Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Suwesingga emberuk laheyon aru wal tibag sambilen welatfahon ino ninisanggo fam holtuk lit ninilen yet haruk uwag ane men yet haruk uwareg nonoluk atfag ane men nininggareg nininggik fam sen haruk uwahon ino wene mondabi oluk welaruhuwon ino fahet suwesingga aru hit fahet emberuk lahe.
2 Ap mondabi onoluk welamuhup ane inam atfagma niren yet haruk uwag. Yet haruk uwahon ino ketiya niren hit fag toho hiyag hisaruk lahe. Onoluk welamuhup ane ari Ninikni Allah men mangno roho welatfareg inam atfag.
3 Inam atfag ane ari ninil fam yet haruk uwareg ninisanggo fam oho holtuk uwag ane fahet hit men nit men sebe roho welamuhuk ulug hiyag hisaruk lahe. Hit men nit men sebe roho welahe ane ari Ninikni Allah men Amloho Yesus Kristus men oho sebe roho welahe.
4 Nit nenehiyeg anggolo haruk lit welamuhuk ulug alem obog toho aru hit fahet haharoho emberuk lahe.
5 Aren wene hiyag nisibag ane niren holtuk uwareg hit hiyag hisaruk laheyon tu: Allah ino seleg fanowon wereg, At ubam hik teg ane wereg eleg.
6 Hik tegma welahe angge famen, "At men nininggik ahandip toho welahe," uruk lahe halug nenele si ane uruk lit tem peruk ane senetuk lahe fug.
7 Ninikni Allah seleg tegma wereg hag toho nir oho seleg tegma welahe halug nonori men nininggik ahandip toho welahe. Nininggik ahandip toho welahema niren siyag ane turuk laheyon Amloho Yesus amep fam puhunap neneptuk.
8 "Siyag ane turuk ninap welahe fug," uruk lahe halug tem toho peruk ane ninindimu alem yaho elehen nininggareg fahet nenele si ane awiya waruk lahe.
9 Niren siyag ane ari turukuk ulug fag toho uruk lahe halug At indi wirik toho wereg lit pikir ane wenggeltukon inowen siyag ane niren turuk laheyon elehap turuk lit ninindimu siyag ane werehon Aren puhunap neneptuk.
10 "Siyag ane turuk ninap welahe fug," uruk lahe halug Allah ele si ane uruk ahunap turuk lahe ane ariyen At ele fanowon ninindimu foroho lahe fug.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA