Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kareb Apolus déi' Korintus, idi Paulus nengelaba tana' déi' dayeh idi nacing déi' Epesus. Idi ieh nepapu tuda'-tuda' anak sekola Yésus.
2 Idi ieh nengitun nedeh, kebalaneh, "Pangehké muyuh nengalap Roh Meligan kareb muyuh manu?" Idi keburi'deh, "Nateh kai neninger ratnan Roh Meligan.
3 Idi keburi'neh, "Kudeng pieh kudeng ineh, dengan rereb anunké muyuh rireb peh?" Idi keburi'deh, "Dengan rereb Yahya."
4 Idi keburi Paulus, "Yahya ineh nengerereb nelun luk uren mo'. Ieh nemada nelun Israil, pad ideh manu Neneh luk macing muci rat neneh, ieh ineh Yésus."
5 Kareb ideh neninger bala ineh, idi amung-amungdeh rireb dengan ngadan Tuhan Yésus.
6 Kareb Paulus pangeh nengerareng ticu'neh luundeh, idi Roh Meligan netemurun luun anid-anid bururdeh, idi ideh nepeburi' dengan buri' luk biré idi nemada' luk biré Allah teh.
7 Idi amung-amungdeh lélé pulu' dueh burur.
8 Paulus nesemuet bang ruma' sembayang idi nepebala dengan mekuu' kuan lun mula', teluh bulan kinioneh. Ieh nepekitun idi nengubuk nedeh ratnan imet Allah.
9 Iamo' sebuangdeh ineh metueh niat idi na manu. Ideh nengedat Dalan Tuhan ineh pa kiung lun mula', pad Paulus neburo rat nedeh, idi nenguit anak-anak sekola' Yésus maya' neneh. Idi anid-anid aco ieh nepegayam bang ruma' sekola' Tiranus.
10 Ini mangun bang dueh lak kinioneh, pad amung lemulun luk tudo déi' Asia, do' lun Yahudi idi lun Grika pana' neninger bala Tuhan.
11 Idi Allah nenganau' tuda'-tuda' tanu' luk na inan pekalai dengan ticu' Paulus,
12 pad belaca idi kibung ayung luk pikai Paulus inuitdeh kuan lun mét ineh, pad luk mét ineh buro rat nedeh, idi ada'-ada' pana' remuat rat nedeh.
13 Inan teh tuda'-tuda' lun Yahudi luk nalan-nalan ngusu ada'. Idi ideh neten ngadan Tuhan Yésus kareb ideh nenganau' luk kudeng ineh, keburi'deh, "Ui mulung namu dengan ngadan Yésus luk bida' Paulus."
14 Inan teh tudu' burur deléi, ieh ineh anak Skiwa luk Imam Rayeh lun Yahudi luk nenganau' kudeng ineh.
15 Iamo' kebala ada' ineh nedeh, "Yésus ineh ui miti, idi Paulus ineh ui kali', iamo' muyuh ini idéké?"
16 Idi lemulun luk sinuet ada' ineh nedupeh nedeh idi nengelaya' nedeh. Idi ideh neburo rat bang ruma'neh dengan lubpa idi nurat teh.
17 Idi bala ineh nepiar kuan amung-amung lun Yahudi idi lun Grika luk tudo déi' Epesus; idi nacing aceh tot kuan amung-amungdeh, idi ngadan Tuhan Yésus meluun buren.
18 Idi mula' lun manu ineh nacing idi nengamo idi nengegala' amung-amung kekamendeh.
19 Idi inan tuda'-tuda' rat arangdeh luk mileh mangun nengamung suratdeh, idi nengeseb surat ineh pa kiung lun mula; idi kinula' raga surat ineh lélé macing limeh ngepulu' ribu rigit.
20 Kudeng ineh teh bala Allah iuk amé' rayeh idi metueh.
21 Kareb amung ineh pangeh mangun, idi Paulus geregan sikal ngelaba bawang Makedonia idi Akaya, idi amé' déi' Yerusalim, keburi'neh, "Kareb ui pangeh macing déi', na miak na ui nier bawang Rum teh."
22 Idi ieh nengecuk dueh burur lemulun luk nengedengan neneh amé' déi' Makedonia, ieh ineh Timotius idi Erastus, kareb ieh netudo mio sesuut déi' Asia.
23 Kareb ineh teh inan aceh ria' luk rayeh ratnan Dalan Tuhan ineh déi' Epesus.
24 Inan aceh lemulun ngadanneh Demitrius, ieh ineh tukang pirak, luk mudut ruma'-ruma' akang Artemis luk isuut dengan pirak. Idi kekamen ineh ngacing mula' usin kuan tukang-tukang ineh.
25 Idi ieh nengamung nedeh, dengan lemulun luk mepad kekamendeh, keburi'neh, "O kinanak-kinanak, muyuh kali' ratnan kekamen ini tau ngalap binaweh tau.
26 Muyuh sebuleng nier idi ninger ratnan luk ruen Paulus ineh. Kebalaneh akang luk inau' lemulun baken allah luk matu. Idi ieh pangeh nengubuk nelun mula', do' tunge' Epesus, idi lélé aput tana' Asia.
27 Ngaceku ineh susa' luk macing baken kuan kekamen tau sebuleng luk miak uen ngedat, iamo' ruma' Artemis, akang luk rayeh ineh pana' na miak buren lemulun teh, idi kian lek netutu' ubur akang ineh luk inubur amung-amung lun bang tana' Asia idi aput-aput tana' ini pana'."
28 Kareb lun mula' ninger bala ineh, idi ideh megateh niat, idi nengitang, kebaladeh, "Rayeh tu Artemis, akang lun Epesus!"
29 Idi ria' ineh nepiar aput bawang. Idi lun mula' nengakem ni Gayus idi Aristarkus, lun Makedonia luk maya' ni Paulus, idi nupun nguit nedidueh bang su luk inandeh marot.
30 Paulus sikal semuet arang uned lun mula' ineh, iamo' lun manu ineh na nenima' neneh.
31 Idi tuda'-tuda' lun rayeh Asia luk rurum Paulus ineh nemaré bala neneh, mutuh neneh, aleg mekuu' semuet bang su luk inandeh marot ineh.
32 Idi sebuangdeh nengitang kudeng ini, idi sebuang kudeng ineh. Ngaceku bang tebubpun ineh mula' ria', idi mula' lemulun luk na kali' anun pundeh nepamung.
33 Inan sebuangdeh nengerawé Iskandar luk miak maré or, ngaceku lun Yahudi nengecuk neneh amé' pa atun. Idi Iskandar ineh nengayep nelun mula' ineh sikal ngor baladeh.
34 Iamo' kareb ideh nekali' idi ieh ineh lun Yahudi, idi amung-amungdeh nengitang dengan sebuleng bala dueh jam kinioneh, kebaladeh, "Rayeh tu Artemis, akang lun Epesus ineh!"
35 Muci ratnan ineh, lun luk ngayud kuan bawang ineh nengagka' ria' lun mula ineh, kebalaneh, "O lun Epesus, idé-idé pana' kali', idi bawang Epesus ini, luk matar ruma' Artemis luk rayeh idi batu luk meligan luk nebpeh rat langit.
36 Seburur pana' nateh luk miak ngalum ineh. Ngaceku ineh, do' muyuh pirud idi aleg nganau' anun-anun dengan na ngerawé do'-do'.
37 Ngaceku muyuh pangeh nenguit lemulun ini amé' tungé', sagan pana' ideh na mano binaweh akang idi na ideh nenguyo akang tau.
38 Kudeng Demitrius idi lun tebarinneh inan adu' kuan seburur lemulun pana', idi luk inan besara' ineh mukab peh, idi lun mutut besara' pana' inan teh, aganeh ideh besara' seburur dengan seburur.
39 Iamo' kudeng inan anun-anun luk baken luk pian muyuh, idi miak muyuh mangeh ineh bang tebubpun luk matu.
40 Kian, mesusa' tau ini napeh lek ngaceku tau uen ngadu' ratnan tebubpun tau luk meria' aco sini, ngaceku na luk idi punneh; idi ratnan ria' ini na tau miak ngor anun-anun."
41 Kareb ieh pangeh nepebala kudeng ineh, idi ieh nengecuk nelun luk tebubpun ineh muli.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA