Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Au nau emi bubuluk, tao leo bee de au puse laipana anseli soaneu emi ma soaneu sila fo manai Laodikia la, boema soaneu hataholi fo beita lalelak matalolole au fa.

² Au tao basa sila la, fo ela sila dale nala latea-lahele ma lasue-lalai ao nalosa tututi-nanato nala latea-lahele. No enok ndia, sila lalelak te'e-te'e ma lamahele boema ala bubuluk Manetualain dede'a nafufuni na, fo nde Kristus.

³ Kristus nde soi nabe'i Manetualain manatee tenon ma malelan lala'ena, fo makahulu na, nananafunik ndia.

⁴ Au afa'da basa dede'ak ia la neu emi, fo daenga hataholi boso ke'di ndiu nala emi ninik dede'a-kakola makee-mamina nala.

⁵ Nanahu leomae au doo ka eme emi mai, tehu bole tafa'da tae, au nai emi tala'da. Ma au amahoko nana au ita emi teik esa-dalek esa ma emi namahehelem neu Kristu sa natea-nahele.

⁶ Emi sipok Kristus Yesus da'dileo Lamatuak so. Hu ndia de, ela leo bee na emi da'di esa moon,

⁷ ma mahuu-maoka nai Kristus dalek. Ela leo bee na emi mapadedeik emi maso'da ma neu netes esa lain, fo nde Kristus. Ela leo bee na emi boetai mamahele Kristus, tunga hata fo lanoli basan neu emi a so. Boema ela leo bee na, emi mamahoko ma moke makasi ba'u ka neu Manetualain.

⁸ Ela leo bee na emi manea matalolole, fo daenga hataholi boso fufu'di-oodok nala emi, ninik hataholi daebafa ka malela sosoa-ndandaa ta nala, fo nini ka'da momopo-mamates. Manatee tenok sila la, ala ta mai leme Kristus mai fa, te leme ka'da hataholi daebafa ka hahapu na ma leme dula dalek fo mana koasa daebafa ka no lalai a mai.

⁹ Nanahu basa Manetualain ha'da-tataon lala'e na, hapun nai Kristu sao paa hataholi daebafa na dalek.

¹⁰ Ma hu ka nde emi da'di esa mo Kristus de, emi hapu so'da matetu ka. Nanahu Kristus nde bee na, malangan neu basa dula dale mana koasa ma mana paletak lala'e na.

¹¹ Hu ka nde emi da'di esa mo Kristus de, emi nanasunat, tehu ta nanasunat ninik sunat fo hataholi daebafa ka tao ka fa, te neme sunat fo Kristus tao ka. Kristus fo manase'i po'i emi neme ha'da-tatao masala-masingo ka koasa na mai.

¹² Nanahu nai lelek fo ala salani emi a, emi nananatoik sama-sama mo Kristus; boema no salanik ndia boe de, emi nanatao naso'da falik sama-sama mo Kristus, nanahu emi mamahele Manetualain koasan fo manatao naso'da falik Kristus neme mamate sa mai a.

¹³ Makahulu na emi mate tunga samane ka, nanahu emi masala-masingo ma hu ka nde emi ta nanasunat tunga ao paa ka fa. Tehu besak ia, Manetualain tao naso'da falik emi sama-sama moo Kristus. Ana fe do'o do ampon neu ita sala-singo nala so,

¹⁴ ma Ana sii heni ita susula hutan fo nakaseti ita tao hata esa no eno-dalak fo nini susa-soe fe ita. Hu no susula hutak ndia nanalona nggangek nai ai nggange ka de, Manetualain lose heni basa kalaak soaneu ita.

¹⁵ Nai ai nggangek lain, Kristus tao nala dula dalek fo ala paleta ma ala koasa, basa-basas male henis. Ana tao na basa daebafa ka lita, Ana hela nos, sama leo hataholi nanatahan ala, nai lelek fo Ana tao feta fai sesengi na, nono'ka bai hataholi nanahuku kala, fo Ana taos da'di natutu'duk esa nai lea matan.

¹⁶ Hu ndia de, boso po'ilotak hataholi fe salak neu emi la'eneu nana'a-nininuk, do la'eneu feta bula beuk, la'eneu fai Saba ta, ma la'eneu agama fai malole fe'e-fe'e nala.

¹⁷ Nanahu basa sila la ka'da salaok neme dede'a mana mai kala, tehu matetu na soona, nde Kristus.

¹⁸ Boso po'ilotak hataholi fo tako nakaloloe ao na do namahele ata nusa so'da kala, tao nakatutu'dak emi. Te hataholi ndia, ana koao ninik dudu'a-aafi daebafa na boema namatutua-namadedema ao na ninik ninita nala,

¹⁹ nalosa ana ta ho'u nahele Kristus da'di ndia malanga na fa. No Kristus hehela-nonolen de, ao paa ka nananakaboboik ma nanatao nakabubuak da'di esa, hu ka nde ua kakaluk ma bu'u mole kala, boema ala moli da'di tunga Manetualain hihii-nanaun.

²⁰ Emi mate sama-sama mo Kristus so, ma emi nanase'i po'i basak neme dula dalek fo mana koasa daebafa ka no lalai a. Na, tao le'e de, emi maso'da sama leo hataholi fo daebafak ia bei koasa nala sala? Tao le'e de emi bei tunga nakanenetek fo nae,

²¹ "Boso to'to ia", "Boso malamei ndia", "Boso koi la'e ia"?

²² Basa nakanenetek sila, ka'da la'eneu dede'a-dede'ak fo pake basan soona, sosoa-ndandaan ta so'ok. Basa sila la, ka'da nakanenetek ma nanolik fo hataholi daebafa ka nde tao nana.

²³ Memak meten soona, nakanenetek ma nanolik, boema dede'a manatee tenok ndia, ala paleta fo daenga hataholi a sene-do'ok neu ata nusa so'da kala, ma nakaloloe-nakadae ao ina na, boema ana fepa li'u ao ina nala; tehu basa sila la sosoa-ndandaan ta, soaneu nauli hataholi a hihii-nanau ao paa na.

Kolose

Video Kolose 2

Ikuti Kami:

KONTAK | PARTISIPASI | DONASI