Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Watanta i dunia ide peisa rapandiri nodo sou. Hai taisa, ane sounta ide ragero (lempona, ane mateke), Pue Ala ina mopasilolongaake hambua sou i suruga, au bara rababehi tauna hai au bara mokahopoa (lempona, watanta au wou).

² Tanganta mani tuwo i dunia ide, mantodihake hai mampeinaoke molambi watanta au wou i suruga.

³ Katouana, bara taunde mate hai mopalehike watanta ide. Peundeata bona tapahuru watanta ide hai watanta au wou.

⁴ Lawi tanganta mani tuwo i dunia ide, mantodihake lawi mantimi haleanta. Agayana bara taunde mopalehi watanta ide. Bara taunde mate, agayana taunde bona watanta ide liliu rapahuru hai wata au bara mokahopoa.

⁵ Pue Ala haduduaNa au mopasilolongaake hinangkana iti, hai Ia moweike Inao Malelaha nodo tanda kaina Naweinta wata au wou i suruga.

⁶ Idomi hai maroho liliu lalungki. Agayana taisa mpuu, watanta ide nodo sou au tapaidai i dunia ide. Mewali, tanganta mani tuwo i dunia ide, karaoke hangko i Pue,

⁷ lawi tanganta mani tuwo i dunia ide, meulake i Pue anti pepoinalainta; bara manike moita Pue.

⁸ Mewali, maroho liliu lalunta. Kehapirike mate, taporasi lawi ane mogaake hangko i watanta ide, ina hihimbelake hai Pue.

⁹ Mewali, mate ba tuwo manike i kahawena hule Pue, tapari-pari mobabehi liliu apa au mopakatana laluNa.

¹⁰ Lawi hambela tempo, ikita ope-ope hangangaa molindo Kerisitu bona Naparesa pobagonta, hai ikita ope-ope ina molambi hurungina hangko i apa au tababehi tanganta mani i dunia ide, ba maroa ba kadake.

¹¹ Mewali, langangkai mobabehi apa pea au bara naunde Pue, lawi kiisa Ia ina moparesa babehianda ope-ope tauna. Ido hai kipari-pari moanti tauna mepoinalai i Pue Yesu. Pue Ala moisa ihi lalungki. Peundeaki halalu, bona barapi ara au bata-bata lalumi irikami. Peundeaki bona ikamu ope-ope ina moisa kabulana lalungki.

¹² Inee nipehangu kipeinao motoya watangki haduduangki. Kipopaisaakau babehiangki au maroa au peisa nitoya, bona ara rarami mohanaihe tauna au moewangkai. Lawi tauna iti mampemahilehe anti kamapandenda hai lantinda i dunia ide, agayana ihi lalunda bara maroa.

¹³ Arahe au manguli magilangkai. Agayana barangkai magila. Ane ikami nodo tomagila, iti mewali lawi kiunde moula Pue Ala hangko i lalungki mpuu. Agayana, ane manoto pekiringki, iti mewali lawi kiunde motulungikau.

¹⁴ Anti kamaahina Kerisitu irikami, ido hai kipari-pari mampopolumao bagongki mopahawe Ngkora Marasa. Lawi kiisa: Kerisitu mate mohuru dosanda ope-ope tauna, mewali ikita ope-ope peisa rapandiri nodo tomate.

¹⁵ Lawi tunggaiana Kerisitu mate mohuru dosanda ope-ope tauna, bona ikita au tuwo mani i dunia ide barapoke moula peundeata haduduanta, agayana moularike peundeana Kerisitu. Iami au mate mohuru dosanta hai au tuwo hule.

¹⁶ Mewali, ido hai barapongkai mampopontani tauna moula apa au raita i raoa. Hangkoya kiuli Kerisitu manusia biasa pea, agayana ide-ide barapi nodo pekiringki.

¹⁷ Mewali, ane ara hadua tauna au mohintuwu hai Kerisitu, ia mewali manusia au wou. Katuwona au hangkoya liumi. Ia molambi katuwo au wou.

¹⁸ Pue Ala mampopolumao hinangkana ide. Anti kanatanga-tangainta Kerisitu, Pue Ala mopahintuwumoke hai wataNa haduduaNa, hai Naweike bago mopahawe bambari iti i tauna ntanina, bona ihira wori mohintuwu hai Pue Ala.

¹⁹ Idemi bambari au kipahawe: anti petanga-tangaina Kerisitu, Pue Ala mopahintuwu tauna hai wataNa haduduaNa, hai barapi Napailalu salanda. Ikami ide, Naweingkai bago moanti bambari iti i tauna ntanina, bona mohintuwuhe hai Pue Ala.

²⁰ Ikami napokambahume Kerisitu. Kipahawe lolitana Pue Ala irikamu. Moula peundeana Kerisitu, kiperapi mpuu irikamu bona mohintuwukau hai Pue Ala.

²¹ Kerisitu, bara madosa, agayana Pue Ala mopahaleangia dosanta. Ia Napahimbela tauna au madosa bona mopahuru watanta. Tunggaiana Pue Ala bona ikita au mohintuwu hai Kerisitu raimba nodo tauna au manoto i peitaNa.

2 Korintus

Video 2 Korintus 5

Ikuti Kami:

KONTAK | PARTISIPASI | DONASI