Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sẽngaq tiang pade nenaoq bahwe lamun balẽ -- nike awak -- saq taoq ite ndot lẽq gumi niki tebungkar, Allah gen nyedieang ite sopoq balẽ lẽq sorge, saq tepiaq siq Allah mẽsaq dait saq tahen selaẽq-laẽqne.

² Lẽq dalem balẽ saq mangkin niki, ite ngeluh sẽngaq ite melẽt gati ndot lẽq dalem balẽnte saq lẽq sorge nike.

³ Balẽ nike awakte saq baru.

⁴ Sengonẽq ite ndot lẽq dalem balẽ saq lẽman dunie niki, ite ngeluh sẽngaq bandeante berat. Ndẽqne lantaran ite melẽt lepas lẽman awakte saq lẽman dunie niki, laguq lantaran ite melẽt kadu awak saq lẽman sorge nike, adẽq awakte saq iniq matẽ niki tekuasein siq saq idup.

⁵ Malahan Allah mẽsaq saq nyiepang ite jari hal nike, dait Ie ngicanin Roh-Ne tipaq ite jari jaminan.

⁶ Keranaq nike atẽn tiang pade tetep merase kuat. Tiang pade nenaoq bahwe sengonẽq tiang pade masih ndot lẽq dalem awak tiang pade niki, tiang pade masih jaoq lẽman Tuhan.

⁷ Sẽngaq tiang pade idup siq dasar percaye tipaq Almasih, ndẽqne siq dasar lẽq napi saq bau teserioq,

⁸ keranaq nike atẽn tiang pade jari kuat. Tiang pade demenan lepas lẽman awak tiang pade niki, adẽq bau ndot ngiring Tuhan.

⁹ Keranaq nike tiang pade berusahe pacu-pacu jari nyenengang Ie, timaq sewaktu tiang pade masih araq lẽq awak tiang pade lẽq dunie, atao lẽq luahne.

¹⁰ Sẽngaq pasti ite selapuq gen tejauq ojok arepan pengadilan Almasih, dait sopoq-sopoq gen mauq balesan sesuai kance perbuatanne lẽq dunie niki -- perbuatan solah atao jahat.

¹¹ Tiang pade nenaoq napi artine takut lẽq Tuhan; keranaq nike tiang pade berusahe ngeyakinang dengan. Allah wikan lẽq tiang pade, dait tiang harep side pade ẽndah kenal tiang pade lẽq dalem atẽnde.

¹² Siq care niki tiang pade ndẽq tunas adẽq side pade muji diriq tiang. Tiang pade cume mẽlẽ ngebẽng sopoq alasan saq solah lẽq side adẽq jari bangge lẽq tiang pade, adẽq side pade nenaoq berembẽ side pade harus jawab dengan-dengan saq utameang rue dengan dait ndẽq utameang sipatne.

¹³ Lamun tiang pade ruene maraq dengan jogang, nike demi kepentingan Allah. Dait lamun tiang pade ruene waras, nike demi kepentingan side.

¹⁴ Kasih Almasih saq nguasein tiang pade; dait tiang pade sadar bahwe lamun sopoq dengan sampun ninggal umaq selapuq dengan, make artine bahwe selapuq dengan sampun ninggal.

¹⁵ Almasih ninggal jari selapuq dengan, adẽq dengan-dengan saq idup, ndẽqne idup malik umaq diriqne mẽsaq, laguq umaq Almasih saq sampun ninggal dait teidupang malik demi kepentingan ie pade.

¹⁶ Keranaq nike, tiang pade ndẽq malik nilai dengan menurut ukuran manusie. Mule tiang pade sampun nilai Almasih secare manusie, laguq mangkin ndẽq maraq nike malik.

¹⁷ Jari sai saq araq lẽq dalem Almasih, ie ciptean baru: Saq laẽq sampun ndẽq araq malik, setetune saq baru sampun dateng.

¹⁸ Selapuqne nike asalne lẽman Allah. Langan Almasih Allah jariang hubungante jari solah malik kance Ie, terus ite tetugasang adẽq dengan-dengan lain ẽndah bau solah hubunganne kance Allah.

¹⁹ Tiang pade beriteang bahwe siq perantarean Almasih, Allah jariang hubungan manusie kance Ie jari solah malik. Hal nike tejariang siq Allah dait Allah nẽnten nuntut selapuq kesalaqan-kesalaqan saq sampun tepiaq siq manusie tipaq diriq-Ne. Dait tiang pade sampun tetugasang siq Allah jari beriteang kabar nike.

²⁰ Jari, tiang pade utusan-utusan Almasih. Allah sampun nyampẽang manik-Ne langan tiang pade. Demi pesẽngan Almasih, sanget siq tiang pade tunas: Pade terimaq paice lẽman Allah saq bau miaq side pade tedamẽang kance Allah!

²¹ Almasih nẽnten bedose, laguq Allah jariang Ie nanggung dosente, adẽq ite tejariang kenaq lẽq arepan-Ne sehingge hubungante kance Allah jari solah malik.

2 Korintus

Video 2 Korintus 5

Ikuti Kami:

KONTAK | PARTISIPASI | DONASI