Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nori, nindi hisaruk lit pen hisa wale ulug nindi wenggel haruk lahi. Hit an naliliyangge hag toho welahepma hit fahet an nahiyeg haruk lahi. Nori, Nonowe fam hinindi wirik toho wenggel haruk lit welamuhup.
2 Euodia men Sintikhe menen Nonowe ubam hinindimu wenggel haruk lit hinindi misig toho welamuhup ulug komo heneptuk lahi.
3 Nare Sunsugos, hat hindi fano roho wenggel haruk lahenon aruwen hiyap piren aruma let eneptuk lit welaruhun ulug hubam uruk lahi. It piren itanowen wene fahet sat toho yami ruruk lit an oho let naptuk latusa. Hun Klemens ino men nonori winon men yabuk ambi roho turuk latukukon arimano An men mondabi nonoluk welamuhuk ulug ununuk Allahn haharoho foroho lit wereg.
4 Likiya hupmu Ninikni Allah fam wenggel haruk lit henehiyeg toho welamuhup. Uruk lahiyon aru nin eke pirenam imin: Henehiyeg toho welamuhup.
5 Hunubabut fano roho weregma ap winon obog toho arimanowen yet hisaruk lamuhup. Nonowe horogma waharuk.
6 Mun angge man angge fahet hinindi anggin toho wenggel haruk lit welamuhup fug. Henesehet teg halug Allah fam sembahyang uruk lit heng turuk lamuhup. Heng turuk lit Allah fam Ninikni uruk lamuhup.
7 Allah ninindi yuwahap neneptukon ino fahet nit ap kinangmonen ninindi anggat teg lahe uk fug teg. Ari uk fug teg angge famen Yesus Kristus fam hinindi wenggel haruk lit fano roho welamuhuben Aren fet henesug laruhu.
8 Nori, obog toho hiyag hisihireg atogma tot hiyag hisamin: Tem toho peruk ane men fano atuk ane men pikir ane tehe perukon men Allahn peruk ane tebehe perukon men aben fano tehesa perukon men henele fano-fano ane uruk lahebon men ihiyon aru obog toho fahet hinindimu wenggel haruk lamuhup. Allahn fano perukon eneg senetuk lamuhup.
9 Anden hiyag hisarikikmu senetikibon ari eneg turuk lamuhup. Anden urukmu holtikibon eneg hiyag isaruk lamuhup. Anden turukmu niyarikibon eneg turuk lamuhup. Ari turuk lamuhupmu Ninikni Allah ninindi yuwahap neneptukon inowen fet henesug laruhu.
10 Hiren atam an nubahet emberuk latikip hag toho ketiya oho hinindi fam emberuk lahepma Nonowe fahet emberuk ulug nahiyeg toho welahi. Atam hinindimuwen imbila peruk latikip angge famen umbuk fug teg latikip.
11 Uruk lahi ane aru suburu elegma uruk lahi fug. Suburu elegma oho weregma oho we fano eneg peruk lahi.
12 Suburu weregma na reg lahi, elegma hinik welam teg lahi. Suburu elegma oho weregma oho obok teg lir oho nalug oho obog toho ihi ane aru misig oho nubam atisi fuhon wereg eleg.
13 Kristus inowen nineyap naptukmu siyahon fanowon obog toho nubam atuk angge famen we welam teg lahi.
14 We welam teg lahi angge famen hat siyag toho welahen ulug tot emberikibon ari fano emberikip.
15 Hit Filipi hinap nori, wene hiyag isaruk ane ak teberikik sambilen hit o Makedonia hunumbahalug larikikmu hiren eneg an let naptuk lit og nereheg turuk lit ayeg waroho hilaruk latikip ane ari hit honoluk.
16 An o Tesalonika weregma hiren pirenam hinahanam an let naptikip.
17 Nin uang numbahakup ulug uruk lahi fug. Anggen fanowon yihik fuhup ane ariyen hit palimu amuhuben uruk lahi.
18 Hiren emberikibon ari Epafroditus inowen an og nirik waharisimu andog toho anggolo foroho lahi, nasehet eleg toho welahi. Hiren emberikibon ari Allah anggengge hag toho emberikipmu Ahiyeg harisireg amben fano peruk.
19 Hit henenggengge eleg angge welahepma Nikni Allah mun angge man angge forohowon inowen sebe roho og hisaruk laruhu. Og hisaruk laruhuwen hiren Yesus Kristus wel turuk lamuhup.
20 Ninikni Allah ap obohen wel turukmen eneg welamuhup. Amin.
21 Allah umalikisi Yesus Kristus fam wenggel harukon wal taneg nori ulug hi enebuhup. An nori an men tuma werehonen hit fahet nori ulug hi heneptuk.
22 Allah umalikisi obog tohowen hi heneptuk lit Kaisar ibam werehon oho hit fahet nori ulug hi heneptuk.
23 Nonowe Yesus Kristus inowen Indi henesug lit fet henesug laruhu ulug Allah fam sembahyang uruk lahi.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA