Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sababu ge'ena 'Esa moi riaka dodoto tinisiboso-bosono, 'ania 'ahu ma sigoronaka salingou niosigou-gounguku niongaku ma Jouka. Ngoi katinisi-singina tomau pomakamake! Nginiou ge'ena so 'ai singina 'isanangi, so 'idadi tomorene.

² Ee biranga Euodia de mita ngo Sintike, ngoi toga'asoko tosidemogaroku la ngini ka 'o singina moi sababu ngini niongaku-ngaku ma Jouka.

³ De ngona 'ai manai pomasida-damanarama, gee nosigou-gounguku nomanarama! Ngoi toga'asoko tanu ngona nakiriwo nakisikatiai 'o ngeweka yamididi go'ona. 'Ona de de ngoi miomanaramokau miomariwo ma sala ma ngale miosihabari 'o Habari ma Owa ma Jo'oungu ma Dutuno, 'isoka 'o Klemen de 'iregu-reguosi yoodumu gee mimasida-damanarama. Gee 'iriwo-riwokau go'ona, to 'ona manga ronga-ronga naga 'isilefoku 'o Nyawa 'o 'Ahu 'Ika-kakali Yamake-make ma Bukuoka.

⁴ Ngini nioodumu salingou kaniomore-morene sababu ngini nimarimoiokau de ma Jou. Ma moiosi tinisidemo: Salingou kaniomore-morene.

⁵ So ma do-dogumuku ne'ena, ngoi tomau tinisidemoli: Nia gokoieka, salingou 'o nyawa 'iodumu yanako 'ato 'ania singina 'isure. Sababu koito'ingowau de ma Jou woboau.

⁶ 'Uwa niododato 'o kianikia bato. Ma 'ena naga 'o sagala moi-moioka ngini salingou niomalahidoa de niositotara 'ania ga-ga'asoko ma Jo'oungu ma Dutuka. 'Okia naga nioparaluu, ge'ena salingou kaitaurika niosidemo ma Jo'oungu ma Dutuka, ma de nio'amalaha.

⁷ La 'o sanangi ma Jo'oungu ma Dutuno gee ngone 'o nyawa kopa'akunuwa pasahe, 'asa yajaga 'ania singina de nia di-dibangi gee 'imarimoiokau de ma Kristus Yesus.

⁸ Ma do-dogumuku ne'ena 'Esa moi riaka dodoto, salingou niatiba-tibangi 'o sagala moi-moi gee 'iba-baraguna, de gee 'o nyawa yodua-duaka. Ge'ena la 'okia sonaa gee 'iti-tiai, 'iku-kumati, 'iloa-loa, 'itebi-tebini, gee 'o nyawa yosi-singina, de gee yaowa-owa.

⁹ Niadiai 'okia naga gee nimadotokokau ngoioka de niaka'elinou, 'isoka kokia naga gee tosidemo-demokau bolo tadi-diaiokau. La ma Jo'oungu ma Dutu gee nanga singina wosisa-sanangi 'asa naga de de ngini.

¹⁰ 'Ai 'ahu ma sigoronaka gee mimarimoiokau de ma Jou, ngoi tamao posironga de tosanangioka sababu kone'enau ma do'ingono, ma ngini konimongoruwa ngoi. Ngini ge'ena ka ma sirasi ma konisidipidilikawa ngoi, duga 'ania 'orasi koi'iwa ma ngale niriwo ngoi.

¹¹ Ngoi kone'ena tongose ge'ena ko ma ngalewa 'ato sababu 'isidukurangi, sababu ngoi tomadotokokau ma ngale 'okia naga de ma 'ena ge'ena tamaoku yaowakau.

¹² Ngoi tamaokau to'ahu 'isikokidukuranguku, de mita tofoloiku. Dau ma 'orasi kokia naga bato, 'ipunusuku bolo 'isawinuku, tofoloiku bolo 'isidukuranguku, ngoi tanakokau kokia ma ngekomo todaari.

¹³ De 'o kuasa gee ma Kristus woikulano, so ngoi ta'akunu todaari kokia naga bato ma lugo.

¹⁴ Ma ngini niriwokau ma 'orasi ngoi tosusaku. 'Okia naga niodiaiokau ge'ena posironga de 'isureka.

¹⁵ 'Esa moi riaka dodoto 'o Filipi ma nyawa! Ma sira gee ngoi tositotara 'o Habari ma Owa ma di-disiraka 'o Makedonia ma daeraaka, de gee ngoi tamada 'o Makedonia, ngini ma sirete nianako ma gou-goungu duga ka ngini 'o jamati moi niriwo-riwo ngoi de mita 'o pipi nikula. De ngone pomakariwo ma ngika de ma ngino.

¹⁶ Sababu gee ngoi 'o Tesalonika ma kotaka mita ngini 'igi-gilio nidingoto ma ngale to ngoi 'ai paraluu.

¹⁷ Ma ngoi tosilamo-lamo ge'ena ka gee 'okia sonaawa nikula-kulakau ngoino, ma 'ena ngoi tomau 'ania 'ahuoka 'ifoloiosi 'iamoko ma barakati.

¹⁸ Ngoi tadawongokau 'iodumu ge'ena, de ge'ena kaifoloikau ma ngale 'ai paraluu. 'Iodumu gee niosidingo-dingoto ge'ena 'o Epafroditus wokulakau ngoino. So ma 'orasi ne'ena gee topa-paraluu 'iodumu de ma 'enau. 'Iodumu gee niokula-kula ngoino ge'ena 'isoka 'o su-suba gee ma Jo'oungu ma Dutu 'awi singina yadae-daene.

¹⁹ De ma Jo'oungu ma Dutu gee towisuba-suba, gee wokorago ma sala, 'asa wosikokitotomo to ngini 'ania paraluu ma ngekomo ma Yesus Kristus.

²⁰ Nou, powisitedene nanga Dea ma Jo'oungu ma Dutu kaisi'ado-'adonika! 'Amin. Koge'enau.

²¹ Niositotarika 'ai tabea ma Jo'oungu ma Dutu 'awi 'umati 'iodumika, gee yomarimoiokau de ma Kristus Yesus. De 'ai ma-manai nongoka dau mita yosidingoto manga tabea nginika.

²² Ma Jo'oungu ma Dutu 'awi 'umati 'iodumu ma kotaka ne'ena de godagee yoma-manarama 'o Kaisar wi kadatoka mita manga tabea yosidingoto nginika.

²³ Tanu ma Jou Yesus Kristus winisibarakati 'Esa moi nioodumu. Ngoi 'o Paulus de 'o Timotius, minitabea!

Filipi

Video Filipi 4

Ikuti Kami:

KONTAK | PARTISIPASI | DONASI