Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ 'O Yesus wolahidoaka koge'ena, deika 'una de 'awi do-domoteke yotagi 'o Kidron ma 'akere ma songene ma songonaka. Ge'enaka 'o bairi 'o ngai moi so 'o Yesus de 'awi do-domoteke yowosanga ge'enaka.

² 'O Yudas gee 'o Yesus wiwuku-wukunu gu'una, wosikanako 'o ngii ge'ena; sababu 'o Yesus de 'awi do-domoteke 'ijaga yomalomu-lomuou ge'enaka.

³ So 'o Yudas wotagi ge'enaka de waki'asa 'o Romaka ma tentara 'o bolu moi de ma Jou 'awi Woa ma jo-jaga yamuruo naga gee 'o 'imam ma sae-saeke de 'o Farisioka yakisuloko. 'Ona yo'asa 'o dae, 'o poci, de 'o burane.

⁴ 'O Yesus wanakokau 'iodumu gee dua 'idadi 'unaka. So womasisori gee yoboa-boano go'ona de wosano,

⁵ "Nagu'una wininonu?" 'Ona yosango, "'O Yesus 'o Nazaret ma nyawa." 'O Yesus wongose, "Ngoiou ne'ena." 'O Yudas gee 'o Yesus wiwuku-wukunu gu'una woma'okode ge'enaka de de 'ona.

⁶ Gee 'o Yesus wongose 'ato, "Ngoiou ne'ena," de 'ona yoodumu yomasidorusu manga dudunoko de kayaruba.

⁷ Ma moiosi 'o Yesus wosano 'onaka, "Nagu'una wininonu?" 'Ona yosango, "'O Yesus 'o Nazaret ma nyawa."

⁸ 'O Yesus wongose, "Tosidemokau 'ato ngoiou ne'ena. De nako ma goungu ngoi ninonu, niakimadaka 'iregu-regu gee yotagi."

⁹ (De koge'ena wongose, 'idadiokau 'okia naga gee 'o Yesus wosidemokau bene'ena koidadiwasi 'ena: "'Aba 'o nyawa gee ngoino nokula-kula, ka moi ma koyoisanguwa.")

¹⁰ 'O Simon Petrus gee 'o wase 'o ngai moi wo'asa, wa'aikie de wisi'oto ma 'Imam ma Amoko 'awi ro-riwoka so 'awi ngauku ma giniraka ma 'itoaka. 'O ro-riwo gu'una 'awi ronga 'o Malkus.

¹¹ So 'o Yesus kawongosekau 'o Petrusika, "'Ani wase nasarumukoli! Bolo ngona nongose ngoi kotomodekuwa? tosangisara moteke 'ai Dea wositatapuokau?"

¹² Ge'enaka de 'o Romaka manga tentara de manga kapita de ma Jo'oungu ma Dutu 'awi Woa ma jo-jaga 'o Yesus witagoko de wipusuku.

¹³ Ma si-siraka 'ona 'o Yesus wi'asa wisitaari 'o Hanasika, 'o Kayafas ma toroa. 'O Kayafas ge'ena 'o 'Imam ma Amoko moi ma taunu ge'ena.

¹⁴ De 'unau ge'ena wakidongosekau 'o Yahudioka manga balu-balusika 'ato 'ifoloi yaowa wimoi wosongene ma ngale to ngone nanga nyawa yoodumu.

¹⁵ 'O Simon Petrus de 'o do-domoteke 'iregu wimoi 'o Yesus wimoteke. 'O do-domoteke 'iregu gu'una 'o 'Imam ma Amoko winako; so 'una mita wowosanga de 'o Yesus ma 'Imam ma Amoko 'awi ginitarika.

¹⁶ 'Ena 'o Petrus 'una wota-tamaa ma dudunoka, 'o ngoranoka. Ge'enaka de 'o do-domoteke 'iregu gu'una wosupu de wobi-bicara de 'o ro-riwo mimoi gee 'o ngorana mojaga-jaga, ge'enaka de misingosama 'o Petrus dokaika 'o ginitarika.

¹⁷ 'O ro-riwo 'o ngorana mojaga-jaga gumuna kamongosekau 'o Petrusika, "Ee, ngona mita 'o nyawa gu'una 'awi do-domoteke?" 'O Petrus wosango, "Ko'uwa."

¹⁸ Ma 'orasi ge'ena 'o 'alo 'isupuokau so 'o roro-riwo de yojaga-jaga go'ona 'o 'uku yotaulieu de yomasaukikau ge'enaka. 'O Petrus waika de woma'okode womasauku de de 'ona.

¹⁹ Ma 'Imam ma Amoko 'awi ngiioka de 'o Yesusika wisano ma ngale 'awi do-domoteke de 'awi do-dotoko.

²⁰ 'O Yesus wosango, "Ngoi kaitaurika tobi-bicara tositi-tiaika 'o kawasa ma bionoka, kaitaurika todotoko 'o lo-lomu ma woa-woaka de ma Jo'oungu ma Dutu 'awi Woaka, gee biasa 'o Yahudioka yomalomu-lomu ma ngiioka. Koma'iwa 'o kianikia tosidemo tosipongo-pongono.

²¹ 'Ido'oa so ngona nosano ngoino? Nakisano 'ona gee yo'ise-'isenokau ngoi todotoko. Ma raiokau 'ona yanako 'okia tongose."

²² Gee 'o Yesus koge'ena wongose, de 'o jo-jaga wimoi ge'ena wopoka 'o Yesusino de kawongosekau, "De nomoroinoka nobicara koge'ena 'o 'Imam ma Amokika!"

²³ 'O Yesus wosango, "Nako ngoi tosidemo 'o kianikia ko ma gounguwa, kaniosidemo bato. Ma nako 'okia naga tosidemo-demo ge'ena la ma goungu, 'ido'oa so noipoka?"

²⁴ Ge'enaka de 'o Hanas wosuloko 'o Yesus wi'asa de wibu-busuoka 'o Kayafasika ma 'Imam ma Amoko gu'una.

²⁵ 'O Simon Petrus kawomasaukikasi woma'okode ge'enaka, de 'o nyawa-nyawa kayongosekau 'unaka, "Ma rai ngona mita 'o nyawa gu'una 'awi do-domoteke. Bolo?" Ma 'o Petrus womasipongono wongose 'ato, "Ko'uwa!"

²⁶ 'O 'Imam ma Amoko 'awi ro-riwo wimoi ge'ena la 'o araka moi de 'o nyawa wimoi gee 'awi ngauku 'o Petrus wa'oto so kaiatetikau, kawongosekau, "Ma rai ngonau tonimake 'o bairoka gee de 'o Yesus, bolo?"

²⁷ Ge'enaka de 'o Petrus womasipongonoli wongose 'ato, "Ko'uwa." De ma 'orasi ge'ena 'o namoro 'isorene.

²⁸ Kayaika 'ibibini de 'o Yesus wisisupu 'o Kayafas 'awi woaka wi'asa ma gubernur 'awi kadatoka. 'O Yahudioka ma sirete koyowosanguwa 'o kadato ma dodaka, la 'uwa yomediri moteke manga 'agama ma 'atorangi, sababu 'ona yomau yomoteke Wakisisupu ma Wange ma ngodomo.

²⁹ Sababu ge'ena 'o Pilatus wosupuka wosano, "'Okia winikalaki 'o nyawa nu'una?"

³⁰ 'Ona yosango, "Nako la 'una ko 'okiawa wasala, ngomi komi'asawa 'o nyawa nu'una ngonaka 'Aba Gubernur."

³¹ 'O Pilatus kawongosekau 'onaka, "Wini'ese la wini'urusu moteke to ngini ma sirete 'ania hukumu!" Ma 'o Yahudioka yosango, "Ngomi 'o Romaka ma Koana ma Amoko komisidabiwa 'o nyawa miahukumu miakiso-songene."

³² (Ne'ena moteke 'okia naga 'o Yesus wosidemokau ma ngale dua wosongene ma do-dagi.)

³³ 'O Pilatus wowosangoli 'awi kadato ma dodaka de 'o Yesus wi'asokino de wosano, "Ngona 'o Yahudioka manga Koana?"

³⁴ 'O Yesus wosango, "'O sa-sano ne'ena ka ngonano ma sirete bolo naga 'o nyawa 'iregu yosidemokau ngonaka ma ngale ngoi?"

³⁵ 'O Pilatus wosango, "Ngoi ne'ena ko 'o Yahudiwa ma nyawa! Gee ni'asa ngoino ge'ena to ngona ma sirete 'ani nyawa de 'o 'imam ma sae-saeke. 'Okia nadiaiokau?"

³⁶ 'O Yesus wongose, "Ngoi 'ai pareta ko 'o dunianowa ne'ena. Nako la 'ai pareta 'o duniano ne'ena, 'ai nyawa-nyawa 'asa yokudoti la ngoi 'uwa 'i'asa 'o Yahudioka manga balu-balusika. Ma ma goungu to ngoi 'ai pareta ko ne'ena 'o dunianowa!"

³⁷ So 'o Pilatus wosano 'unaka, "Nako koge'ena, ngona ma Koana?" 'O Yesus wosango, "Ngona ma sirete nongosekau. Ngoi tosupu 'o duniano de taino 'o duniano ne'ena ma dumutu ma ngale tositotara 'o loa. 'O nyawa gee yodua-duaka 'o loa ge'ena, yosigisene ngoino."

³⁸ 'O Pilatus wosango, "'O loa ge'ena ma ngale 'okia?" Ge'enaka de 'o Pilatus wosupuoli 'awi kadatoka de kawongosekau 'o Yahudi ma nyawaka, "Ka 'o ngai moi ma kotodamakewa 'o nyawa nu'una 'awi sowono.

³⁹ Ma moteke to ngini 'ania 'adati, Wakisisupu ma Wange ma Amoko 'isinoimi ngoi takisisupu 'o bui ma nyawa womatengo. Niomodeke ngoi towisisupu 'o Yahudioka manga Koana nginika?"

⁴⁰ 'Ona yosango yomapoa-poaka, "'Uwa 'una. 'Ena 'o Barabas!" ('O Barabas 'una ge'ena wo'ora-'ora de woto-to'oma.)

Yohanes

Video Yohanes 18

Ikuti Kami:

KONTAK | PARTISIPASI | DONASI