Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Jadi, sampesuvu-sampesuvu nipotoveku bo nipolentoraku. Komiu mpuu-mpuu nompakadamba raraku, bo nasana mpuu raraku sabana pomparasayamiu asele pokarajaaku nompatolele Kareba Belo. Nantora anu niuliku pangane, nee molengga-lengga momparasaya bo mangoseaka i Pue Yesus.

² Sampesuvuku i Euodia bo sampesuvuku i Sintike, yaku mpuu-mpuu merapi ala komiu mosangu rara evamo masipato ka topomparasaya i Pue Yesus.

³ Bo kuperapi muni nte vega rapaku i Sunsugos, tulungimo mombine randua pangane ala ira mosangu rara mpanjili. Ira nokarajaa ntamo ante yaku nompatolele Kareba Belo nasimbayu mpo i Klemens bo roa-roaku ntanina sampokarajaa. Sangara pura nitulisi riara Buku Katuvua, anu nompakatantu isema masipato matuvu mabelo sampe ri kasae-saena.

⁴ Sampesuvu pura-pura, kadambamo raramiu sabana komiu nosangu rara ante i Pue Yesus. Sangganipa kuuli ka komiu, kadambamo raramiu!

⁵ Kusarumaka pura-pura tona manggita kabelo raramiu. Toramo! Domo masae i Pue Yesus makava.

⁶ Nee makini raramiu riara nuapa-nuapa, tapi kenimo pura-pura riara posambayamiu. Perapimo anu niparaluumiu lako nte Alatala bo masaro manguli tarima kasi.

⁷ Bo ane radekeimiu kakini raramiu ka Alatala, radekeiNa katinonto ka komiu anu ledo rapakule nu manusia mompahana. Ia mompakatinonto raramiu bo pekirimiu sabana komiu nosangu rara ante i Yesus Kristus.

⁸ Kaupuna, sampesuvu-sampesuvu, tanondoakamo anu nakana, anu nanoa, bo anu masipato rapakaoge. Pekirikamo anu nagasa, anu nagaya, bo anu nabelo raepe ntona. Tanondoakamo anu mpuu-mpuu nabelo, bo anu masipato ratoiya.

⁹ Anu nipegurumiu bo nitarimamiu lako nte yaku, nau tesaku, nau jonjo nikitamiu riara nggatuvuku, haitumo kana rapoviamiu. Bo ane haitu rapoviamiu, Alatala momporoa komiu bo mompakatinonto raramiu.

¹⁰ Nadamba mpuu raraku nosangu rara nte i Pue Yesus sabana nau nasaemo kita nosinggavaoni, sii-sii nitulungimiu vaimo yaku. Ledo niuliku komiu ledo nantora yaku bara ipia. Nisaniku dopa ria logamiu mompakatu pedekeimiu ka yaku.

¹¹ Niuliku ivesia ledo sabana yaku napepa, apa naosamo raraku nau damo berimba katuvuku.

¹² Nisanikumo natuvu napepa bo nisaniku munimo natuvu nelabi. Nau bara nuapa najadi nte yaku, nisaniku nompakaosa raraku, nau tempo nabosu, nau tempo naara, nau yaku nelabi, nau yaku napepa.

¹³ Nipakuleku nantingayo nuapa-nuapa ante petulungi i Yesus Kristus anu nompakaroso yaku.

¹⁴ Naupa ivesia, nitulungimiu yaku riara kasusaku ri sii bo anu nipoviamiu haitu nabelo.

¹⁵ Sampesuvu-sampesuvu toFilipi, nisanimiu mbotomo tempo yaku paratama nompatolele Kareba Belo ka komiu bara ipia, bo nipalaisiku propinsi Makedonia, ledo ria topomparasaya ntanina nompakatu doi petulungi ka yaku. Aga komiu nombatande yaku bo nantulungi yaku nompapola pokarajaaku haitu.

¹⁶ Ledo aga haitu, tempo yaku da ri Makedonia ri ngata Tesalonika bo naria paraluuku, ledo aga sanggani komiu nompakatu pedekei ka yaku.

¹⁷ Yaku ledo aga madota mantarima pedekeimiu. Tapi yaku madota ala belo ratambai ka komiu lako ri poviamiu nabelo haitu.

¹⁸ Jadi, ala rasanimiu, nitarimaku puramo pedekei nipakatumiu, bo nelabi-labi! Pura-pura pedekei nipakatumiu nitarimakumo lako nte i Epafroditus. Sii-sii nagana puramo anu niparaluuku. Pedekeimiu haitu nasimbayu mpo pesomba navangi, anu nitarima nu Alatala bo nipodamba raraNa.

¹⁹ Alatala nisombaku mompakagana ka komiu pura-pura niparaluumiu lako ri kakalumanaNa anu naoge mpuu, sabana anu nipovia i Yesus Kristus.

²⁰ Jadi ratoiyata Tuamata Alatala sampe ri kasae-saena. Amin!

²¹ Pakavote tabeku ka pura-pura topomparasaya i Yesus Kristus ri situ. Bo tarima tabe lako nte sampesuvuta sampomparasaya anu naria nosanggani-nggani ante yaku ri sii.

²² Tarima muni tabe lako nte pura-pura todea nu Alatala ri ngata hitu, nelabipa ira lako ri banua Magau Mbaso Kaisar.

²³ Kuperapi Tuputa Yesus Kristus bate-batena mabelo nte komiu. Amin. Tabe lako nte kami, Paulus bo Timotius

Filipi

Video Filipi 4

Ikuti Kami:

KONTAK | PARTISIPASI | DONASI