Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ee, tomala'bihku' sola ngasan! Ia tongkuiti' unapa, te'da naden kupangkadai kamu' susi tosipangkada tonnampuimo Roh Allataala. Apa susira' tossipangkadan tonturu'pa kamadoangan penawanna, ba'tu butung pea'-pea'pa to kamatapparanna lako Almaseh.

² Iamo joo, ia to kuajaran kamu' iamo to pangngajah madoi' mentama akkalanmi, tangngiapa to pangngajah susi lako tomasaranianmo, sanga te'dapa mikullei ntarimai. Na moi tee too, te'da bang unapa mikullei ntarimai,

³ sanga mituru' unapa to kamadoangan penawammi. Sanga ia ke masere ati unapa kamu', mimassite'geh bang unapa, iamo joo mpabuttii kumua massipa' susi bangpa kamu' to totangnturu' Puang.

⁴ Ia ke den kamu' kumua, "Nturu'na' Paulus," nakua o to laenna, "Nturu'na' Apolos," manassa kumua susipa kamu' to totangnturu' Puang Allataala.

⁵ Sitonganna, ia joo Apolos na ia tee aku' Paulus pada tompangjamanrakan Puang Allataala, to mpatuju kamu' mimatappa' lako Almaseh. Pada kipugauk unamira kami' to nasuankan Puang.

⁶ Aku' ntananni na Apolos nco'bohhi, apa Puang Allataala to mpatuoi.

⁷ Jaji, ia to tomantanan sola tomangbolloh te'da na ia kaminang parallu. Apa Puang Allataalara to kaminang parallu, nasaba' Ia mpatuoi.

⁸ Pada torroanna to tomantanan na tomangbolloh. Pada-pada tooi ntarima assele'na situru' jamanna.

⁹ Ia tee kami', tompangjaman Puang Allataala. Na ia to kamu' butung kamu' bara'bah-Na iarika bola-Na Puang Allataala.

¹⁰ Ia tee aku' napabarakkannina' Puang Allataala bungah mpangpeissenan karebanna Almaseh lako kamu'. Jaji, ia tee aku' wa'ding dipangpasusii pande bola to macca ngkabua' pangrante melo, apa tau leko'ra la mpake'dehhii bola. Na ia to tompangjaman Puang pada la njama melo jamanna, susi pande bola mpemeloii ke mpake'dehhi bola jao pangrante.

¹¹ Nasaba' te'da cara laen menjaji umma'-Na Puang Allataala, saliwanna matappa' lako Almaseh. Jaji, Puang Isa Almasehra to pangrante to mangka napasadia Puang Allataala, te'da pangrante laen.

¹² Den tau mebola bulawan jao joo pangrante, den to mebola salaka, den too tompake batu paramata, apa den too tompake kaju, mpake reu makase ba'tu jarame.

¹³ Ia to jamanna tau pada la pajanni ke ratu pole'mi Almaseh la rra'tah kara-karana tolino, nasaba' ia joo wattu api la pada mpamanassai to jamanna.

¹⁴ Ia ke denni bola te'da nakandei api, la nnampa' pahalana joo tompake'dehhi.

¹⁵ Apa ia ke nakandei api, la kata'dean pahalana joo tompake'dehhi. Battuananna la salama' ia, apa susimira to kumua mpella'paranri kalena lan mai api.

¹⁶ Ee, tomala'bihku' sola ngasan! Manassa miissen kumua kamu'mo bola-Na Puang Allataala, sanga torromi to Roh Allataala lan kalemi.

¹⁷ Ianna den tau nggaja'-gaja' kasikalinoanna umma'-Na Puang Allataala, la nagaja'-gaja' todai Puang Allataala joo tau. Nasaba' ia to bola-Na Puang Allataala, ia mandara Ia la ntorroii, na kamu'mo joo bola-Na.

¹⁸ Danggi' lalo naden tau nnuraga kalena. Ianna den tau lan tangnga-tangngami ssanga kalena paissen situru' kapaissenan tolinona, la'biran ke mbangosanni kalena jolo', nawa'ding menjaji topaissen situru' Puang.

¹⁹ Nasaba' ia to disanga kapaissenan lan tee lino, nasanga kabangosanri ia Puang Allataala. Diuki' lan Sura' Allataala kumua, "Kadanna to tossanga kalena paissen nanii njokkoi Puang Allataala."

²⁰ Diuki' too lan Sura' Allataala kumua, "Naissen Puang kumua te'da bua'na to tangngahna topaissen."

²¹ Iamo joo danggi' lalo naden tau misanga mala'bih na ia to tau laen. Sininna joo naben ngasanmo kamu' Puang la mipumelo.

²² La Paulus, Apolos na Petrus, la ia tee lino, la katuoan na kamatean, la ia tee too la jiona ahera', la mipumelona ngasan.

²³ Na ia to kamu', apan-Na kamu' Almaseh, na ia to Almaseh apan-Na Puang Allataala.

1 Korintus

Video 1 Korintus 3

Ikuti Kami:

KONTAK | PARTISIPASI | DONASI