai. Oto pakerénangan bagamai sambamai, sia sambat kai néné, bulé kai ka kai mugalai ka talagat bangsadda taú sipuoni tai Jahudi, tápoi sia geti ka sia, iaté ka talagadda tai Jahudi.
10 Tápoi bulat araron'aké nganganda rakua ka matamai, bulé kupasikeli kai sia simagebá. Paobánangan pei bagei, kaku néné, bulat maangká bagakku masigalaiaké kelé nenda.
11 Iageti kelé aioi si Patrus ka Antiokia, bulat lawankungan nia sipatutuggut mata, kalulut sele sigalainia.
12 Panandaatnia poí, iobá pataddé mukom ka tubuda sasaraina taú sipuoni tai Jahudi. Tápoi kelé arasegé sikoiniakenen Jakobus, tik-tiknangan tubunia ka tubudda taú sipuoni tai Jahudi, sambat táan iobá pataddé mukom ka tubudda sasaraina taú sipuoni tai Jahudi, kalulut lotónia ka tubudda siobá masikua bulé tusunat lé sia sangamberi sirimanua.
13 Beri leú et ka sia tai Jahudi sabagei, kisedda leú et pupatajuanan tubudda kelé kai Petrus, pat tut'akénangan nia ka sia si Barnabas mugalai tubu kelé galai tubudda ka sia néné.
14 Bulat kelé akuitsó nia galai tubudda néné, tá paaakkup nia ka siripokat enungan katuroipoat Katuareman Simaerú, kuakkungan nia ka matat Petrus, ka talagat sirimanua simigi siparururú sedda, "Ké beringan kam leú et ka kam alé Sasaraina sipuoni tai Jahudi, anukauan kam tubumui kéan lé taú tai Jahudi, angoian lé nupapaksaaké kam sia sabagei, bulé rapugalai tubu kelé galai tubudda tai Jahudi?"
15 Kirénangan tedda siripot ka pusirimanuaat, kai néné tai Jahudi lé kai, tá sipuoni "tá tai Jahudi, oniakenen sirimanua sijo".
16 Tápoi kenanen kisedda, ai lé kuaagai kai, arapaerú mitsá sirimanua ka tubut Taikamanua, sarat kalulut tonem baga ka tubut Jesus Kristus lé, tá kalulut pasigagalaiaké enung surukat arat. Beri kai leú et ka kai, matonem bagamai ka tubut Kristus, bulé kupaerú kai mitsá ka tubut Taikamanua sibara ka tonem bagamai néné, tá kalulut pasigagalaiakémai surukat arat. Aipoí bulat beri te sia sara momoi paerú mitsá ka tubut Taikamanua, ké kalulut pasigagalaiakéra surukat arat.
17 Oto bulat aikubebesíaké kai paerú mitsá ka tubut Taikamanua kapasitatabbraakémai tubumai ka tubut Kristus. Tápoi lepá akugalaiaké kai nia kelé néné, matotoilá peilé kai néné, "sirimanua sijo" kelé sia leú et taú sipuoni tai Jahudi, tá pá néné takukua Kristus'an lé ikakau kai majo? Bulatnia tá!
18 Ké kurióaké mitsá enung surukat sipakataíku néné, akupatoiláan paapakku nia surukat.
19 Tápoi amateian aku ka surukat arat, aimateiaké aku surukat nenda, bulé ioi kupurimanua ka tubut Taikamanua. Atupattáakéan aku ka siliktenga sambat Kristus.
20 Oto kineneiget, táan aku muririmanua ka tubukku néné, tápoi Kristus'an lé. Puririmanua siparimanuaakenenku kineneiget, iaté puririmanua ka putotonem baga ka tubut Togat Taikamanua, sipununtuki aku baga, samba sipasibubuluaké tubunia kalulut aku.
21 Oto tá kupulalabbei panguruat katet bagat Taikamanua néné. Aipoí ké baí kalulut pasigagalaiaké surukat arat lé imaeerú mitsá patabbaratta ka tubut Taikamanua, oto tá anai lulunia kamamatei Kristus néné!
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA