Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sababu to ngone nanga roese ge'ena matero ka nanga woa 'o duniaka. Ngomi mianakokau nako nanga woa 'o duniaka ge'ena 'ipiakoro ma ngale posongene, ma Jo'oungu ma Dutu 'asa wadua-duanga to ngone nanga roese ma sungi 'o sorogaaka gee ma Jo'oungu ma Dutu ma sirete wodiai de koito-torouwau.

² Nanga roese ma sigoronaka ma 'orasi ne'ena ngone pokatudunu sababu ngone poduaka ma sala po'ahu de nanga roese ma sungi 'o sorogaaka matero ka nanga baju ma sungi pomasinoa.

³ Ge'enau so dua ngone po'ahuoli de nanga roese ma sungi.

⁴ Ma goungu ma 'orasi ngone kapo'ahuosi de nanga roese 'o duniano, ngone pokakulurusi sababu posangisara ma sala. Ngone kopomauwa 'ato posongenikau la pamada nanga roese ne'ena ma ngano ngone pomau pamake nanga roese gee 'o sorogaano, la nanga roese gee dua 'asa kaisongenoka 'isitagali de 'o roese gee koisonge-songenuawa.

⁵ Ma Jo'oungu ma Dutuou ma sirete wonadua-duangou ma ngale po'ahu de nanga roese ma sungi ge'ena, de 'unau wonakula 'o Ngomasa 'Itebi-tebini 'imadadi 'o no-nako 'ato ge'ena 'iodumu wonakula.

⁶ Sababu ge'ena ngomi tatapu 'ami singina koi'oguwa. Ngomi mianako ma 'orasi ngomi kamio'ahuosi 'amia roese ma sigoronaka ne'ena, ngomi miamao 'ena 'o gurutika 'o woa gee dua midogogere de ma Jou ge'ena la 'o roese ma sungi.

⁷ Ngano ngomi komio'ahuwa moteke 'okia naa gee pamake-make, ma mio'ahu ge'ena ma titi mia ngo-ngaku ma Kristusika.

⁸ Ge'enau so to ngomi mia singina 'itongosono. Ngomi 'ifoloi mioduaka miosongene la mimasimada 'amia roesoka ne'ena, la 'idadi miogogere de ma Jou.

⁹ Sababu ge'ena ngomi miomariwo ma sala ma ngale 'o Yesus 'awi singina miosisanangi, ma 'orasi ngomi mio'ahu ka de mia roese 'o dunianosi bolo mio'ahu de mia roese ma sungiou de ma Jou.

¹⁰ Sababu ma raiokau ngone poodumu 'asa 'inalega ma diai ma Kristus 'awi bionoka, de ngone moi-moi 'asa pomadamake moteke nanga di-diai 'o duniaka ne'ena, yaowa-owa bolo 'ito-torou.

¹¹ Ge'enau ma sababu so mianako 'okia ma dumutu powihoromati ma Jou. Ge'enau so ngomi mimariwo miakisisahe 'o Habari ma Owa 'o nyawaka. Ma Jo'oungu ma Dutu wanako 'itiai mia singina ma dodaka de ngomi miomau ngini mita mininako 'itiai mia singina ma dodaka.

¹² De ne'ena ngomi komiakaranawa minisiarene. Ngomi duga kamiomau miokula naneda moi yaowa-owa la minidomorene ngomino, la nianako kokia salingou ngini niakidaari 'o nyawa gee yosilamo-lamo ka 'okia naga gee duga ka ma dudunino pamakeka 'isure so ko 'o singinawa ma sure.

¹³ Nako ngomi 'amia manaramoka minimakeno 'isoka mitogosangukou, ge'ena sababu mileleani ma Jo'oungu ma Dutu. De nako minimakeno mia singina 'itiai, ge'ena ma ngale miniriwo ngini.

¹⁴ Ngomi miparetano ma Kristus 'awi dora. Ngomi mianako 'unau wosongenokau ma ngale 'o nyawa 'iodumu nanga laha ge'ena ma ngale ngone poodumu posongenokau ge'ena la nanga 'ahu ma sira pamadakau.

¹⁵ Ma Kristus wosongene ma ngale watuusu 'o nyawa 'iodumu, la ngone poodumu gee padawo-dawongo 'o 'ahu ma sungi, ngone po'ahu ko to ngonewau ma sirete nanga mau, ma 'ena to ma Kristus gee wosongenokau de wisimomikokali sababu to ngone nanga laha.

¹⁶ Sababu ge'ena ngomi komiakilega ma diaiwau 'o nyawa moteke ka 'o nyawa 'o duniaka ma di-dibangi. Ma sira ngomi milega ma diaiokau ma Kristus moteke 'o nyawa ma di-dibangi, ma ne'ena ko'uwau.

¹⁷ 'O nyawa gee yomarimoiokau de ma Kristus, ma gou-goungu 'ona manga singina ma sungiou. Manga 'ahu ma sira ma 'orasi koyongakuwasi 'o Yesusika ge'ena koi'iwau so ma du'uru de ma 'enau.

¹⁸ Ge'ena 'iodumu ma Jo'oungu ma Dutu wamanarama. Ma ngekomo ma Kristus ma Jo'oungu ma Dutu wodiai ngone pomarimoioli de de 'una. De wonakula 'o manarama la 'o nyawa 'iregu-regu ma 'idadi yomarimoioli mita de ma Jo'oungu ma Dutu.

¹⁹ Ma ngekomo ma Kristus, ma Jo'oungu ma Dutu wodiai ngone 'o nyawa pomarimoioli de de 'una, de kowosi-singinawau nanga so-sowono. De ma Jo'oungu ma Dutu wosulokokau ngomino ma ngale miositotara 'o habari ge'ena.

²⁰ So ngomi ne'ena ma Kristus 'awi su-suloko. Ma Jo'oungu ma Dutu 'awi besesongo wositotara ma ngekomo ngomi. De ma Kristus 'awi kuasa, ngomi mioga'asoko miosigou-gounguku la ngini nimarimoioli de ma Jo'oungu ma Dutu.

²¹ Ma Kristus kowosowonuwa duga ma Jo'oungu ma Dutu wisimoku to ngone nanga sowono, la ngone pomarimoioli de ma Jo'oungu ma Dutu sababu po'ahu de ma Kristus.

2 Korintus

Video 2 Korintus 5

Ikuti Kami:

KONTAK | PARTISIPASI | DONASI