Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Tolano-tolanoo ngala lemin! Tunga ndoo na, au ta kokolak o tolanoo ka sama leo au kokolak o hataholi fo Manetualain Dula Dale na dalen dale. Au kokolak o emi, ka'da sama leo au kokolak o hataholi fo bei naso'da tunga hihii-nanau daebafa ka; ma sama leo au kokolak o hataholi fo bei ni'iana beuana nai namahehelek neu Kristu sa dalek.

² Makahulu na, au fe emi ka'da nana'a ni'iana beuana, te ta hataholi taouina ka nana'a na fa; nana emi balakai ma beita dai soaneu ndia fa. Besak ia boeo, emi balakai ma beita dai soaneu ndia fa,

³ nana emi bei maso'da tunga emi ha'da-tatao daebafa ma. Nana metema emi bei mape'da dalek ma esa nahote no esa soona, ade ndia ta natu'du nae, emi bei maso'da tunga ha'da-tatao hataholi daebafa ka, sama leo hataholi fo ta nalelak Manetualai na fa do?

⁴ Metema hapu nggelok lafa'da lae, "Au tunga Paulus", ma nggelok lae, "Au tunga Apolos" soona, ade ndia ta nafa'da nae, tolanoo ka ha'da-tataom bei sama leo hataholi daebafa ka fa do?

⁵ Tunga ndoo na, see Apolos ndia? Ma see Paulus ndia? Ami ka'da Manetualain malalau-maoonon, fo hela-nole basa emi soaneu mamahele neu Kristus. Ami makalala'ok ka'da tatao-nono'ik fo Lamatua ka paletan neu ami esa-esak.

⁶ Au sele, ma Apolos tee tee, tehu Manetualain nde nakamomoli ka.

⁷ Da'di paluu ka nde Manetualain dei. Nana Ndia nde nakamomoli ka. De manasele no manatee tee a, ta paluu fa.

⁸ Duas nde bee na bekededemak. Neukose ala sipo ngga'di, tunga esa-esak sosota-mamangun.

⁹ Ami nde bee na hataholi fo sama-sama maue-male'di soaneu Manetualain; ma emi nde bee na, sama leo Manetualain tina-osin. Tolanoo kala nde bee na, sama leo Manetualain uma na boe.

¹⁰ No Manetualain fe au malela ka de, au da'dileo ndolu uma malelaina, de au tao basa uma ndia fandere na so, boema hataholi fe'ek nde nafofo'a uma ndia neu fanderen ndia lai na. Hataholi a esa-esak, muse taoafik matalolole, tao leo beek fo nafofo'a uma ndia neu fanderen ndia lain.

¹¹ Nana Manetualain mesa kana nde tao Yesus Kristus da'dileo fanderen kisak soaneu uma ndia; de ta hapu fanderen fe'ek fa.

¹² Hapu nggelok lafofo'a uma nai fanderen ndia lain, ninik ala pake lilopilas, nggelok ala pake lilofulak, nggelok ala pake poemata, nggelok bai soona, ala pake ai, na'u tuk do ha'deaik boe.

¹³ Hataholi a esa-esak ue osan neukose nananitak nai faik fo Kristus fafali ma'i na. Nana neu faik ndia te, neukose ha'i nde tao na hataholi a esa-esak ue osan nananitak. Neukose ha'i nde fola ma naketu ue osak sila matea-mahelen.

¹⁴ Metema hataholi napadedeik uma neu fanderen ndia lain soona, nakatatakak fo ha'i ta na'a fan de neukose hataholi ndia ana sipo ngga'di na.

¹⁵ Tehu metema hataholi ndia ue osan ha'i na'ahenin soona, neukose ana tu'da; neukose aoina na naso'da, tehu sama leo hataholi fo besa ka nala ha'i selik.

¹⁶ Ade tolanoo ka bubuluk mae, emi ia Manetualain uman do ta? Ma Manetualain Dula Dale na, ana leo nai emi dalek do ta?

¹⁷ Metema hapu hataholi tao nalutu Manetualain uma na soona, neukose Manetualain boeo tao nalutu hataholi ndia. Nana Manetualain uma na nde bee na, soaneu ka'da Manetualain mesa kana, fo emi nde uma ndia.

¹⁸ Boso hataholi esa boen ke'dindiu seluk aoina na. Metema hapu hataholi nai emi dalek, name'da aoina na manatee tenok tunga uuku-dodoo daebafak ia soona, hataholi ndia muse ana da'di hataholi nggoak, fo ela te'e-te'e ana dadi hataholi manatee tenok.

¹⁹ Nana daebafa ka nafa'da nae manatee tenok soona, manatee tenok ndia nggoak tunga Manetualain mata memete na. Nana nai Susula Malalaok dale nanasulak nae, "Manetualain nakahihi'ik hataholi manatee teno kala ninik sila malela na."

²⁰ Hapu nanasusulak nae leo ia boe, "Lamatua ka bubuluk basa hataholi manatee teno kala dudu'a-aafin nde bee na dudu'a-aafi sosoa-ndandaa tak."

²¹ Hu ndia de, hataholi esa boen boso mamatutua-madedema hataholi daebafa ka, nana basa hata lala'ena nanafe basak da'di emi nuum so:

²² Paulus, Apolos, Petrus, daebafak ia, maso'da ka ma mamate sa, le'do fai besak ia, do le'do fai manamai ka boe, basa hata lala'ena nde bee na, emi nuum so.

²³ Ma emi ia Kristus nuun, ma Manetualain nuun Kristus.

1 Korintus

Video 1 Korintus 3

Ikuti Kami:

KONTAK | PARTISIPASI | DONASI