Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Mongowutata ngoimani, tou omo-omolu wau pe'epe'enta wolimongoli, wau dila mowali mobisala wolimongoli odelo ta mobisala wolo manusiya ta o Roh lo Allahuta'ala. Wau hemobisala ode olimongoli bo odelo ta mobisala wolo manusiya ta hepotoloduniyawa, sababu timongoli donggo odelo ta kekeingo dipo boti pahamu tomimbihu pongajari li Isa Almasih.

² Bo ualo lo ta ukekei u yilohiu ode olimongoli, dila ualo lo ta dudulamango, sababu timongoli dipo mowali mololimo. Wawu sambe masatiya olo, timongoli debo dipo mowali mololimo,

³ sababu timongoli hetumula odelo manusiya hepotoloduniyawa. Wonu to wolota limongoli donggo woluwo ta mohihiya wawu ta bibibonga, uwito mopopatatayi deu timongoli manusiya hepotoloduniyawa wawu timongoli hetumula odelo manusiya ta dila motota lo Allahuta'ala.

⁴ Wonu to wolota limongoli woluwo ta hepoloiyawa odiye, ”Wau lonto lemboa le Pawulus” wawu ta wuwewo hepoloiyawa odiye, ”Wau lonto lemboa le Apolos,” uwito mopopatatayi deu timongoli hetumula odelo manusiya ta dila o Roh lo Allahuta'ala.

⁵ Tatonu te Apolos boyito? Wawu tatonu olo te Pawulus? Ami bo wato li Isa Eya ta hepoponaowa lo tugasi u yilohi li Isa Eya ode olami ngota-ngota. Loli olami timongoli ma lowali paracaya ode oli Isa Almasih.

⁶ Wau ta lopomulo wawu te Apolos ta lomuhuto, bo Allahuta'ala ta lopotumulo.

⁷ Sababu uwito, dila boti paralu ta lopomulo meyalo ta lomuhuto; Allahuta'ala ta lopotumulo ta lebe paralu.

⁸ Ta lopomulo meyalo ta lomuhuto tutuwawuwa patujuliyo wawu ngota-ngota mololimo hasili motu'ude wolo u kilarajaliyo,

⁹ sababu ami tamani ngopokarajawa wolo Allahuta'ala wawu timongoli ilengi lo Allahuta'ala. Timongoli olo hudungu lo Allahuta'ala.

¹⁰ Wau odelo ta ahali mohutu hudungu ma lopodutu mao lo pandasi motu'ude lo rahmati lo Allahuta'ala u ma yilohi-Liyo mayi ode olau wawu tawu wuwewo ta lopoturusi lomongu. Bo timi-timi'idu tawu musi mopo'obilohu wololo tiyo musi momongu to yitato pandasi boyito.

¹¹ Sababu diyaluwo ngota mao ta mowali mopodutu lo pandasi wuwewo, ngopohiya lo pandasi u ma dutu-dutu boyito, deuwitoyito ti Isa Almasih.

¹² Woluwo ta momake hulawa, momake tala'a meyalo momake botu intani momongu to yitato pandasi boyito. Wawu woluwo olo ta momake ayu, momake padenga mohengu meyalo momake pawodu.

¹³ Ma medungga mayi wakutuliyo, karaja lo ta ngota-ngota ma ontonga to dulahu ukiyama. Sababu to dulahe boyito tulu ma mopopatatayi lokaraja lo ta ngota-ngota mo'otahangi ujiyoliyo meyalo dila.

¹⁴ Wonu u ma bilongu lo tawu boyito mo'otahangi, ta lokaraja boyito ma mololimo pahala monto Allahuta'ala.

¹⁵ Wonu u kilarajaliyo boyito mopobu, ta lokaraja boyito ma rugi ngohuntuwa, bo tiyo lohihilawo salamati bo odelo ta lonto delomo tulu.

¹⁶ Tantu otawa limongoli deu timongoli boti bele lo Allahuta'ala wawu Roh lo Allahuta'ala tola-tola to delomo batanga limongoli.

¹⁷ Wonu woluwo ta mongantulu bele lo Allahuta'ala, tiyo ma antuluwo lo Allahuta'ala, sababu bele lo Allahuta'ala yito haku lo Allahuta'ala, deuwitoyito timongoli.

¹⁸ Dila bolo pongakali batanga limongoli lohihilawo. Wonu woluwo to wolota limongoli ta hemonganggapu batangaliyo motota to duniya boti, tiyo musi motitihulodu, alihu tiyo mowali otutu motota.

¹⁹ U heanggapuwo lo tawu tota to duniya, hulodu to talu lo Allahuta'ala. Odelo loiya tula-tulade to kitabi odiye, ”Tiyo moheupa ta motota to duniya wolo totaliyo lohihilawo.”

²⁰ To tambati wuwewo to kitabi woluwo tula-tulade olo odiye, ”Otawa lo Allahuta'ala totonulala pikirangi lo ta motota to duniya, nga'amila diyalu mao hunaliyo.”

²¹ Wonu odito, poberentilo mopolanggato tawu, sababu uhetuwa-tuwawuwa yilohi mayi lo Allahuta'ala ode olimongoli:

²² te Pawulus, te Apolos, te Petrus, duniya boti, tutumulo meyalo umate, wakutu masatiya meyalo wakutu hedunggawa mayi, nga'amila ulimongoli.

²³ Wawu timongoli haku le Almasih wawu te Almasih haku lo Allahuta'ala.

1 Korintus

Video 1 Korintus 3

Ikuti Kami:

KONTAK | PARTISIPASI | DONASI