Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Keranaq nike, semeton-semeton tiang saq tiang kasihin dait saq tiang kangen, saq jari sukecite dait mahkote tiang, side pade harus tetep teguq lẽq dalem Tuhan!

² Tiang tunas tipaq Euodia dait Sintike adẽq ie pade sopoq angen dait sopoq pikiran lẽq dalem Tuhan.

³ Tipaq batur tiang saq setie, tiang tunas adẽq side tulung semeton-semeton nike. Deduaqne sampun lelah begawẽan bareng kance tiang jari beriteang Kabar Solah lẽman Allah; pade maraq Klẽmen dait selapuq dengan lainne saq begawẽan bareng kance tiang. Aran-aran ie pade araq tetulis lẽq dalem Kitab Kehidupan.

⁴ Semoge side pade tetep besukecite lẽq dalem Tuhan. Karing sekali tiang ucapang: Pade besukecite!

⁵ Kelakuande saq solah harus teserioq siq selapuq dengan: Sẽngaq ndẽqne ngonẽq malik Tuhan gen rauh.

⁶ Ndaq side pade kuatir lẽq napi juaq. Laguq nyatayang tipaq Allah selapuq hal saq side melẽtang dalem do'e dait petunasan siq ucapan syukur.

⁷ Damẽ sejahtere lẽman Allah saq ndẽqne tepahamin siq pikiran manusie, gen meliharaq atẽ dait pikirande lẽq dalem Deside Isa Almasih.

⁸ Ahirne, semeton senamian, pikirang selapuq saq kenaq, selapuq saq mulie, selapuq saq adil, selapuq saq suci, selapuq saq solah, selapuq saq maiq tedengah, selapuq saq tesebut kebajikan dait patut tepuji, pikirang selapuqne nike.

⁹ Laksaneang napi saq side pade perajahin, terimaq, dengah dait serioq lẽman tiang. Allah sumber damẽ sejahtere, gen araq bareng kance side pade.

¹⁰ Tiang sanget besukecite lẽq dalem Tuhan, sẽngaq sesampun bẽgaq ngonẽq, baruq mangkin niki pikiran dait perasaan side pade araq malik tipaq tiang. Perhatian side mule tetep araq, laguq side pade ndẽq araq kesempatan.

¹¹ Hal niki tiang sampẽang ndẽqne lantaran tiang kekurangan, sẽngaq tiang sampun berajah cukupang diriq tiang siq napi saq araq.

¹² Tiang sampun ngalamin idup kekurangan, dait ẽndah idup saq belebihan. Tiang sampun nenaoq rahasiene ngadepin keadaan napi juaq; timaq nike keadaan makmur atao keadaan miskin, keadaan mẽwah atao saq kekurangan.

¹³ Segale macem keadaan bau tiang hadepin siq kekuatan saq teicanin siq Almasih tipaq tiang.

¹⁴ Laguq napi saq side pade laksaneang nike mule solah, bahwe side pade sampun nulung tiang lẽq waktu tiang susah.

¹⁵ Side pade dengan Pilipi! Side mẽsaq nenaoq bahwe laẽq sewaktu tiang bilin Makedonia, sewaktu Kabar Solah nike tiang beriteang penembẽqne, side pade sopoq-sopoqne jemaah saq nulung tiang; side pade sopoq-sopoqne saq milu merase untung dait rugi idup bareng tiang.

¹⁶ Sewaktu tiang lẽq Tesalonika dait merluang bantuan, lebih lẽman sekali side pade sampun ngirim bantuan tipaq tiang.

¹⁷ Nike ndẽqne berarti tiang cume mẽlẽ nerimaq bantuan. Saq tiang melẽtang adẽq tiang mauq serioq hasil-hasil saq ngeromboq keuntungande.

¹⁸ Tiang sampun nerimaq selapuqne -- malahan jangke limpah! Selapuq bantuan saq side pade kirim tipaq tiang, sampun tiang terimaq lẽman Epaproditus. Bantuan-bantuan lẽman side pade nike maraq sopoq persembahan saq sengẽh, sopoq kurban saq nyenengang Allah dait teterimaq siq Allah.

¹⁹ Allah tiang gen cukupang selapuq keperluande menurut kesugihan dait kemuliean-Ne lẽq dalem Deside Isa Almasih.

²⁰ Temulieang Allah Bapante selaẽq-laẽqne! Amin.

²¹ Sampẽang salam tiang tipaq selapuq dengan saq tehususang bagi Allah lẽq dalem Deside Isa Almasih. Dait terimaq ẽndah salam lẽman semeton-semeton saq araq bareng kance tiang lẽq deriki.

²² Selapuq dengan saq tehususang bagi Allah lẽq kote niki, terutame ie pade saq araq lẽq istane Kaisar, ngirim salam tipaq side pade.

²³ Rahmat lẽman Junjungan Saq Mulie Deside Isa Almasih araq bareng roh side.

Filipi

Video Filipi 4

Ikuti Kami:

KONTAK | PARTISIPASI | DONASI