Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ngaceku ineh, O kinanak-kinanakku luk inanku mawa, idi luk inanku geregan, idi luk mangun ku awangku idi pataku, idi bang luk kudeng ineh do' muyuh lutep bang Tuhan, O luk inanku mawa.
2 Ui mutuh Yodia idi ui mutuh Sintiki teh, mangun ku sebuleng niat bang Tuhan.
3 Meluun teh kuanmu pana', O lun denganku luk matu, ui mutuh namu ngedengan nedidueh luk decur ineh, luk pangeh pad-pad nerur denganku bang kekamen mada' Bala luk Do' pad-pad dengan Klemen teh, idi amung-amung lun denganku luk baken-baken teh, luk pangeh inayud ngadandeh bang surat ulun Allah.
4 Do' muyuh mulai niat bang Tuhan anid-anid kareb, idi sekua' teh ui pebala kuan muyuh: do' muyuh mawang niat.
5 Do' muyuh mebeneh niat siren amung-amung lemulun. Idi Tuhan lélé macing.
6 Aleg muyuh merapang ratnan anun-anun, iamo' bang luk amung-amung do' amung-amung pian muyuh uen ngegala' kuan Allah, bang sembayang idi putuh dengan maré ubur.
7 Idi awang ratnan Allah luk meluun rayeh ratnan amung-amung ileh lemulun miak matar niat muyuh idi terawé muyuh bang Yésus Keristus.
8 Kekipedneh, O kinanak-kinanakku, anun-anun luk do', luk buren, luk matu, luk rayeh, luk mesiri, luk meligan, luk meluun do', idi luk petulu buren, ineh luk miak teruayen muyuh.
9 Do' maya' anun-anun luk inan muyuh nesibada' idi luk ilap muyuh rat negku, do' ratnan balaku idi kekamenku pana'. Idi Allah luk lawa amung-amung awang miak ngedengan nemuyuh.
10 Iamo' ui pelaba awang niat bang Tuhan ngaceku bang tuda'-tuda' ioneh idi muyuh nengerawé negku teh; matu pana' atun muyuh ngerawé ratnan ineh, iamo' na luk idi kareb muyuh miak ngedengan negku.
11 Baken ui pebala kudeng ini ngaceku ratnan asi', ngaceku ui pangeh nesibada' bang lawé anun-anun pana' ui ngalap awang niat mo'.
12 Ui pangeh nekali' ratnan masi' idi mela teh. Ui pangeh nesibada', iapeh-iapeh pana', bang anid-anid kareb, ieh ineh kareb mebor idi melau, kareb petap idi kareb masi', ui mawang niat.
13 Ui miak nganau' luk amung-amung ngaceku Keristus luk ngetueh negku.
14 Iamo' muyuh pangeh nenganau' luk do' idi nengedengan negku bang derehku.
15 Idi muyuh sebuleng pana' pangeh kali' teh, O lun Pilipi, idi kareb Bala luk Do' ineh pun-pun bida', kareb pun ui neremuat rat Makedonia, idi sebuleng sidang pana' na sikal perurum denganku ratnan maré idi ratnan ngalap pana', iamo' muyuh sebuleng mo'.
16 Ngaceku kareb ui déi' Tesalonika muyuh pangeh nemaré tuda'-tuda' kua' bang kareb ui masi'.
17 Idi baken barve ini luk tekapenku, iamo' ui nakap bua'-bua' luk mangun ku peruan muyuh.
18 Ui pangeh nengalap amung-amung ineh, idi teh, meluun ratnan luk petap. Idi ui pangeh nengalap mela ngaceku ui nengalap rat ni Epaproditus amung baré muyuh. Baré ineh mangun ku aceh buen luk do' idi baré luk pian idi luk petulu dengan Allah.
19 Idi Tuhanku miak nganau' petap ratnan amung-amung asi' muyuh maya' do'Neh dengan rayehNeh bang Keristus Yésus.
20 Idi rayeh kuan Allah, ieh ineh Taman tau macing ruked-ruked! Amin.
21 Do' ngacing tabi'ku kuan amung-amung lun manu luk bang Keristus Yésus. Idi tabi' kuan muyuh ratnan kinanak luk pad-pad denganku.
22 Tabi' kuan muyuh rat nelun manu' pun-pun rat nelun bang ruma' raca' Rum.
23 Idi do' katu Tuhan tau Yésus Keristus ngedengan roh muyuh.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA