Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ia tongkiendek melomo de' gantanan, mane'ri kiissen kumua jiomokan pale' pulau Malta.

² Gaja bassa to tau jio lako kami'. Natarima melo ngasankan, napadukkuankan api, sanga mammulami uran, naratumi to wattu cakke'.

³ Ia tonna male Paulus mekaju napatamai api, den ulah mello'do' lan mai, sanga nalussuii api, natittoi to limanna.

⁴ Ia tonna kitai tau to ulah mendoke' jio limanna Paulus, sipangkadami nakua, "Ee! Ia tee tau te'da nasalai tombuno tau, sanga moi nala'pahmo jio mai abala' lan tasik, apa te'da naeloranni tuo dewata Baine Malampu'."

⁵ Apa napempi'pikanni Paulus joo ulah tama api, na moi cinding te'dara naciapa.

⁶ Nasangai te'da namasai, nakambang to limanna, iarika ta'pa mate pissenni. Apa ia tonna masai-saimo ntajanni, na te'da bang una namatumba, laen omi tangngahna, nakua, "Dewata tee tau."

⁷ Te'da namambela jio mai ntuu joo, den padangna Publius, mesa' tomangparenta ntuu joo pulau. Masannang penawanna ntarimakan, napupangbongikan tallung bongi, natoratu melo toopakan.

⁸ Ia joo wattu masaki to ambe'na, lumalla'i, natittai rara too. Mentamai Paulus tama kamara'na, napassambajanganni, na kaka'i, namalagah.

⁹ Ia tonna mangka joo, siratuan todami lako Paulus to tomasaki laen, napamalagah ngasanni.

¹⁰ Gaja nakasiri'kan, na ia tongkilamalemo, nabenkan sininna to kiparalluinna lan kalingkanki'.

¹¹ Ia tongkitallung bulanmo jio pulau Malta, malemokan jio mai mpake kappala' jio mai kota Aleksandria disanga Dioskuri. Ia joo kappala' masainni torro jio pulau Malta ntajan soro'na peuranan.

¹² Ia tongkiratu lako kota Sirakusa tallung bongikan jio,

¹³ kimane' male mangrundun randan tasik pole' sanggenna kota Regium. Masawanna mangngiri' lo' mai to angin, na duang bongira kiratu lako kota Putioli.

¹⁴ Sangminggukan torro jio sola ba'tu pira-pira tomatappa' lako Puang Isa, sanga nasuakan torro tongkisitammu. Mangkai joo too, malemokan lako kota Roma.

¹⁵ Ia tonna sa'dingngi to tomatappa' jio, siratuanmi jio Pasa' Apius sola pangbongian disanga Pasanggarahan Tallu la sikitankan. Ia tonna kitami Paulus, mangkurru sumanga'i lako Puang Allataala, naendek sumanga'na.

¹⁶ Ia tongkiratumo lako kota Roma, dipatorro mesai to Paulus najagaii mesa' surudadu.

¹⁷ Tallung bongi mangkanna joo, napangpesuanni Paulus naratu to pekaamberan to-Yahudi jio. Ia tonna sirempunmo nakuanni, "Ee, todipusile'to! Sitonganna te'da salaku' lako bangsata' ba'tu lako ada' tojolota'. Apa moi nasusi joo, dipangngolona' lako to-Roma, tongkudijokko jio kota Yerusalem.

¹⁸ Ia tonna mangkamo mparessai to kara-karaku', madoangngi la la'paranna', sanga moi sangkanuku malotong te'da salaku' naampa' to sipato' dinii la mbunona'.

¹⁹ Apa te'da nasitujui to-Yahudi, na iamo joo kupeta'dai nadibicara to kara-karaku' jio olona Tomaraja Roma. Sitonganna te'dara apa kuparapasan bangsata'.

²⁰ Iamo joo kumeta'da tasitammu ssitimbang-timbangngii. Sanga iari kudipumpung, iari to Raja Mangpasalama', to masai allomo tatajan kita' to-Israel."

²¹ Napebalii to-Yahudi nakua, "Nate'da bangra sura' sanglambah kitarima jio mai tana Yudea, na te'da too tau ratu mpauko ba'tu mpau gaja'ko.

²² Apa madoangkan ssa'dingngi to pangngajaran muturu', sanga kisa'ding kumua umbo-umbo nanii, nacacca tau."

²³ Mpattantumi mesa' allo sola Paulus nanii la sitammu. Ia joo allo buda tau ratu lako to nanii Paulus. Mellao melambi' ratu lako soloh allo naajahhi ngasan to tau umbo nakua menjaji taun-Na Puang Allataala lan kaparentan-Na. Napabuttii jio mai sura'na Nabi Musa na sura'na nabi laen kumua Raja Mangpasalama' to Puang Isa, to napau Puang Allataala tonna anu'.

²⁴ Den to ngkatappa'i to apa napau Paulus, apa den too to te'da nakatappa'ii.

²⁵ Ia tonna sipekkamo to tau, nasisarak-sarak, nakuamo Paulus, "Liwa' tongan to apa napau Roh Allataala lako tojolomi, to napau Nabi Yesaya tonna anu'.

²⁶ Nakua, 'Malemo kamu' mpauanni to-Yahudi: Da'tan bang kamu' mpesa'dingngii, apa te'da milampahangngi. Da'tan bang kamu' mpemakitaii apa te'da miissenni apa to jaji.

²⁷ Nasaba' liwa'mo membattuk tee bangsa, namataru talinganna, na mpamamma' matanna. Ia tee jajii dikua danggi' napakita matanna, nadanggi' namangpesa'ding talinganna, nadanggi' napahangngi, nadanggi' namengkatoba' lako kale-Ku' anna danggi' kupamalagahhi.'"

²⁸ Katampakanna nakua Paulus, "Ee, kamu' to dipusile'to! Parallu miissen kumua ia to Kareba Kasalamatan jio mai Puang Allataala dipangpeissenan toomo lako bangsa tangngia to-Yahudi, na la natarimai ia!"

²⁹ [Ia tonna mangkamo Paulus mpaui susi joo, sipekkami to to-Yahudi anna male mpemboko'ii.]

³⁰ Duang taunni Paulus jio kota Roma, torro jio bola nasewa ia. Masannang penawanna ntarimai to toratu ngkitai.

³¹ Te'da namalaja' mpangpeissenanni umbo nakua menjaji taun-Na Puang Allataala lan kaparentan-Na, napangpeissenan tooi kumua Raja Mangpasalama' to Puang Isa. Masannang Paulus mangpangngajah, sanga te'da tau nnanggaii.

Kisah Para Rasul

Video Kisah Para Rasul 28

Ikuti Kami:

KONTAK | PARTISIPASI | DONASI