Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Tumuhụ hinone iạ e tawe makawisara ringangi kamene mẹ̌sul᷊ungu taumata piạ Rohkẹ̌ u Ruata. Iạ tumbạeng makapẹ̌bisara ringang i kamene kere ringangu taumata kụ bẹ̌dang mẹ̌bẹ̌biahẹ̌ tụtuhụ ěnningu dunia; kere ringangu manga rariọ bẹ̌dang sụsusu su ral᷊ungu pěngangimang si Kristus.
2 Nạung, iạ kẹ̌taeng makạkaghěllị u kaěngu manga rariọ, bal᷊inewe kaěngu taumata matatěllang; u i kamene reng ta nạtoghasẹ̌ baugu ene. Kai orasẹ̌ ini e i kamene delaing ta nạtoghasẹ̌,
3 u i kamene kai reng měbẹ̌biahẹ̌ tụtuhụ lulun taumata. U kamageng i kamene wẹ̌dang piạ u sụsingking dingangu mẹ̌dẹ̌dal᷊ia sěmbaụ dingangu wal᷊ine e, ute ene wal᷊inewe měnẹ̌nodẹu i kamene wẹ̌daweng tụtuhụ lulun taumata e, kere taumata wẹ̌gan Mawu Ruata?
4 Kereu piạu mẹ̌berau, "I kami tumol᷊e si Paulus," dingangu wal᷊ine e nẹ̌berau, "Iạ tumol᷊e si Apolos," ute ene wal᷊inewe mělẹ̌lahẹu i kamene taumatan dunia tangu?
5 Tumuhụ hinone ute kai i sai tangu i Apolos ene? Dingangu kai sai tangú i Paulus? I kami e kẹ̌tạewem mẹ̌tatangkiang Mawu e, seng němihing si kamene tadeạu mangimang si Kristus. I kami e kẹ̌tạben mẹ̌děndal᷊engu munara nitilakehu Mawu e si kami sěngkatau-sěngkatau.
6 Iạ e mẹ̌sasuange ringangu i Apolos měnaněbohe, arawe Mawu Ruata sẹ̌sane e mapạtuwon sasuange.
7 Kụ kakal᷊imonaěnge ute kai Mawu Ruata, batụu kai i Sie napatuwo e. Mẹ̌sasuange ringangu měnaněbohe ute tawe sěngapa;
8 irẹ̌dua e kai sěndẹ̌dagẹ̌. Sěngkatau-sěngkatau e sarungbe měnarimạu wuan saghede.
9 I kami e kai taumata lawọ měmamunarane waụgu Mawu; ringangu i kamene e ute kai kere waelu Mawu. I kamene lai e kai kere wal᷊en Mawu.
10 Kụ ual᷊ingken kapande nionggọ u Ruata, iạ e al᷊ingkai masasingkạ u bangunang e sen naměllọ u pondasi waugu godoěng ene e, ringangu taumata wal᷊ine e němangung godoěng suwowom pondasi ene. Apan taumata e harusẹ̌be tatingang pakapia kereapa kakakoạ e i sie němangung suwowom pondasi ene.
11 U Mawu Ruata sẹ̌sane e seng naměllọ i Yesus Kristus samatang batu pinamanggilangu ghọdoěng ene; kụ tawẹ apa pondasi wal᷊ine.
12 Piạben němangung su wowom pondasi ene nẹ̌pakẹu wul᷊aeng, piạben nẹ̌pakẹu sal᷊aka, piạben nẹ̌pakẹu watu intang-paramata, piạu l᷊ai nẹ̌pakẹu kalu, rěmpugẹ̌ hẹ̌gu arau rahami.
13 Munarang sěngkatau-sěngkatau e sarungbe lumětạ hẹ̌don su tempong i Kristus e ruměnta kapia. U su ěllo ene e putunge sarung mapakal᷊ahẹu hal᷊ẹ̌ u sěngkatau-sěngkatau. Putunge sarung měnahị dingangu měnilakehu lětạ u hal᷊ẹ̌ ene.
14 Kereu wal᷊e nirarisị u taumata su wowom pondasi ene e makẹ̌dang su putung ene ute, taumata ene e sarungbe makatarimạ u tatendenge.
15 Kai kereu hal᷊ẹ̌ e ene kawe matutung ute i sie sarung kailangengu tatendenge, kaiso i sie ute maambang, katewehó mẹ̌sul᷊ungu taumata nakal᷊awesẹ̌ bọu putung.
16 I kamene masingkạ bue watụ u i kamene e kawe Wal᷊em Mawu? Mase Rohkẹ̌ u Ruata e kawe mạtanạ su ral᷊ung'i kamene?
17 Kereu piạu měnggoghahẹ̌ Bal᷊em Mawu, ute Mawu e sarung měnggoghahẹ̌ taumata ene. U wal᷊en Mawu e kai natěntani waugu Mawu sẹ̌sane, kụ kai i kamene wal᷊e ene.
18 Kụ kumbahang bue piạu měngakal᷊ẹ̌ batangenge. Kereu piạu wọi kamene makapěndang batangenge matahuěnna tumuhụ ukurangu dunia e, ute taumata ene e harusẹ̌ makoạ taumata wodo, tadeạu i sie kahěnga-hěngang matahuěnna.
19 U isaing itẹ̌tikạ matahuěnna kahian dunia e ute kai wodo su matan Mawu e. Su ral᷊ungu Winohẹ Susi mạbawohẹ, "Mawu e měnamẹ taumata matahuěnna e su ral᷊ungu kapanden sire hala e."
20 Piạ l᷊ai kạbawohẹ kere ini, "Mawu e masingkạ u tiněnnan taumata matatahuěnna e ute kai tiněnnawe tawẹ gunane."
21 Ual᷊ingu ene, kumbahangbe piạu sěngkatau e rụl᷊esạ u taumata, u patikụ sạbarange seng nịlaonggọ nakoạ tataghuanengu:
22 Paulus, Apolos, Petrus, dunia ini, pẹ̌bawiahẹ̌ dingangu papate, tempo ini, arau tempo ramahi kạděntane, patikụ sabarange kai tataghuanengu.
23 Dingangu i kamene e kai tataghuaneng'i Kristus, mase i Kristus e kai tataghuanengu Ruata.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA