Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Halani ai, nasiam sanina, na huhaholongi anjaha na huhasiholi, malas ni uhur bangku ampa sortalingku, sai sonin ma nasiam totap ibagas Tuhan in, nasiam hinaholongan.
2 Nasiam Oiodia ampa Sintike, hupaingat ma nasiam marsada ni uhur ibagas Tuhan in.
3 Anjaha hupindo homa bamu, ham hasomanku sahorja na botul, urupi ma parinangon in, in ma hasomanku marporang mangkopkop Ambilan Na Madear in, rap pakon si Klemens ampa hasomanku sahorja na legan ai, na dob ibagas buku hagoluhan in goran ni sidea.
4 Marmalas ni uhur ma nasiam tongtong ibagas Tuhan in, huulaki ma mangkatahon, marmalas ni uhur ma!
5 Habasaron nasiam ai, sihol ma talar ai bani haganup halak! Dohor do Tuhan in.
6 Ulang ma haru uhur nasiam pasal atap aha pe, tapi pabotohkon nasiam ma pangindoan nasiam bani Naibata marhasoman tonggo, elek-elek ampa tarima kasih.
7 Anjaha damei ni Naibata, na mangatasi haganup paruhuron, in ma manramotkon uhur ampa pingkiran nasiam ibagas Kristus Jesus!
8 Ambahni ai, nasiam sanina, paruhurhon nasiam ma sagala na sintong, na hormat, na pintor, na borsih, na jenges, na dear bogeion atap biak na madear atap na patut sipujion.
9 Anjaha aha na ginuruhon nasiam, na jinalo, na binogei ampa na nididah nasiam hun bangku, ai ma horjahon nasiam, anjaha Naibata Sipardamei in ma mangkasomani nasiam.
10 Malas tumang do uhurhu ibagas Tuhan in halani mangulaki use nasiam nuan mansarihon na porlu bangku. Tongtong do ipingkirhon nasiam pasal ai, tapi na so adong do hasompatan bani nasiam.
11 Seng halani hurangan ahu ase huluarhon ai, ai domma huguruhon, mangkadearhon na adong.
12 Hubotoh do manggoluh ibagas na hurang, hubotoh do ibagas na marlobih-lobih; domma ilatih ahu bani haganup, bosur pakon loheian, marlobih-lobih pakon hurangan pe.
13 Haganup do tarhorjahon ahu marhiteihon Ia, na margogohi ahu.
14 Tapi tene, dear do pambahenan nasiam in, ai itatap nasiam do hasosakanku.
15 Ai ibotoh nasiam halak Pilippi do, na so adong, sobali nasiam, kuria na hubahen hasomanku, mambahen parhiraan pasal na binere pakon na nijalo, sanggah na mamungkah mangambilankon Ambilan Na Madear in, dob na hutadingkon Makedonia,
16 ai hu Tessalonika pe domma itongos nasiam na porlu bangku sahali dua hali.
17 Sedo sibere-bere ai na hupindahi, tapi buahni ai do na hupindahi, na gabe idou bani nasiam.
18 Domma hujalo haganup anjaha marlobih-lobih do ahu. Marlobih-lobih tumang do ahu nuan, dob hujalo tinongos nasiam marhitei si Epaproditus, ai ma uap na misbou, galangan na hinamalaskon ampa hinarosuhkon ni Naibata.
19 Tapi gokan ni Naibatangku do sagala na porlu bani nasiam, domu hubani habayakon-Ni na sangap ai ibagas Kristus Jesus!
20 Anjaha hasangapon ma bani Naibata, Bapanta in, ronsi sadokah ni dokahni. Amen.
21 Padas nasiam ma hata tabi hun bangku bani ganup halak na mapansing in ibagas Kristus Jesus! Manongos tabi do homa bani nasiam sanina-sanina, na rap pakon ahu.
22 Manongos tabi do haganup halak na mapansing in bani nasiam, tarlobih ma ai na hun rumah ni kesar.
23 Idop ni uhur ni Tuhan Jesus Kristus ma mangkasomani tonduy nasiam.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA