Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Nasaba' taissen kumua ia ke diro'pokanmi to bola ba'tu burukmi to batang kale to tanii mari'pih lan tee lino, la napasadianki' Puang Allataala jao suruga mesa' bola ba'tu batang kale baru te'da cappa'na, to tangngia panggaraga tolino.

² Sumarro bangki' lan tee batang kale tanii mari'pih lan tee lino, nasaba' mamali' gajamiki' la mari'pih lan batang kale barunta' jao suruga.

³ Ia ke mari'pihmiki' lan batang kale barunta', te'damo tamangkale-kale.

⁴ Padaki' masainna mari'pih lan tee batang kale lan tee lino, pada tooki' masainna sumarro sanga buda kamaparrisanta'. Tangngiara to kumua madoangki' la'pah jio mai batang kaleta', apa madoangmiki' mari'pih lan batang kale panggaragan-Na Puang Allataala, anna ia tee batang kale la mate disullei batang kale baru to tuo te'da cappa'na.

⁵ Puang Allataala mpasadianki' joo batang kale barunta', nabenki' to Roh Allataala menjaji butti kumua la napugaukki.

⁶ Iamo joo tamawatang tarruh. Taissenni kumua padapiki' masainna mari'pih lan tee batang kaleta', pada toopiki' masainna te'dapa tatorro sola Puang jao suruga.

⁷ Nasaba' ia ke tuo unapiki' lan tee lino, kamatapparanra lako Puang Isa mpatujuki', tangngia apa nakita mata.

⁸ Mawatangki' moi nala'bi takabudai la'pah jio mai tee batang kaleta', antawa'ding mari'pih sola Puang.

⁹ Tapengkulle-kullei mpemasannangngi Puang, la lanpiki' tee batang kaleta', la jaomiki' suruga sola.

¹⁰ Nasaba' la dipangngolo ngasanki' lako Almaseh antapada diben assele' panggaukanta', la panggaukan melo, la panggaukan gaja'.

¹¹ Kiissen apara battuananna to ngkasiri' Puang. Iamo joo kipengkulle-kulleii anna issenni tau kumua ia tee kami' wa'ding dikatappa'i. Naissen tongankan Puang Allataala. Na kurannuan tooi kumua miissenkan.

¹² Te'da kimeta'da kumua ammipujikan, apa madoangrakan mben kamu' wattu melo to la minii mpumasannangkan, ke sioloan kamu' tomajekkong iti' to matampo sanga pengkitanna tau, tangngia sanga sipa'na.

¹³ Ia ke la mangkada susimokan tomame mikita, ia joo urusanki' kami' sola Puang Allataala. Na ia ke la mangkada matana unapakan, ia joo la mipumelona.

¹⁴ Napamasumanga'kan pangpakamoja'-Na Almaseh, sanga kiissen kumua ia ke mesa' tau mpumate sininna tau, pada to kumua sininna tau mate ngasanmi.

¹⁵ Matemi Almaseh ssulle sininna tau, dikua anna ia to kita' to tuo unapa te'damo taturu' pakkaeloranta', apa nturu'ki' pakkaeloran-Na Almaseh, to mangkamo mate natuo pole' ssulleki'.

¹⁶ Iamo joo na te'damo na pangngampa' tolinoki' kipake mpattantui kumua, meloraka ba'tu gaja'raka to tau. Moi denmo kipattantui meloraka ba'tu gaja'raka to Almaseh mpake pangngampa' tolinoki', apa te'damo kisusi joo tee too.

¹⁷ Ia to memmesa' penawamo sola Almaseh, menjaji tau barumo. Lanynya'mi to masainna, anna menjaji baru ngasanmo.

¹⁸ Puang Allataalara to mpugauk ngasanni joo. Nakalino pole'miki' Puang Allataala nasaba' Almaseh, namane' mbenki' jaman kumua na ia to tolaen tapupenjaji todai tonakalino Puang Allataala.

¹⁹ Kipangpeissenan kumua Puang Allataala mpasikalino pole' tolino na kalena, nasaba' Almaseh. Te'damo napallan penawai to kasalan tapugauk lako Ia. Na ia joo kareba kasikalinoan nasuakan Puang mpangpeissenanni lako tolaen.

²⁰ Jaji, topesuannakan Almaseh. Nasuakan Puang Allataala mparatuan kamu' pepasan-Na. Nasuakan Almaseh meta'da lako kalemi, "Pemaringngannii penawammi, ammisikalino pole' Puang Allataala."

²¹ Puang Allataala mpabalahhi Almaseh moi na te'da namadosa. Ia ssulleki', nasaba' dosata', anna pupenjaji tomeloki' nasaba' memmesa' penawaki' sola Almaseh.

2 Korintus

Video 2 Korintus 5

Ikuti Kami:

KONTAK | PARTISIPASI | DONASI