Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sasudah Isa Almasih badowa bakcando itu, mako Baliau basarato jo pangikuik-Nyo payi ka subarang sungai Kidron. Disinan ado kabun, Baliau sarato jo pangikuik-Nyo masuak ka kabun tu.

² Si Yudas, si pangkiyanaik tu, inyo tawu tampaik tu; dek karano Isa Almasih lah acok bakumpua disinan jo pangikuik-pangikuik-Nyo.

³ Mako payilah si Yudas ka tampaik tu, inyo mambawok sapasukan tantara Romawi, sarato jo babarapo urang pangawal Rumah Tuhan, nan disuruah dek imam-imam kapalo jo urang-urang Farisi. Inyo bi mambawok-i sinjato, lantera sarato jo suluah.

⁴ Isa Almasih lah tawu apo nan ka tajadi didiri-Nyo. Dek karano itu, Baliau payi mandakek-i urang-urang tu sambia batanyo, "Siya nan angku-angku cari?"

⁵ "Si Isa urang Nazaret," kecek urang-urang tu. "Ambolah urangnyo," kecek Baliau. Si Yudas, si pangkiyanaik tu tagak pulo disinan samo jo urang-urang tu.

⁶ Kutiko Isa Almasih mangatokan, "Ambolah urangnyo," mako kasadonyo urang tu bi takokah ka balakang, bi bagolek di tanah.

⁷ Baliau batanyo sakali lai, "Siya nan angku-angku cari?" "Si Isa urang Nazaret," kecek urang-urang tu.

⁸ "Cako lah Ambo katokan, Ambolah urangnyo," kecek Baliau. "Jikok iyo Ambo nan angku-angku cari, mako padiyakan sajolah urang-urang nan lain ko, nak bi bajalan."

⁹ (Dek Baliau bakato nan bakcando itu, mako basuwoanlah, apo nan dikatokan dek Baliau sabalunnyo: "Oih Bapak, dari urang-urang nan lah Bapak barikan kabake Ambo, indak surang juwo doh nan ka ilang.")

¹⁰ Si Simon Petrus, nan kutiko itu mambawok padang, inyo cabuik padangnyo tu, inyo ceteh talingo pisuruah imam basa nan sabalah suwok, sampai putuih. Namo pisuruah tu si Malkus.

¹¹ Mako bakatolah Isa Almasih kabake si Petrus, "Masuakkanlah baliak padang angkau tu ka saruangnyo! Apokoh angkau manyangko, baraso Ambo ko indak ka maminun cawan sansaro, nan ka dibarikan dek Bapak kabake Ambo?"

¹² Mako payilah pasukan parajurik Romawi jo kumandannyo, sarato jo panjago-panjago nan disuruah dek urang Yahudi, payi manangkok sarato jo mangabek Isa Almasih.

¹³ Mulo-mulo inyo mambawok Isa Almasih payi mangadap kabake Hanas, mintuwo Kayafas. Kayafas adolah imam basa di kutiko tu.

¹⁴ Inyo pulolah nan lah manasiyaik-i panguwaso-panguwaso urang Yahudi, baraso labiah elok surang urang mati untuak sagalo banso.

¹⁵ Si Simon Petrus, samo-samo jo surang pangikuik nan lain, payi manuruikkan Isa Almasih. Pangikuik nan samo jo si Petrus ko, inyo bakatawuan jo imam basa; dek karano itu, inyo sato pulo masuak samo-samo jo Isa Almasih, ka alaman rumah imam basa,

¹⁶ sadangkan si Petrus mananti diluwa, di pintu. Kudian, pangikuik nan samo jo si Petrus cako, payi kaluwa, inyo mangecek jo surang palayan padusi nan manjago pintu, sudah tu inyo mambawok si Petrus masuak ka dalam.

¹⁷ Padusi nan manjago pintu tu, bakato kabake si Petrus, "Oih angku, angku kan iyo tamasuak pulo pangikuik Urang nan ditangkok cako?" "Indak," kecek si Petrus.

¹⁸ Kutiko itu ari sangaik dinginnyo, dek karano itu, mako palayan-palayan jo pangawal-pangawal tu, lah ma iduik-i baro api, inyo bi basangai. Si Petrus payi pulo kasinan sato pulo basangai samo jo urang-urang tu.

¹⁹ Imam basa batanyo kabake Isa Almasih, mananyokan tantang pangikuik-Nyo sarato jo tantang pangajaran-Nyo.

²⁰ Baliau manjawab, "Lah satiyok ari Ambo mangecek sacaro taruih tarang, di adok-an urang nan banyak. Ambo tatap pulo ma aja di rumah-rumah ibadaik, sarato jo di Rumah Allah, di tampaik nan biasonyo urang Yahudi bi bakumpua. Alun ado lai Ambo mangatokan sasuatu nan ba andok-andokkan.

²¹ Jadi, baa mangko angku batanyo kabake Ambo? Tanyokanlah kabake urang-urang nan lah mandangakan pangajaran Ambo. Lah jaleh inyo tawu jo sagalo sasuatu nan Ambo ajakan."

²² Kutiko Baliau mangecek bakcando itu, salah surang dari pangawal nan ado disinan, manampa Baliau sambia bakato, "Barani bana Wa-ang mangecek sarupo itu kabake imam basa!"

²³ Isa Almasih manjawab, "Jikok nan Ambo katokan tu salah, katokanlah kiniko, apo salahnyo! Tapi jikok nan Ambo katokan tu batua, baa mangko Ambo ditampa?"

²⁴ Kudian Hanas manyuruah urang, untuak mambawok Baliau bapilanggu kabake Imam Basa Kayafas.

²⁵ Si Simon Petrus sadang tagak juwo lai basangai. Mako bi batanyolah urang-urang nan disinan kabake inyo, "Angku kan iyo pulo pangikuik Urang nan ditangkok tu, iyo ndak?" Tapi si Petrus indak mangaku, "Indak!" keceknyo.

²⁶ Ado surang pisuruah imam basa, nan badunsanak jo urang nan talingonyo diceteh dek si Petrus, inyo bakato, "Ambo lah manampak angkau di kabun samo-samo jo si Isa, iyo ndak?"

²⁷ Mako baduto pulolah si Petrus sakali lai, "Indak," keceknyo -- tapek di kutiko itu ayam bakukuak.

²⁸ Subuah-subuah buto, urang-urang tu lah mambawok Isa Almasih, dari rumah Kayafas ka istana gubenur. Nama nan urang Yahudi, indak bi namuah doh masuak ka istana, supayo inyo jan banajih manuruik agamo, dek karano inyo nak sato makan makanan Paskah.

²⁹ Dek karano itu, mako kaluwalah Pilatus untuak manamui urang-urang tu, sambia batanyo, "Apo nan angku-angku tuduahkan taradok Urang nan ditangkok ko?"

³⁰ Urang-urang tu bi manjawab, "Santano Inyo indak basalah, mako kami indak ka mambawok Inyo doh kabake Bapak Gubenur."

³¹ Mako bakatolah Pilatus, "Bawoklah Inyo, ukunlah Inyo manuruik paratuaran angku-angku!" Tapi urang-urang Yahudi tu bi manjawab, "Kami indak buliah doh ma ukun urang jo ukunan mati."

³² (Tajadi nan bakcando itu, mako basuwoanlah apo nan lah dikatokan dek Isa Almasih, tantang baa caro-caronyo Baliau ka mati.)

³³ Pilatus babaliak masuak ka istana, untuak ma imbau Isa Almasih, mako batanyolah Pilatus kabake Baliau, "Apokoh iyo Angkau ko rajo urang Yahudi?"

³⁴ Baliau manjawab, "Apokoh nan angku tanyokan ko, barasa dari angku sandiri, atau lah adokoh urang lain, nan lah ma agiah tawu kabake angku tantang diri Ambo?"

³⁵ Pilatus bakato, "Apokoh ambo ko urang Yahudi? Nan manyarahkan Angkau kabake ambo, adolah banso Angkau sandiri jo imam-imam kapalo. Apo nan lah Angkau pabuwek?"

³⁶ Isa Almasih bakato, "Karajaan Ambo indak karajaan dunia ko doh. Kok sakironyo karajaan Ambo, dari dunia ko, tantu pangikuik Ambo ka mampatahankan, supayo Ambo jan sampai disarahkan kabake panguwaso-panguwaso urang Yahudi. Jadi, karajaan Ambo nan sabananyo, indak dari dunia ko doh!"

³⁷ Mako batanyolah Pilatus kabake Baliau, "Jikok baitu, Angkau ko rajo?" Baliau manjawab, "Angku mangatokan, Ambo ko rajo. Ambo layie, turun ka dunie ko, ado ciyek nan dimukasuik, iyolah untuak ma agiah tawu tantang kabanaran. Urang nan lai barasa dari kabanaran, inyo musti namuah ma iyokan kecek Ambo."

³⁸ Batanyolah Pilatus sakali lai, "Apo tu aratinyo kabanaran?" Sudah tu Pilatus kaluwa baliak dari istana, sambia bakato kabake urang-urang Yahudi, "Indak ciyek juwo doh nan tasuwo di ambo kasalahan didiri Urang ko.

³⁹ Tapi manuruik kabiasoan di angku-angku, ambo tatap ado malapehkan surang urang tahanan, di satiyok Ari Rayo Paskah. Layi namuah koh angku-angku, jikok ambo lapehkan Rajo urang Yahudi ko?"

⁴⁰ Urang-urang tu bi manjawab sambia ma ariak-ariak, "Indak, jan lai Inyo nan dilapehkan, tapi si Barabaslah nan ka dilapehkan!" (Padohal si Barabas adolah parampok.)

Yohanes

Video Yohanes 18

Ikuti Kami:

KONTAK | PARTISIPASI | DONASI