Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Tuamai, utatku mita inta kinotabiku, kobiagbií im mo'ikow takin totu-totu'u mopirisaya ko'i Tuhan. Totok in aku'oi mokotanob ko'i monimu! Mo'ikow nion inta totok mokoḷunganga kong ginaku.
2 Ki utat naton bobay ki Euodia bo ki Sintike! Na'a in tongginaku ko'i monimu, kotobatuídon kong gina saḷaku intau inta mopirisaya ko'i Tuhan.
3 Bo po'igumonku ko'i monimu Sunsugos, yobayatku inta totok mosatia, tuḷungai im mosia, sim mosia noramijidon totok nogaid takinku nopota'au in Habar Mopia inta nongkon i Allah; mosia tua naonda bo tai Klemen bo bayongan intau inta nogaid noyotakinku. Tangoi monia tua pinaisdon kom bonu im Buk Intau Nobiag.
4 Kosanangdon ing gina monimu sin ain nopirisaya bo nobiag notobatuí takin i Tuhan. Buipa doman pogumanku: kosanangdon ing ginamu!
5 Pomayakdon makow baí ontongondon im bayongan intau in oaíidmu inta mopia ing gina. Sin diaídon mo'onggot ki Tuhan mamangoi.
6 Dona'ai molia-liaw ing ginamu kom bayongan yagi-yagi. Onukabií in aidanmu umuran posambayang bo pogumandon ko'i Allah onu in igumonmu. Onu im paraḷumu umurandon pota'au ko'i Allah bo dika mokoliong mopoyaput in sukur ko'i-Nia.
7 Daí kobiagan motompia nongkon i Allah inta diaí kodapotan raian intau, im moḷukad kong gina bo raianmu inta ain notobatuí i Kristus Yesus.
8 Na'a in simpod singogku utat mita, porai kon onu inta oyuíon im baragunanya, bo onu inta mota'au pujion, naí soaáḷ mita inta mo'itutui, inta moterhormat, inta moaídil, modarit, inta moromimit bo inta mopia.
9 Aidaidon onu inta aim binalajar bo sinarima monimu ko'inakoí; bo onu inta ain dinongog andeka inta ain inontong monimu ko'inakoí aidai intua. Daí ki Allah inta pangkoi ing kopia'an umuranbií kotaki-takin monimu.
10 Kong kobiagan inta notobatuídon i Tuhan, moḷunganga totok ing ginaku, sin umpakahbií no'onggotdon, ta'e umuranpabií norai kong ka'ada'anku. Makusudku in de'emanbií kong kinoliongandon monimu in aku'oi; umuranpabií doman kinotoropan monimu, ta'e diaídon in wakutu monimu mopo'ontong intua.
11 Mosingog in aku'oi kon nana'a, de'emanbií lantaran diaídon in onu bo onu ko'inakoí, sin nobalajar bidon in aku'oi mosukur tongaíkabií onu in oyuíon.
12 Kinorasaanku bidon naonda in aka kodaitan bo naonda in aka kalebean. Kinota'auanku bidon in rahasia tumayow kon naíondakabií ing ka'ada'an; ka'ada'an kobiagan mo'oyuíon andeka ka'ada'an mobogaí, ka'ada'an bayongan yagi-yagi oyuíon ande ka'ada'an kodaitan.
13 Kawasa inta inogoi i Kristus ko'inakoí umuran mobogoi ing kakuatan ko'inakoí tumayow kong ka'ada'an noyagi-yagimai.
14 Ta'e mo'ikow ain notuḷung ko'inakoí wakutu in aku'oi kinoaíntugan in roriga; bo oaíidmu tatua im mopiabií.
15 Utat mita intau im Pilipi! Kinota'auan bidon monimu totok ko wakutu in aku'oi nonaḷaímai kom Makedonia kolipod, wakutu in aku'oi bagu momangkoi nopoyaput in Habar Mopia, yo tongaíbií mo'ikow in jama'at inta notuḷung ko'inakoí; mo'ikowdon nion inta nokorasa domandon kon inta mopia bo inta diaí mopia wakutu in noyotakinku.
16 Sin wakutu in aku'oi kon Tesalonika bo moparaḷu kon totuḷung, yo ain no'iliu kong komintan mo'ikow nokidia in totuḷung monimu ko'inakoí.
17 Tongaí soaáḷ inta totok moponting ko'inakoí in de'emanbií tongaí motarima kon onu inogoi monimu. Ta'e ibogonku im moko'ontongbií kom bungai mita inta mokodugang kong ka'untungan monimu.
18 Bayongan inta paraḷuonku inogoidon monimu ko'inakoí, sedang bo no'iliudon kon tugat! Bayongan inta inogoi monimu inta pinokidia ko'i Epaproditus aindon sinarimaku. Daí tana'a makow komintandon oyuíon onu inta paraḷuku. Bayongan inta inogoi monimu ko'inakoí tua naonda bo kobondu ing kurban inta pinosumbah ko'i Allah bo inta sinarima domandon i Allah takin pia ing gina.
19 Ki Allah inta sinumbahku, mobogoibií im bayongan kaparaḷuanmu podudui ing kakaya'an bo kamulia'an-Nya inta pinonyata ko'i Kristus Yesus.
20 Dinayo-dayowdon ki Allah, ki Amaí naton modapot ing kopaḷutan dunia na'a. Amin.
21 Poyaputpa in salamku kom bayongan umat i Allah inta notobatuí i Kristus Yesus. Bo tarima domandon in salam inta nongkon i utat mita naton inta noyotakinku kon na'a.
22 Bayongan umat i Allah kong kotaí tana'a bo mosia inta kon istana i Kaisar nopoyaput doman in salam ko'i monimu.
23 Po'igumonku makow, ki Tuhan Yesus Kristus umuran mobogoi im barakat ko'i monimu komintan. Hormat nami, Ki Paulus bo ki Timotius
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA