Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ 'Esa moi riaka dodoto ka 'o ngo-ngaku moi, ma sira ngoi nginioka taika ngoi tanu koidadiwa tinisidemo nginika 'isoka 'o nyawaka gee 'onaka de ma 'ena 'o Ngomasa 'Itebi-tebini. Ngoi 'idadi tobicara nginika duga 'isoka 'o nyawaka gee yo'ahu moteke ka 'o duniasi ma mau, 'isoka 'o nyawa gee manga ngo-ngaku ma Kristusika koikuatuawasi so matero ka 'o la'ekatiosi.

² Gee tinisidoto-dotokokau ma sira ge'ena matero ka 'o la'ekati ma 'inomosi tinikula. 'O do-dotoko gee matero ka 'o 'inomo 'i'opi-'opini kotinikulawasi sababu ngini konia'akunuawasi. De ma 'orasi ne'ena mita konia'akunuawasi,

³ ngano ngini nio'ahu moteke ka to ngini nia du-duaka 'ito-torou. Sababu nako ngini kanimakataleanosi, de kanimakaributuosi moi de moi, ge'ena 'isidumutu 'ato ngini nio'ahu moteke ka 'o duniasi ma mau, so kaimatero de 'o nyawa gee kowinakowa ma Jo'oungu ma Dutu.

⁴ Nako naga munuka yongose 'ato, "Ngomi 'o Paulus mimoteke," de munukali yongose, "Ngoi 'o Apolos towimoteke," koge'ena niodi-diai ge'ena 'isidumutu 'ato ngini ge'ena 'isoka 'o nyawa gee yamote-moteke 'o dunia ma mau-mau.

⁵ 'O Apolos de ngoi 'o Paulus ge'ena koifoloiwa 'iparaluu. Ngomi ne'ena duga ka ma Jo'oungu ma Dutu mileleani, gee minisi'asakau niongaku ma Kristusika. Ngomi duga kamiosidagi moi-moi mia manarama gee ma Jou wokulano ngomioka.

⁶ So ngoi ne'ena 'isoka 'o fini totuduku, 'o Apolos 'una watiodo, ma ma Jo'oungu ma Dutu ma sirete wosigo'oo ma fini ge'ena.

⁷ So 'ifoloi 'iparaluu ge'ena ko gee yotudu-tudukuwa de yoti-tiodowa, ma 'ena ma Jo'oungu ma Dutu. Sababu 'una wosigo'oo.

⁸ Ma fini yotudu-tuduku de yoti-tiodo ge'ena kaimatero, moi-moi 'asa yomadamake manga parasengi moteke manga manarama.

⁹ Ngomi ge'ena mimasida-damanarama de ma Jo'oungu ma Dutu, de ngini ge'ena 'isoka ma Jo'oungu ma Dutu 'awi bairi. Mita 'isoka ma Jo'oungu ma Dutu 'awi woa.

¹⁰ De 'o barija ma Jo'oungu ma Dutuno, ngoi ne'ena matero ka 'o woa todiai toba-barija, so 'isoka tadiaikou 'o woa ma fandasi, de 'o nyawa 'iregu ma woa yosigoko ge'ena ma fandaside. Nago'ona bato salingou yosilega yosidi-diai kokia yosigoko 'o fandasi ge'ena ma dekude.

¹¹ Sababu ma Jo'oungu ma Dutu ma sirete wositatapuokau ma Yesus Kristus 'una ge'ena 'isoka 'o woa ge'ena ma fandasi, so koi'iwa 'o fandasi 'iregu.

¹² Ma fandaside ge'ena munuka yosigoko yopake 'o guraci, munuka 'o saaka, munuka 'o teto 'isure-sure de 'ihali-hali, de munuka yopake 'o gota, 'o 'ubutu 'i'osa-'osaka bolo 'o bira ma 'owi.

¹³ 'O nyawa moi-moi manga manarama 'asa ma Kristus walega ma diai ma 'orasi woboali, matero ka 'o 'uku 'okia sonaa 'isitaili. So ge'ena ma wange 'o nyawa moi-moi manga manarama ma sowoko 'asa 'iwaiti 'isure bolo ko'uwa.

¹⁴ Nako 'isi'ade-'ade 'o woa gee yadi-diaide 'o fandasioka ge'ena 'o 'uku 'itahani, 'o nyawa go'ona 'asa yamake 'o parasengi.

¹⁵ Ma nako 'o nyawa manga manarama ge'ena kaya'ukuoka, ma ngale manga manarama 'itorou, ge'ena dua manga parasengi koyamakewa. 'Ona 'asa yakisilaha ma 'isoka 'o 'ukuoka de yakitobakino.

¹⁶ Ngini ma rai nianakokau 'ato ngini ge'ena matero ka ma Jo'oungu ma Dutu 'awi woa, de 'o Ngomasa 'Itebi-tebini 'imanoa nginioka.

¹⁷ Nako naga moikani yatorou ma Jo'oungu ma Dutu 'awi woa, ge'ena ma Jo'oungu ma Dutu mita 'asa wakibinasa 'o nyawa go'ona. Sababu ma Jo'oungu ma Dutu 'awi woa ge'ena ka to 'una duga, de nginiou to 'una 'awi woa ge'ena.

¹⁸ Ka moi ma 'uwa yomasihaga. Nako naga nginioka yomamaoku yobarija moteke 'o nyawa 'o duniaka ne'ena manga di-dibangi, 'o nyawa go'ona salingou yodadi haga-haga de 'o di-dibangi ge'ena, la 'ona ma gou-goungu yobarija.

¹⁹ Sababu gee 'o nyawa 'o duniaka yamaoku 'o barija, ge'ena ma Jo'oungu ma Dutu wamaoku 'o haga-haga. 'O Buku 'Itebi-tebinoka 'isilefoku, "Ma Jo'oungu ma Dutu wapake 'o nyawa yoba-barija manga di-dibangi ma ngale wosikala to 'ona ma sirete manga barija."

²⁰ Naga 'isitulisuku koneda mita, "Ma Jou wanako 'o nyawa yoba-barija manga di-dibangi ge'ena ma faedaa koi'iwa."

²¹ Sababu ge'ena ka moi ma 'uwa nimaie-ie sababu niakimoteke 'o nyawa gee niamaoku yoba-barija. Sababu 'o sagala moi-moi nikulakau 'imadadi to nginiou.

²² 'O Paulus, 'o Apolos, bolo 'o Petrus, 'o dunia ne'ena, 'o 'ahu de 'o songene, ma 'orasi ne'ena de mita ma 'orasi 'asa 'iboa, 'o sagala moi-moi ge'ena to ngini.

²³ De ngini ge'ena to ma Kristus, ma Kristus 'una to ma Jo'oungu ma Dutu.

1 Korintus

Video 1 Korintus 3

Ikuti Kami:

KONTAK | PARTISIPASI | DONASI