Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 O kinanak-kinanakku, atun ui na miak pebala nemuyuh mepad kudeng kuan lemulun luk inan Roh. Ui nepebala nemuyuh mepad kudeng kuan lemulun luk maya' ulun tana' ini, ieh ineh mepad kudeng anak isuut bang Keristus.
2 Idi ui nemaré rata kuan muyuh, baken nuba'; ngaceku muyuh nateh rayeh, idi macing nekini pana' nateh muyuh rayeh ngaceku muyuh lakat mulun maya' ulun tana' ini.
3 Ngaceku kudeng inan ét niat idi kedaluh arang muyuh, bakenké muyuh bang ulun tana' ini idi maya' ulun lemulun luk bang tana' ini?
4 Ngaceku kareb lemulun pebala, "Ui ini Paulus kuan," idi luk baken pebala, "Ui ini Apolos kuan," bakenké muyuh lemulun luk maya' ulun tana' ini?
5 Idéké Apolos ineh? Idi idéké Paulus ineh? Kai ini demulun Allah mo', luk nenguit nemuyuh manu. Anid-anid burur kai nganau' kekamen luk barén Tuhan kuan kai.
6 Ui ini luk nenibu, idi Apolos luk mubpur, iamo' Allah luk ngulun neneh.
7 Luk nibu ineh na luk idi anun-anun, idi luk mubpur ineh pana' nateh luk idi anun-anun, iamo' Allah sebuleng luk ngulun tibu ineh.
8 Idi luk nibu idi luk mubpur ineh mepad mo', iamo' anid-anid burur miak ngalap tabparneh sebuleng, maya' kekamenneh sebuleng.
9 Ngaceku kai lemulun pad-pad ngakem dengan Allah, idi muyuh ini lati' Allah. Muyuh ini pinginud aceh ruma' Allah.
10 Idi maya' baré Allah kuanku, ui nenganau' kekamen lun luk mileh mudut ruma' ineh. Ui nenaped dirineh, idi lun baken mudut luun ineh. Iamo' nima' anid-anid burur ngerawé kudeng apeh luk pidutenneh ineh.
11 Ngaceku diri luk baken na miak benen seburur pana', iamo' luk pangeh ibpen, ieh ineh Yésus Keristus.
12 Sebuang lemulun mudut ruma' amas, pirak, idi batu-batu luk meraga, idi lun baken makai kayuh, uduh luk tekering, idi don pa luun diri ineh.
13 Idi kekamen anid-anid burur miak uen ngelio, ngaceku Aco Keristus ineh miak ngegala' neneh, ngaceku kekamen ineh uen ngelio ku apui; idi apui ineh sebuleng miak nutun kekamen anid-anid burur.
14 Kudeng kekamen seburur ketecan, luk pinudutneh pa luun diri ineh, kali' rungen ieh miak ngalap tabparneh.
15 Kudeng kekamen seburur neseb, kali' rungen ieh merugi'. Iamo' ieh sebuleng miak uen ngulun, iamo' mepad kudeng lemulun luk muit bururneh ratnan apui.
16 Naké muyuh kali' idi muyuh ini ruma' Allah idi Roh Allah tudo bang nemuyuh?
17 Kudeng seburur lemulun ngusag ruma' Allah, idi ieh miak uen Allah ngusag teh. Ngaceku ruma' Allah ineh meligan, ieh ineh burur muyuh.
18 Aleg seburur pana' naluk bururneh sebuleng. Kudeng idé lemulun rat arang muyuh ngerawé bururneh sebuleng mileh bang tana' ini, nima' neneh mangun mebacé, pelé ieh miak mangun mileh.
19 Ngaceku ileh tana' ini mangun ku bacé kuan Allah. Ngaceku pangeh inayud, "Idi Tuhan ngakem lemulun luk mileh ineh bang ilehneh sebuleng,"
20 idi teh pangeh inayud, "Tuhan kali' ratnan terawé lemulun luk mileh ineh na ulek."
21 Ngaceku ineh aleg seburur pana' ngedita' bururneh ratnan ileh lemulun. Luk amung-amung pangeh biré kuan muyuh,
22 Paulus, Apolos, Pétrus, tana' ini, ulun idi até, luk inan nekini idi luk sikal macing teh, amung-amung ineh muyuh kuan.
23 Idi muyuh ini Keristus kuan, idi Keristus Allah kuan.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA