Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Surad gini eisaugb Sud Hom Gesai Allah En Moro dou maman. En, kaba, en eic maireseb geb huhugb dou lusud. Sug Allah ahasesei dara esinsin bogo dara cinogo, kaba, en toua moongga desij en sug acgunogohob. Dara emen, kaba, emen emeiya dau Sud Hom Gesai Allah En Moro dara geic maireseb menau geb huhugb dou lusud gini. Hanoba emen emouman dau areg en esai dou emen. Dara emen emehigdecin en an men geicara deigeigouhw namcir. Dara emen emousousa en mos dara emen emsira touohob.
2 Sug Allah ens sud hom geic maireseb menau geb huhugb dou lusud ainyes dou len se cinogo gin, kaba, emen eng emeiya dau en toua. Hang emen emos emadi en dou yen. Dara emen emouma debin en dag enin eng sud hom geic maireseb menau geb huhugb dou lusud dous. Anai Allah ens en ainyes dou mamanohob. Dara en, kaba, eni sud hom gedig eni moongga desij en Mena dau acgunog toua namcir.
3 Dangga men geicara areg emen emeiya, dara areg emen emouman dau sug en esai Allah en mer dou emen, kaba, emen emog dau augwan gini se surad gin dou yen toua. Dauntoba sug yen yecic dau men geicara augwan gin, kaba, arautut yen naugb yen yaimo emen. Dauntoba maman maugwan mamdoc aninim dara Allah Mena dara en Meisi Yesus Krisdus lan toua terimda. Aninim dag emen emdoc dag hom dara lan toua sug nosohob.
4 Anai sug yen yeicara yaimo dag gin, kaba, eic dag emen emdoc agahugouhw medam an namcir. Hang emen emogu augwan dou yen toua.
5 Doba areg Allah Meisi Yesus Krisdus en esai dou emen sug nosohob, kaba, dag Allah men geicara hom ingma emaimo areg se lobeigbogo ginero. Doba men geicara augwan, kaba, aimo areg geb se mouf dous. Hang emen emesai dou yen toua.
6 Dangga gareg dau maman en eigdoumesa enin moho dag en medoc dag hom dara Allah enohob, doba men geicara aimo lobeigbogo men ucina gini terimdaba, kaba, en ereiyara dous. Anai men geicara ens ainyes dag en emaimo areg asesa Allah enin medoc mes touebma. Doba en aimo areg gecgu augwan dag smougb mougwaba.
7 Doba sug maman maimo areg se mouf, aninim dag Allah aimo areg se mouf ginohob, kaba, gini eic dag maman mamdoc emedregim toua deitero. Doba maman mamdoc gororougwim namcir. Hang sesar men gogom emeb naugb maman touwero. Doba Allah Meisi Yesus en mogwihi edu augwan dau maman toua terimda.
8 Dangga gareg dau maman en aideido dougwo men sesar dag ingmaro, kaba, areg misen hom ingma emebsa en medoc mes touebma. Doba gini dag en augwohosa enin dous.
9 Doba sug maman masga maman sesar moho asesa dou Allah, kaba, en medoc dag hom namcir naugb en aigdougwo maman sesar. Dara en medoc edag beim an maman naugb en oguc dougwo sesar augwan dau maman toua. Anai maman madreg areg asesa enin medoc mes toua mougwa einyanohob.
10 Dangga gareg dau maman en ens enin ainyes dou lusud dag en emebesesar mougwa hombuma, kaba, en owun Allah en moho dag en ereiyara namcir. Anai en eng, kaba, en owun maman mamoho dag maman mabesesar dag misenohob. Hang Allah en mer areg en Meisi esai dou mamanohob, kaba, hom emeb se en medoc mes touwero. Doba en medoc dag mes mogud dous.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA