Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Fele'õfa fakhe furi õ, mangawuli ndra'o ba Yeruzalema, awõ Mbaranaba, ba u'ohe gõi awõgu Dito andrõ.
2 Mõi ndra'o ba Yeruzalema, bõrõ me no Ifa'ele'õ khõgu Lowalangi, wa si lõ tola lõ mõi ndra'o. Ba walukhata khõ ndra sondrõnia'õ si so ba da'õ, ubotokhi khõra Duria Somuso Dõdõ andrõ si no u'ombakha'õ ba niha si tenga niha Yahudi. Lõ omasi ndra'o na halõw̃õgu fõna, he gõi halõw̃õgu iada'e tobali zayazaya gõlõ.
3 Tito andrõ awõgu, no niha Yunani, lõ mu'o'ou ia ba wolo'õ famoto,
4 hew̃a'ae so niha zangõhõndrõgõ sibai da'õ. Niha andrõ no samasoli ya'ira ba gorahuada, ba sanguma'õ talifusõ ira. Lafasoli ira ba gorahuada, ya'ia ba wamareso fangefa andrõ si no tasõndra, bõrõ me ha sambua ita ba khõ Keriso Yesu. Omasi ira lafangawuli ita ba lagu fõna si mane sawuyu.
5 Ba ma'ifu lõ alulu dõdõma khõra, bõrõ omasiga marorogõ Duria Somuso Dõdõ, ni'amoni'õ ba khõmi.
6 Hew̃a'ae si manõ, lõ hadõi ngawalõ zi bohou ni'andrõ khõgu moroi khõ ndra si so tõi na dali wa'aniha -- me molo'õ ya'o, lõ hadõi amaehuta zi so tõi faoma si lõ tõi, bõrõ me lõ Ifaigi mbawa niha Lowalangi.
7 Ba zi tambai da'õ, niha si so tõi andrõ lafaduhu'õ wa no Ifohalõw̃õ ndra'o Lowalangi ba wangombakha Turia Somuso Dõdõ ba niha baero, si mane si no Ifohalõw̃õ Fetero ba wangombakha Turia Somuso Dõdõ andrõ ba niha Yahudi.
8 Lowalangi zi no mame'e fa'abõlõ khõ Wetero ba halõw̃õ tobali sinenge andrõ ba niha Yahudi, da'õ gõi zame'e khõgu fa'abõlõ ba halõw̃õ tobali sinenge ba niha baero.
9 Yakobo, Fetero ba Yohane, si no amaedola zondrõnia'õ mbanua Niha Keriso, aboto ba dõdõra wa Lowalangi zi no mame'e khõgu halõw̃õ da'e. Ba fara'u tanga ira khõ Mbaranaba ba ba khõgu, tandra wa'atalifusõta. Ya'ira ba ya'aga faoma fatehe dõdõma, wa ya'aga zohalõw̃õ ba gotalua soi niha baero, ba ya'ira ba gotalua niha Yahudi.
10 So zabõlõ la'andrõ khõma, ya'ia ena'õ bõi olifu ndra'aga zi numana. Ba omuso sibai dõdõgu, me somasido sibai wamalua halõw̃õ da'õ.
11 Me mõi ba Gandriokhia Wetero, ba no utegu ia, bõrõ me lõ atulõ wolaunia.
12 Ba mbõrõta, orudu manga ia ba dalifusõ si no niha baero. Ba me no so niha andrõ nifatenge Yakobo, ba iheta ia ba dalifusõ niha baero andrõ; lõ sa'ae omasi ia orudu manga khõra, bõrõ me ata'u ia niha sanguma'õ, wa niha baero lõ tola lõ laboto.
13 Ba talifusõ niha Yahudi tanõ bõ'õ, fao gõi mamini tõdõ si mane Fetero, irege adõni gõi Mbaranaba ba wamini tõdõ si mane ya'ira.
14 Ba me u'ila wa lõ sõkhi wolaura, lõ faudu ba Duria Somuso Dõdõ andrõ, ba muhededo khõ Wetero fõna niha si so ba da'õ fefu, "Na ya'ugõ niha Yahudi no õ'o'õ lala wa'auri si mane niha si tenga niha Yahudi, ba hana wa õfaso niha bõ'õ ba wolo'õ si mane niha Yahudi?"
15 Duhu molo'õ ba wa'atumbu, no niha Yahudi ndra'aga, ba tenga gõi, "niha si tenga niha Yahudi si so horõ".
16 Hew̃a'ae si manõ, ba aboto ba dõdõma wa atulõ niha khõ Lowalangi, tenga bõrõ ba wolo'õ huku agama (oroisa), ha ba wamati khõ Yesu Keriso. Mamati ndra'aga khõ Yesu Keriso, ena'õ atulõ ndra'aga khõ Lowalangi, bõrõ me famatima andrõ, tenga bõrõ wa ma'o'õ huku agama. Samõsa lõ satulõ niha khõ Lowalangi, bõrõ wolo'õ huku agama.
17 Ba wa ha sambua khõ Keriso, mohalõw̃õ ndra'aga, ena'õ atulõ ndra'aga khõ Lowalangi. Ba na no aefa mafalua zi manõ, ba oroma nasa ndra'aga wa "niha si so horõ" gõi si mane niha baero, hadia Keriso mbõrõ wa niha si so horõ ndra'aga me si manõ? Tenga si manõ!
18 Na ufuli sa ufazõkhi huku agama si no ududugõ, ba tobali solalõ ndra'o, no ufalua zi lõ atulõ.
19 Ba no mate ndra'o, ba huku agama andrõ -- ena'õ khõ Lowalangi auri ndra'o. No muforõfa ndra'o awõ Keriso.
20 Ba sauri iada'e tenga sa'ae ya'o, no Keriso zauri ba khõgu. Ba fa'aurigu iada'e, ba fa'auri ba wamati khõ Nono Lowalangi, si no mangomasi'õ ya'o, ba si no mame'e Ya'ia salahigu.
21 Lõ u'aohasi wa'ebua dõdõ Lowalangi andrõ. Na bõrõ wolo'õ huku agama, wa tola atulõ niha khõ Lowalangi, ba no tobali zayazaya gõlõ wa no mate Keriso!
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA