Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ 'O Agripa wongose 'o Paulusika, "Ngona minisidabi nomadasango ma ngale nomariwo." So 'o Paulus wakipomakasi ma ngale wobicarau, de wongose konee,

² "Tabea 'Aba Agripa! Ngoi toma'untungoka sababu ne'ena ma wange 'idadi tomariwo tomadasango 'ani bionoka ma ngale 'iodumu gee 'o Yahudioka 'ika-kalakika.

³ 'Ifoloiosi ge'ena sababu ngona nosikanako ma gou-goungu 'o Yahudioka ma 'adati de ma kia sonaa moi-moi. Sababu ge'ena toga'asoko ngona 'Aba, tanu nosigisenosi 'ai demo.

⁴ 'O Yahudioka ma nyawa yoodumu kayanako to ngoi 'ai 'ahu ma sira katomadogu'urunosi. 'Ona yanako ngoi ka 'o dogu'uruosi 'ena togogere 'o Yerusalemuokau 'ai nyawa-nyawa 'o Yahudioka manga sigoronaka.

⁵ Ma do'ingoou 'inakokau, de nako yomodeke tanu yosijarita 'ato ka ma sirasi ngoi ne'ena 'o Farisioka ma nyawa de tamoteke mia 'agama ma 'atorangi 'ikua-kuata 'iodumu.

⁶ De ne'ena ngoi toma'okode ne'enaka ma ngale 'i'urusu sababu tongaku de toda-damaau ma Jo'oungu ma Dutu wi jaji mia edete de mia dotumika.

⁷ 'O jaji ge'enau mita 'o Israeloka 'o suku mogiooko de modidi yongano-nganono so 'o wange de 'o obiri wisuba-suba ma Jo'oungu ma Dutu. De ma sababu 'o jaji ge'enau tangaku, 'Aba, so 'o Yahudioka ma nyawa 'isisala.

⁸ 'Ido'oa so 'o Yahudioka ma nyawa ngini koniongakuwa 'ato ma Jo'oungu ma Dutu wakisimomikoli 'o nyawa yosonge-songenuku?

⁹ Ma sira ge'ena ngoi mita 'ai di-dibangi salingou tadiai 'i'ini-'inioka, ma ngale towiitomo 'o Yesus 'o Nazaretino gee.

¹⁰ De koge'enau ngoi tadiaiokau 'o Yerusalemuoka. De 'o surati 'o 'imam ma sae-saekoka, manga gudaiou yosingou-ngounu ma Jo'oungu ma Dutuka ma ngkemo wimoteke 'o Yesus takisiwosanga 'o buika. De ngoi mita katosisamaowa yakihukumu yakiso-songene.

¹¹ Ma gudai takisikisaa 'o lo-lomu ma woa-woaka, ma ngale takipakisaa la yamada 'okia naga gee yongakuokau. 'Ai do'otasa 'irama 'onaka sigado 'o kota 'ireguka ma taika taki-kiniiki."

¹² "Ma dumutu koge'enali mita ngoi to'asa 'o surati kuasa 'o 'imam ma sae-saekoka de totagi 'o Damsyik ma kotaku.

¹³ De gee ngoi 'o ngekomo ma goronaka 'o wange 'ikoronako, ee 'Aba ma Koana, ngoi tamake 'o siwara daku 'o diwanguku gee 'ifoloiosi 'ikinitara de 'o wange ma siwara. 'O siwara ge'ena misigilolitino ngoi de 'o nyawa gee 'imote-moteke.

¹⁴ Ngomi mioodumu miokokiruba 'o tonauku. Ge'enaka de to'isene 'o 'ilingi 'ingose ngoino de 'o Ibranioka manga demo, 'Saulus, Saulus! 'Ido'oa so noisikisaa? Ngona ma sirete 'asa nomadamaoka ma siri, nako konomaogoruwa nalawani to ngoi 'ai pareta gee 'imadadi to ngona ni Jou.'

¹⁵ So ngoi tongose, 'Ngona nago'ona 'Aba?' De ma Jou wosango, 'Ngoi 'o Yesus gee noisisikisaa.

¹⁶ Noma'okode! Ngoi tomasidumutu ngonaka sababu tomau tonigoraka nodadi to ngoi 'ai ro-riwo de 'ai sakisii. Ngona salingou nositotara 'okia naga namakekau ne'ena ma wange ma ngale ngoi, de 'okia naga gee 'asa tonisidumutu 'o 'orasi nanga bionika.

¹⁷ Ngoi 'asa toniriwo tonisipidili 'o Yahudi ma nyawaka de mita ko 'o Yahudiokawa manga singina ma dorouoka. Ngoi 'asa tonisuloko notagi 'onaka la manga ako napelenga,

¹⁸ la yosupu 'o darusoka de yowosanga 'o darangika; la yakisipidili 'o Tokata ma Koana ma paretaka, de ma Jo'oungu ma Dutu wakipareta. So de yongaku ngoino, manga sowono 'asa kotosi-singinawau de 'ona 'asa yodadi ma Jo'oungu ma Dutu wi kawasa yosingou-ngounu.'"

¹⁹ 'O Paulus wongoseli ma Koana 'o Agripaka, "Sababu ge'ena ee 'Aba, ngoi kotomaogoruwa tosingounu 'okia naga gee tamakekau ma Jo'oungu ma Dutuno.

²⁰ Katositarangikau takisidemo 'o nyawaka 'ato salingou yotoba 'o sowono yodiai de yomasidutuku ma Jo'oungu ma Dutuka de yosidumutu manga 'ahuoka 'ato yomaogorokau 'o sowono yodiai. Ngoi tositotara ge'ena 'isira 'o Damsyikoka, deika 'o Yerusalemuoka, deika 'o Yudea takilolituku de mita ko 'o Yahudiokawa ma nyawaka.

²¹ Ge'enau so 'o Yahudioka ma nyawa yomau 'ito'oma so 'itagoko ma Jo'oungu ma Dutu wi Woaka.

²² Ma sigado ne'ena ma Jo'oungu ma Dutu woiriwo, so ne'ena toma'okode ne'enaka ma ngale tosidemo 'o nyawa 'iodumika 'iamoko de 'itingoono. 'Okia naga tosidemo ne'ena ge'ena la koireguwa gee 'o Musa de 'o nabii 'iregu-regu yosidemokau,

²³ ge'ena la ma Koana 'o Nyawa Wosilaha-laha ma Jo'oungu ma Dutu wosijajiokau gee salingou wosangisara, de wodadi wositisira yosonge-songenukou gee yomomikokali; la de ge'ena 'una 'idadi wosihabari 'o darangi ge'ena la 'o laha 'o Yahudi ma nyawaka de mita ko 'o Yahudiokawa."

²⁴ 'O Paulus kawobicarasi koge'ena, de 'o Festus woma'orese, "Paulus, ngona nitogosangukou! 'Ani do-dotoko 'iku-kudai ge'ena nisitogosangukou!"

²⁵ Ma 'o Paulus wosango, "Koitogosanguwa, 'Aba. 'O demo-demo tosisupuokau ge'ena ma goungu 'itiai de 'isupu 'ai di-dibangi ma owano.

²⁶ Ngona ma Koana Agripa ma sirete nanako ma gou-goungu ge'ena. Ge'enau so ngoi tobarani tobicara katosita-tarangiou 'Aba ni bionoka. Ngoi tanako ge'ena koi'iwa moi konanakowasi, sababu ge'ena 'iodumu koi'iwa 'idadi naga 'o ngii 'isigi-gi'iunika."

²⁷ 'O Paulus wongoseli ma Koana 'o Agripaka, "'Aba, toniho-horomati! Nongaku? 'okia naga 'o nabii yosidemo-demokau? Ngoi tamao nongaku 'Aba!"

²⁸ Ge'enaka de 'o Agripa wongose 'o Paulusika, "Nongose kaigapangi? noisisarani ma 'orasi kaitai-taitino ne'ena?"

²⁹ 'O Paulus wosango, "Ma 'orasi kaitai-taitino bolo 'o do'ingosi, ngoi 'asa tolahidoa la ngona 'Aba de ma balu-balusu nioodumu niosigise-gisene 'ai demo gee, niodadi 'isoka ngoioli, duga ngini 'uwa nipusuku 'isoka ngoi 'ipusukino ne'ena!"

³⁰ So kage'ena de ma Koana, de ma gubernur, de ngo Bernike, de yoodumu 'iregu-regu gee yomakoki'okokau.

³¹ Gee yosupuka de yomakadongose moi de moi, "'O nyawa nu'una koi'iwa wadiai gee yadaene powihukumu powiso-songene bolo powibui."

³² Ge'enaka de 'o Agripa wongose 'o Festusika, "'O nyawa nu'una nako 'iso kowoga'asokuwa wi hali ge'ena ma Kaisaroka 'i'urusu, ge'ena wipidilikau ngaro."

Kisah Para Rasul

Video Kisah Para Rasul 26

Ikuti Kami:

KONTAK | PARTISIPASI | DONASI