Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sampesuvu-sampesuvu, tempo yaku naria nte komiu, ledo nitesaku ka komiu nasimbayu mpo nitesaku ka tona nikuasai Nosa Gasa nu Alatala. Tapi nitesaku ka komiu nasimbayu mpo nitesaku ka tona anu da nangoseaka dota rarara nadaa bo ledo naria Nosa Gasa, apa pomparasayamiu i Kristus dopa naroso. Komiu da mpo ngana kodi.

² Ledo nipakule ngana kodi nangande kandea ntotua. Ivesia muni komiu. Tempo haitu, nipatudukiku ka komiu pepatuduki masipato ka tona dopa naroso pomparasayara, sabana dopa nipakulemiu mantarima pepatuduki nakaja. Bo sampe sii-sii dopa muni nipakulemiu mantarimana

³ apa komiu da nangoseaka dota raramiu nadaa. Komiu da nasiriati bo nosipobali. Pokainggu ivehaitu nompopakita komiu da nangoseaka dota raramiu nadaa nasimbayu mpo tona ledo nosisani ante Alatala.

⁴ Saito nanguli, "Yaku hii topangoseaka i Paulus," bo saito vai nanguli, "Yaku hii topangoseaka i Apolos." Pokainggumiu haitu nompakalanto komiu da mpo tona ledo nosisani ante Alatala.

⁵ Pekirimo! Isema yaku? Bo isema i Apolos? Kami aga batua-batua nu Alatala nanggeni komiu nomparasaya i Yesus. Kami aga batua anu simbo nokarajaa pokarajaa nidekei nu Alatala ka kami.

⁶ Yaku hii nirapaka topotuda bo i Apolos nirapaka topodundusi. Tapi Alatalamo anu nompakatuvu tuda-tuda.

⁷ Topotuda bo topodundusi ledo masipato raparibavo. Anu nopoko, iamo Alatala, apa Iamo topompakatuvu tuda-tuda.

⁸ Topotuda bo topodundusi nasimbayu, bo ira simbo mantarima tambo nangoseaka kantamo pokarajaara mboto.

⁹ Apa kami bo i Apolos nosampokarajaa ante Alatala, bo komiumo nirapaka talua nu Alatala. Komiu muni nirapaka banua nu Alatala.

¹⁰ Yaku hii eva topande novia banua. Lako ri kabelo rara nu Alatala, nianggatakaNa bo nipopompakuleNa yaku novia pandasi banua, bo tona ntanina nombabangu banua ri bavo nu pandasi haitu. Tapi simbo rabanguna pakabelo-belo.

¹¹ Apa pandasi anu nipovia mamimo, haitumo i Yesus Kristus. Ledo ria pandasi ntanina.

¹² Ane topokarajaa ka Alatala nabelo pokarajaana, ia namala rarapaka topovia banua anu nombabangu ante bulava, salaka, bo vatu nasuli ri bavo nu pandasi haitu. Ane topokarajaa ka Alatala ledo nabelo pokarajaana, ia namala rarapaka topovia banua anu nombabangu ante kayu bara jono bara kada mpae.

¹³ Rapana ane mapapu banua, tantu pareva nabelo nipake novia banua haitu maboli, tapi pareva ledo nabelo mapapu puramo. Ivesia muni ante pokarajaa ntopokarajaa ka Alatala. Kabelo nu pokarajaara saito-saito kana rapakalanto bara maipia tempo i Yesus makava mpanjili ri dunia. Pokarajaara haitu rauji nu Alatala ala malanto pokarajaara haitu bara mabelo bara ledo.

¹⁴ Ane nabelo pokarajaara rakita nu Alatala, topokarajaa haitu manggava tambo lako nte Alatala.

¹⁵ Tapi ane ledo nabelo pokarajaana rakita nu Alatala, ledo maria tambo radekei ka ia. Malipo tambona tapi karona masalama. Ia nasimbayu mpo tona napapu banuana bo damo karona nggoo ledo nikande nu apu.

¹⁶ Sampesuvu-sampesuvu, ledo nisanimiu komiu nasimbayu mpo banua niponturo nu Alatala? Bo Nosa GasaNa nonturo ri tatangamiu.

¹⁷ Isema-sema mombagero banua niponturo nu Alatala haitu, ia kana rahuku nu Alatala, sabana banua haitu nagasa. Toramo! Komiumo banua haitu!

¹⁸ Nee mombabagiu karomiu mboto! Ane maria nte komiu tona nompekiri karona mboto napande ri panggita nu manusia, agina ia majadi madoyo ri panggita nu manusia ala ia mpuu-mpuu majadi mapande.

¹⁹ Apa anu nireke napande ri panggita nu manusia nadoyo ri panggita nu Alatala. Evamo nitulisi riara Buku Gasa ivei: "Alatala nompakanavu tona natau ante akalara mboto."

²⁰ Bo naria tesa ntanina nanguli ivei: "Nisani nTupu ledo ria gunana pekiri ntona natau ri dunia."

²¹ Jadi ane ivesia, tumo mangoe ka pakeni-pakenimiu ri dunia hitu. Kakanana pura-pura nidekei nu Alatala ka komiu majadi anumiu.

²² I Apolos, i Petrus, bo yaku nidekei nu Alatala ka komiu majadi topotulungi komiu. NidekeiNa muni katuvu nabaru ka komiu bo nikabasakaNa komiu lako ri kamate. Nuapa-nuapa naria riara dunia hitu, nuapa-nuapa najadi sii-sii bo nuapa-nuapa majadi bara maipia nipakatantu nu Alatala manggeni belo ka komiu. Pura-pura haitu bagiamiu,

²³ bo komiu bagia i Kristus, bo i Kristus bagia nu Alatala.

1 Korintus

Video 1 Korintus 3

Ikuti Kami:

KONTAK | PARTISIPASI | DONASI