Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Nana ami bubuluk basa, uma fo nde ao paak fo ita leon nai daebafak ia, nanaofehenik soona, Manetualain sadia fe ita uma esa nai nusa so'da ka. Manetualain nde tao matan uma ndia de napadeik nahele losa dodoo na.

² Uma fo besak ia ita leo nai dalek ia, ita honggu'u, nana ita tahiik leo nai ita uman manai nusa so'da ka.

³ Uma ndia nde ita ao paa beu na.

⁴ Nai lelek fo ita bei leo nai uma manai daebafak ia dale ka, ita honggu'u, nana ita lelepa mabela na. Ta hu ka nde ita nau tatapo'i teme ita ao paa daebafa na mai fa, te hu ka nde ita nau pake ita ao paan maneme nusa so'da ka mai, fo ela ita ao paan fo bisa maten ia, nanatao nasafalik da'di ao paa maso'dak.

⁵ Manetualain nde sadia fe ita soaneu nanatao nasafalik ndia, de Ana fe Dula Dale na neu ita, da'dileo bua pepe'dak esa.

⁶ Hu ndia de ami dale ma natea-nahele tataas esa. Ami bubuluk basan, nai lelek fo ami bei leo nai ao paak fo bisa maten ia, ami doo ka neme uma fo neukose ami leo sama-sama mo Lamatua ka.

⁷ Nana ami maso'da tunga ka'da ami mamahele neu Kristus. Ami ta tunga hata fo nananita ka fa,

⁸ hu ndia de, ami dale ma natea-nahele. Ami mahiik manseli, matapo'i neme ami ao paam ia mai, fo ela ami hapu leo mo Lamatua ka.

⁹ Hu ndia de, ami sanga enok te'e-te'e, fo ela ami so'da ma nandaa no Lamatua ka dale na, nau nai lelek fo ami bei leo nai uma manai daebafak ia, do nai lelek fo ami leo nai uma manai nusa so'da ka boe.

¹⁰ Nana tao leo bee o, ita basa-basa tala nanakalaak leo Kristus kandela kekee-fufulan mata na teu, fo neukose ita esa-esak hapu babala na, nandaa no tatao-nono'in nai daebafak ia, nau tatao-nono'i malalole do tatao-nono'i mangalauk boe.

¹¹ Ami bubuluk, sosoak hata ita bii Lamtua ka; hu ndia de ami sanga enok fo hataholi la lamahele, see ami ia. Manetualain nalelak besa-besa no ami, de au amahena emi boeo malelak ami nai emi dalem dale.

¹² Ami kokolak mae leondia, tehu ami ta moke emi koa-kio ami. Ka'da ami nau fe emi ne'ek malole esa soaneu mamatutua-mamadedema neu ami, fo ela emi bubuluk, tao leo beek fo emi muse mataa hataholi fo ana mete ka'da hataholi a mata aon, te ana ta mete ha'da-paliin fa.

¹³ Metema memak ami nono'kabai de kamulu sa soona, dede'ak ndia ana da'di nana, Manetualain paluu na. Boema metema emi mita ami langa ma matetuk soona, dede'ak ndia ana da'di nana, emi paluu ma.

¹⁴ Kristus susue-lalain nde koasa na ami a, nalosa ami bubuluk metema hataholi esa mate basa soaneu hataholi lala'ena soona, dede'ak ndia sosoa na nae, mate basa hataholi lala'ena so.

¹⁵ Kristus mate soaneu hataholi lala'ena, fo ela hataholi maso'da ka ana boso naso'da soaneu aoina na mesa kana, tehu soaneu Kristus fo Ana mate de naso'da falik hu ka nde hataholi sila la paluu na.

¹⁶ Hu ndia de, ami ta uku-dou hataholi ninik hataholi daebafa ka uuku-dodoun fa. Memak ami uku-dou hai Kristus ninik hataholi daebafa ka uuku-dodoun, tehu besak ia soona, ta so.

¹⁷ Hataholi fo naso'da da'di esa no Kristu sa, ana da'di hataholi beuk. So'da palaa ka ta kana so. Basa-basan, ana da'di beuk so.

¹⁸ Manetualain nde tao basa sila lala'ena. Manetualain tao na ita malole falik ton, tunga Kristus. Boema nadenu ita tanoli-tafa'da hataholi a, fo ala malole falik lo Manetualain boe.

¹⁹ Ami tui-benga mae, no Kristus hehela-nonolen de Manetualain tao na hataholi daebafa ka malole falik lon. Manetualain tao dede'ak ndia ta no ana leke sala-salak fo hataholi daebafa ka taon neu aoina na. Boema Manetualain fe ami be'ibalakaik soaneu tui-benga halak ndia.

²⁰ Da'di ami ia nde bee na, Kristus hataholi nadedenun. Manetualain nanduku-nalosak hala hehelu na, tunga ami. No Kristus na'de na, ami dokodoe manseli neu emi, fo sipo ma Manetualain dale susue na, fo nini fe emi malole falik mon.

²¹ Kristus sala-singon ta, tehu Manetualain fen Ana lu'alepa ita sala-singo nala, fo ela ita malole falik to Manetualain, nana ita da'di esa to Kristus.

2 Korintus

Video 2 Korintus 5

Ikuti Kami:

KONTAK | PARTISIPASI | DONASI