Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Naliu sapulu pata-mpae, sangganipa vai yaku hau ri ngata Yerusalem nosanggani ante i Barnabas. Bo nikeniku muni i Titus.

² Yaku hau ri Yerusalem sabana naria tesa nu Alatala nombatudu yaku hau. Nakavapa hamai, yaku aga nasiromu ante pakeni-pakeni ntodea topomparasaya, bo nipopaisaniku ka ira isi Kareba Belo anu nipatoleleku ka tona ledo toYahudi. Nakini raraku mbelaka rasalaira pepatudukiku sampe domo maria gunana pokarajaaku mompatolele Kareba Belo, nau anu nipoviaku bara ipia, atau anu da nipoviaku sii-sii.

³ Tano ira nasituju nte pepatudukiku. Haitu nisaniku sabana i Titus, toYunani anu nosanggani ante yaku hamai, ledo nipasuura *rasuna.

⁴ Tapi naria tona ntanina madota mompasuu i Titus rasuna, nangoseaka atura agama Yahudi. Panguli ntona haitu, ira topomparasaya i Kristus, tano aga davara. Ira nesua nggalino-lino ri kasiromu kami bo nomata-matai kami. Patujura ala pura-pura topomparasaya matundu nte atura-atura agama Yahudi. Tapi kita ledo paraluu matundu nte atura-atura haitu ala majadi manoa ri panggita nu Alatala. Kita nikabasaka lako ri atura haitu sabana kita nosangu rara ante i Yesus Kristus.

⁵ Kami ledo ntoto natundu nte pepatudukira, nau aga sampalai. Nitidamaka kami ala Kareba Belo ledo ragalo nte pepatudukira nasala, bo ala Kareba Belo nitarimamiu mpuu-mpuu nakana.

⁶ Jadi pakeni-pakeni ntodea topomparasaya anu nireke nalanga nturora nasituju ante Kareba Belo nipatoleleku. (Nau nalanga panggana nau ledo, nasimbayu ri panggitaku, sabana Alatala ledo nompelenje.) Ledo ria nuapa-nuapa nitambaira ka Kareba haitu.

⁷ Tapi nisaniramo yaku niparasaya nu Alatala manggeni Kareba Belo ka tona ledo toYahudi, nasimbayu mpo i Petrus niparasaya nu Alatala manggeni Kareba Belo ka *toYahudi.

⁸ Alatala nombadekei pompakule ka i Petrus majadi suro ka toYahudi, bo Ia muni nombadekei pompakule ka yaku majadi suro ka tona ledo toYahudi.

⁹ I Yakobus, i Petrus bo i Yohanes, nireke pakeni ntodea topomparasaya i Yesus ri Yerusalem. Nikitara Alatala nombadekei pokarajaa nabelo ka yaku, haitumo majadi suroNa. Jadi ira nosijoko pale ante kami bo i Barnabas. Haitumo tandana kami pura-pura roa sampobago nanggeni Kareba Belo. Kami pura-pura nasituju ala kami bo i Barnabas manggeni Kareba Belo ka tona ledo toYahudi bo ira manggeni Kareba Belo ka toYahudi.

¹⁰ Aga sangaya niperapira, haitumo ala kami ledo menonto mantulungi tona napakasi. Bo haitumo bago nipooge raraku bo nipoviaku mpuu-mpuu.

¹¹ Tempo i Petrus nakava ri ngata Antiokhia bara ipia, nionteakaku nggamata-mata ia sabana pokaingguna hamai mpuu-mpuu nasala.

¹² Bara ipia ia ledo nompoposisala toYahudi ante tona ledo toYahudi. Ia nangande nosanggani-nggani ante sampesuvuta sampomparasaya ledo toYahudi. Naupu sia, nakavamo bara sako-ndua roa i Yakobus lako ri Yerusalem. Iramo toYahudi anu nomparasaya i Yesus. Pangulira topomparasaya i Yesus kana rasuna nangoseaka atura agama Yahudi. Nakavapa ira, domo nipeili i Petrus topomparasaya anu ledo toYahudi. Domo nabia ia nangande nosanggani-nggani ante ira, apa naeka ia rasalai ntopomparasaya toYahudi dako nakava haitu.

¹³ Bo topomparasaya ntoYahudi ntanina nompasiala pokainggu i Petrus muni nau nisanira ledo masipato. Sampe nau i Barnabas mboto natekeni nangoseaka pokainggura haitu.

¹⁴ Tapi nikitaku pokainggura haitu ledo nosinggambela ante pepatuduki nakana lako ri Kareba Belo. Haitu sampe nionteakaku i Petrus ri ngayora pura-pura ivei: "Komiu toYahudi, tapi komiu mboto nabiasa natuvu mpo tona ledo toYahudi, komiu domo paraluu mangoseaka ada ntoYahudi. Jadi rapokuya rapasuukamiu tona ledo toYahudi mangoseaka ada ntoYahudi?"

¹⁵ Sampesuvu-sampesuvu, kami toYahudi mami lako ri pompoanaka kami, kami ledo mpo tona ledo toYahudi anu niuli nadosa sabana ledo nioseakara atura agama.

¹⁶ Tapi nau ivesia, nisani kami manusia nireke nanoa ri panggita nu Alatala ledo sabana nangoseaka Atura-atura agama, tapi sabana pomparasayara i Yesus Kristus. Jadi kami mboto nomparasaya i Yesus Kristus ala majadi manoa ri panggita nu Alatala. Kami najadi nanoa sabana pomparasaya kami i Kristus, ledo sabana nangoseaka Atura-atura agama! Apa ledo ria saitoa majadi manoa ri panggita nu Alatala sabana pangoseakara Atura-atura agama.

¹⁷ Jadi, ane kami toYahudi manjarumaka majadi manoa ri panggita nu Alatala lako ri posangu rara kami ante i Yesus Kristus, batuana kami domo nanjarumaka Atura agama. Bo ane kami domo nanjarumaka Atura agama, batuana kami najadi nasimbayu mpo tona ledo toYahudi anu niuli nadosa sabana ledo nioseakara Atura agama. Jadi berimbamo? Mamala raulita i Kristus nanggeni kami majadi nadosa? Natantu ledo!

¹⁸ Ane rapana yaku manjili manjarumaka Atura agama anu nikabasakakumo, tantu yaku nombaliunaka Atura haitu!

¹⁹ Apa lako ri Atura agama sampe nisaniku ledo kupakule majadi manoa ri panggita nu Alatala ante nangoseaka Atura haitu. Jadi sabana haitu, sii-sii yaku nenontomo nanjarumaka Atura agama ala yaku mamala mpuu-mpuu matuvu nangoseaka dota nu Alatala. Tempo i Kristus namate ri *kayu salib, yaku muni nireke namate nosanggani-nggani ante Ia.

²⁰ Jadi namala rauli ivei: nau yaku natuvu, domo aga yaku saitoku natuvu, tapi i Kristus natuvu riara nggatuvuku. Bo ri katuvuku ri dunia hitu, yaku natuvu mpuu-mpuu nomparasaya Ana nu Alatala anu nompotove yaku bo nombadekei karoNa rapatesi manjambei yaku.

²¹ Yaku ledo nompoara kabelo rara nu Alatala haitu. Apa ane rapana kita mamala majadi manoa ri panggita nu Alatala ante mangoseaka Atura agama, tantumo kamate i Yesus Kristus ledo maria gunana!

Galatia

Video Galatia 2

Ikuti Kami:

KONTAK | PARTISIPASI | DONASI