Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sesampun Deside Isa bedo'e maraq nike, Ie kance pengiring-pengiring-Ne lumbar ojok itoqan Kokoq Kidron. Lẽq derike araq sopoq taman, dait Deside Isa kance pengiring-pengiring-Ne tame ojok taman nike.

² Taman nike sampun tetaoq siq Yudas saq behianat lẽq Deside Isa; sẽngaq Deside Isa kance pengiring-pengiring-Ne rimpes bekumpul lẽq derike.

³ Make Yudas lumbar ojok taoq nike. Jauqne sepasukan tentere Romawi kance pengawal-pengawal Gedẽng Allah saq tesuruq siq imam-imam kepale dait dengan-dengan Parisi. Ie pade jauq gegaman, dilah dait obor.

⁴ Deside Isa wikan selapuq saq gen telaksane tipaq diriq-Ne. Jari Ie ngerapetin dengan-dengan nike, dait beketuan, "Sai saq side pade boyaq?"

⁵ "Deside Isa, dengan Nazaret," jawab ie pade. "Tiang niki Ie," jawab Deside Isa. Yudas penghianat nganjeng kance ie pade lẽq derike.

⁶ Sewaktu Deside Isa bemanik lẽq ie pade, "Tiang niki Ie," ie pade selapuq surut mudi dait rebaq ojok tanaq.

⁷ Deside Isa beketuan malik lẽq ie pade, "Sai saq side pade boyaq?" "Deside Isa dengan Nazaret," jawab ie pade.

⁸ "Sampun Tiang badaq side, Tiang niki Ie," manik Deside Isa. "Dait lamun mule Tiang saq side pade boyaq, alurang dengan saq lain nike lumbar."

⁹ (Siq manik-Ne nike, make telaksane napi saq sampun temanikang siq Deside Isa sendẽqmanne: "Bapa, lẽman dengan-dengan saq Bapa icanin tipaq Tiang, nẽnten sopoq dengan juaq saq binase.")

¹⁰ Simon Petrus saq jauq klẽwang, nyerẽt klẽwangne terus ngerantek pelayan Imam Agung jangke pegat kentokne saq kanan. Aran pelayan nike Malkus.

¹¹ Beterus Deside Isa bemanik tipaq Petrus, "Tamaqang malik klẽwangde ojok sarungne! Napi side paran Tiang ndẽq gen nginem cawan penderitean saq teicanin siq Bapa tipaq Tiang?"

¹² Beterus prajurit-prajurit Romawi bareng komendanne dait pengawal-pengawal Yahudi bau dait sẽkoq Deside Isa.

¹³ Penembẽqne ie pade jauq Deside Isa ojok Hanas, mentoaqne Kayapas. Lẽq waktu nike Kayapas jari Imam Agung.

¹⁴ Kayapas nike saq sampun ngebẽng nasẽhat lẽq pare penguase Yahudi bahwe solahan sopoq dengan ninggal umaq selapuq bangse.

¹⁵ Simon Petrus dait sopoq pengiring saq lain ngiring Deside Isa. Pengiring saq lain niki sampun kenal kance Imam Agung. Keranaq nike, ie tame bareng kance Deside Isa ojok lelẽah gedẽng Imam Agung,

¹⁶ laguq Petrus ngantih lẽq luah, lẽq jebak. Beterus pengiring saq lain nike sugul, dait ngeraos kance pelayan nine saq jagaq lawang, beterus jauqne Petrus tame ojok dalem.

¹⁷ Pelayan nine saq jagaq lawang nike bebase lẽq Petrus, "Tekan side ẽndah salaq sopoq pengiring dengan nike?" "Ndẽq," jawab Petrus.

¹⁸ Waktu nike kenyeke telih gati, jari pelayan-pelayan kance pengawal-pengawal penyalaq api kadu areng dait ie pade mindu lẽq derike. Petrus ẽndah lumbar ojok derike dait milu mindu lẽq api bareng ie pade.

¹⁹ Imam Agung metakẽn lẽq Deside Isa mengenai pengiring-pengiring-Ne dait mengenai perajahan-Ne.

²⁰ Jawab Deside Isa, "Tiang tetep nyampẽang secare terus terang lẽq julun dengan luwẽq. Tiang tetep ngajahang lẽq balẽ-balẽ ibadah dait Gedẽng Allah, taoq dengan Yahudi biasene bekumpul. Tiang ndẽq uwah nyatayang napi-napi secare nyeboq-nyeboq.

²¹ Jari, kembẽq pelungguh beketuan lẽq Tiang? Silaq beketuan lẽq dengan-dengan saq sampun dengahang pengajahan Tiang. Pasti ie pade nenaoq napi saq Tiang ajahang."

²² Sewaktu Deside Isa bemanik maraq nike, salaq sopoq pengawal lẽq derike tempẽlẽk Deside Isa dait bebase, "Bani gati Side bebase maraq nike tipaq Imam Agung!"

²³ Jawab Deside Isa, "Lamun Tiang ngucapang hal saq salaq, nyatayang lẽq deriki napi kesalaqanne! Laguq lamun napi saq Tiang ucapang nike kenaq, kembẽq side tempẽlẽk Tiang?"

²⁴ Beterus Hanas suruq dengan jauq Deside Isa saq sampun tesẽkoq nike ojok Imam Agung Kayapas.

²⁵ Simon Petrus masih nganjeng mindu lẽq derike. Dengan-dengan bebase lẽq ie, "Tekan side ẽndah salaq sopoq pengiring-Ne?" Laguq Petrus nilas, "Ndẽq!"

²⁶ Sopoq pelayan Imam Agung, keluarge lẽman dengan saq kentokne terantek siq Petrus, bebase, "Tekan onẽq tiang serioq side lẽq taman bareng kance Ie?"

²⁷ Beterus Petrus nilas malik, "Ndẽq," -- dait tepat lẽq waktu nike manuk ngungkung.

²⁸ Kelẽmaq gati ie pade jauq Deside Isa lẽman gedẽng Kayapas ojok istane gubernur. Dengan-dengan Yahudi ndẽq tame ojok dalem istane, adẽq ie pade ndẽq jari najis menurut aturan agame, sẽngaq ie pade mẽlẽ ngelorang keloran Paskah.

²⁹ Keranaq nike Pilatus sugul dait beketuan lẽq ie pade, "Napi tuduhan side pade tipaq dengan niki?"

³⁰ Jawab ie pade, "Lamun Ie ndẽq salaq, tiang pade ndẽq gen jauq Ie ojok pelungguh."

³¹ Beterus basen Pilatus lẽq ie pade, "Silaq bait dait adilin Ie menurut hukumde mẽsaq!" Laguq jawab dengan-dengan Yahudi nike, "Tiang pade ndẽq kanggo nyematẽq dengan."

³² (Siq care nike, make telaksane napi saq sampun temanikang siq Deside Isa mengenai berembẽ entane Ie gen ninggal.)

³³ Pilatus tame malik ojok dalem istane, dait ngempoh Deside Isa, terus ie metakẽn, "Napi tetu Pelungguh raje dengan Yahudi?"

³⁴ Jawab Deside Isa, "Napi saq pelungguh ketuanang niki mule asalne lẽman pelungguh mẽsaq atao araq dengan lain saq badaq pelungguh mengenai Tiang?"

³⁵ Jawab Pilatus, "Napi tiang niki dengan Yahudi? Saq nyerahang Pelungguh ojok tiang niki bangse Pelungguh mẽsaq dait imam-imam kepale. Setetune napi saq Pelungguh sampun piaq?"

³⁶ Jawab Deside Isa, "Kerajaan Tiang ndẽq lẽman dunie niki. Seandẽne kerajaan Tiang lẽman dunie niki, pengiring-pengiring Tiang gen bejuang adẽq Tiang ndẽq teserahang ojok penguase Yahudi. Laguq mule kerajaan Tiang nike ndẽq lẽman dunie niki!"

³⁷ Beterus Pilatus metakẽn lẽq Deside Isa, "Jari, Pelungguh niki Raje?" Jawab Deside Isa, "Pelungguh bebase bahwe Tiang niki Raje. Tiang tebijeang dait dateng ojok dunie niki siq sopoq maksut, ngebẽng kesaksian mengenai kebenaran. Dengan saq asalne lẽman kebenaran nike ie gen dengahang Tiang."

³⁸ Pilatus metakẽn malik lẽq Deside Isa, "Napi artine kebenaran nike?" Sesampun nike Pilatus sugul malik lẽman istane dait bebase lẽq dengan-dengan Yahudi, "Tiang ndẽq ndait sopoq juaq kesalaqan lẽq Ie.

³⁹ Laguq menurut adat saq biase, tiang harus bẽbasang sopoq tahenan lẽq Hari Raye Paskah. Napi side pade mẽlẽ lamun tiang bẽbasang Raje dengan Yahudi nike tipaq side pade?"

⁴⁰ Ie pade bejawab nyurak-nyurak, "Sampunang Ie, laguq Barabas!" (Barabas nike tukang rampok.)

Yohanes

Video Yohanes 18

Ikuti Kami:

KONTAK | PARTISIPASI | DONASI