Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kareb kai pangeh nepuit, idi kai nekali' ngadan bawang ineh Malta.
2 Idi lun bang bawang ineh méi' nekai. Ideh nengaba apui, idi nenganak nekai, ngaceku mudan idi meteneb teh.
3 Iamo' kareb Paulus ineh nengamung raka'-raka' idi nenganau' luun apui ineh, idi inan sebuleng menipeh neremuat ngaceku melau', idi nengawil ticu'neh.
4 Kareb lun bang bawang ineh nenier menipeh ineh ngawil ticu' Paulus, idi ideh nepebala seburur inan seburur, "Kali' rungen lemulun ini lun ngaté. Iamo' Luk Ngua' ineh na maré neneh mulun, sagan pana' ieh pangeh nepuit ratnan susa' bang abpa' rayeh."
5 Iamo' Paulus nengegkar menipeh ineh luun apui idi dengan na kali' ét sesuut pana'.
6 Idi ideh nenganét nier neneh mebara', kian meluka' idi petacu maté lek. Iamo' kareb ideh pangeh nenganét mio idi ideh na kali' anun-anun luk medereh macing neneh, idi ideh nengisu' terawédeh, pad ideh nemala Paulus ineh inan lalud akang.
7 Idi na mado rat su ineh, inan aceh tana' luk inimet selemulun luk ngadan Publius, ieh ineh lun rayeh bawang ineh. Ieh nengasa' nekai dengan mawang niatneh bang teluh aco kinioneh.
8 Kareb ineh taman Publius medadem idi mét batek téi' dara' teh. Idi Paulus nesemuet bang takepneh. Ieh nesembayang, idi nengerareng ticu'neh luunneh idi nengedo' neneh.
9 Pangeh ineh, inan teh lun baken luk mét bang bawang ineh luk iné' ni Paulus. Idi amungdeh ineh dino'.
10 Idi ideh nemaré tuda'-tuda' baré kuan kai; idi kareb kai pian nalan, ideh nenguit kuan kai binaweh luk pian kai.
11 Pangeh teluh bulan idi kai nenalan rat pulau ineh maya' aceh kapal luk rat déi' Iskandria luk titen "Akang Luk Perapid," luk nucu' kareb meteneb déi' bawang ineh.
12 Kai nacing déi' Surakus, idi nucu' déi' teluh aco kinioneh.
13 Rat déi' kai nenalan idi nacing déi' Regium. Kenebpa inan bui rat pa kabing busat aco, luk nenguit nekai, idi kesoriak kai nacing déi' Putioli.
14 Idi déi' kai nepapu' tuda'-tuda' kinanak luk nenawar nekai tudo dengandeh seminggu. Idi muci kai iné' Rum.
15 Kinanak-kinanak luk déi' Rum ineh nekali' bala kai macing idi ideh nacing Kadai Apius idi Teluh Kadai sikal papu' nekai. Kareb Paulus nenier nedeh ieh nengubur Allah idi nengalap niat luk mekuu'.
16 Kareb kai nacing déi' Rum, idi ideh nenima' Paulus tudo ali-ali dengan seburur lun pebunu' luk matar neneh.
17 Pangeh teluh aco Paulus nenawar nelun rayeh lun Yahudi. Kareb ideh nepamung, idi kebalaneh nedeh, "O kinanak-kinanakku! Sagan pana' ui na nenganau' anun-anun luk sikal metueh ratnan pupu idi adat tepun tau, ui pangeh tinutup déi' Yerusalim idi biré bang palad lun Rum.
18 Kareb ideh pangeh nengelio negku, idi ideh sikal muit negku, ngaceku na luk idi punneh ui miak kumin dengan ukum maté.
19 Iamo' kareb lun Yahudi mesaad, idi ui nesumaad amé' tetunin pa kiung raca' Rum, baken ngaceku ui inan aceh adu' kuan pupuku.
20 Ineh punneh ui mutuh papu' nemuyuh pad miak pebala nemuyuh teh. Ngaceku ui pangeh kiling ngaceku Ieh luk inan lun Israil merapet."
21 Idi kebaladeh neneh, "Sebuleng surat pana' nateh luk ilap kai rat Yudia ratnan lawému. Idi seburur kinanak kai pana' nateh iné' tungé' rat déi', pad nguit bala luk do' idi luk dat ratnan iko.
22 Iamo' kai pian ninger ratnan terawému; ngaceku kai kali', idi iapeh-iapeh pana' lemulun ngedat rurummu ineh."
23 Kareb ideh pangeh nengeletep aceh aco dengan Paulus, idi pelaba ula' lemulun nacing su luk inanneh tudo ineh. Idi ieh nemada' bala ineh kuandeh rat pekak macing malem idi nemada' luk nekali'neh ratnan Imet Allah. Ieh nenutun ngegala' kuandeh ratnan Yésus, do' rat bang Ukum Musa idi rat bang surat nabi-nabi.
24 Sebuangdeh manu ku balaneh, iamo' inan teh luk na manu.
25 Idi ideh nenalan dengan na perurum arangdeh sebuleng. Ngaceku Paulus pangeh nemada' bala ineh, "Matu-matu bala luk bila Roh Meligan dengan tang Nabi Yesaya kuan tepun muyuh!
26 KebalaNeh, 'Amé' iko inan pupu ini idi pebala: Matu muyuh sikal ninger, iamo' na muyuh kali' ilungneh; muyuh miak nier, iamo' na muyuh kali'.
27 Ngaceku terawé pupu ini mengadel, idi ideh nengang laliddeh, idi ideh rudap mateh, pad ideh na miak nier dengan matehdeh, idi ninger dengan laliddeh, idi kali' ilungneh dengan niatdeh, pad ideh lumi Negku, kebala Allah, idi Ui ngedo' nedeh.'"
28 Idi kebala Paulus, "Ngaceku ineh do' muyuh kali' idi ulun meruked luk ratnan Allah pangeh icing kuan lun pupu baken. Ideh sikal ninger teh."
29 Pangeh Paulus nepebala kudeng ineh, idi amung-amung lun Yahudi nuli' dengan nepesaad-pesaad seburur dengan seburur.
30 Idi dueh lak kinioneh, Paulus sebuleng netudo déi' bang ruma' luk binayarneh, idi ieh nenganak amung-amung lemulun luk macing ngikak neneh.
31 Ieh nemada' ratnan Imet Allah idi ratnan Tuhan Yésus Keristus dengan mekuu' niat idi dengan na lun mebpeng peh.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA