Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Tou ti Isa yilapatao lodua, Tiyo wolo mongomuri-Liyo lonao ode ngotuwali lo dutula lo Kidron. Tetomota woluwo taman tuwawu. Lapatao ti Isa pe'epe'enta wolo mongomuri-Liyo lomaso mao ode taman boyito.

² Te Yudas ta lohiyanati oli Isa, motota olo lo tambati boyito, sababu tambati boyito layito hepodudunggaya li Isa wolo mongomuri-Liyo.

³ Te Yudas lodelo mao ta hepodahawa bele lo Eya ta ilahula lo mongotauwa lo imamu wawu tawu-tawuwala ta o pahamu Parisi pe'epe'enta wolo mongopajule lo Roma. Timongoliyo lonao mao odito hedelowa tohe, momayango wawu sonjata.

⁴ Sababu ma otawa li Isa nga'amila u ma medungga to o-Liyo, Tiyo lodudula mota ode olimongoliyo wawu lohintu odiye, ”Tatonu ta helolohu limongoli?”

⁵ Timongoliyo lolametao ode o-Liyo odiye, ”Ti Isa tawu lo kota lo Najaret.” Ti Isa loloiya ode olimongoliyo odiye, ”Wau yito ta woluwo mololayito.” Te Yudas ta lohiyanati o-Liyo woluwo wolimongoliyo.

⁶ Tou ti Isa loloiya ode olimongoliyo deu Tiyo yito ta woluwo mololayito, timongoliyo ma lotowuli wawu lelebalato.

⁷ Ti Isa lohintu poli ode olimongoliyo odiye, ”Tatonu ta helolohu limongoli?” Tametao limongoliyo, ”Ti Isa tawu lo kota lo Najaret.”

⁸ Ti Isa loloiya ode olimongoliyo odiye, ”Ma pilolele-U mayi ode olimongoli deu Wau boti ta helolohu limongoli. Wonu odito, hulimao timongoliyo boti monao.”

⁹ Wolo uodito, ma leganapu u ma yiloiya li Isa odiye, ”To wolota limongoliyo ta yiludu lo Allahuta'ala ti Papa ode o-Latiya, diyalu ngota mao ta mowali binasa.”

¹⁰ Lapatao te Simon Petrus ta anu-anunga sabele, lomahutayi sabeleliyo wawu lomontode mota wato li imamu da'a, tunggulo bulonga ambahu olowala lo wato boyito loputu. Tanggulo wato boyito te Malkus.

¹¹ Ti Isa loloiya ode le Petrus odiye, ”Taupa mota sabelemu boyito! Dila ponga lo akali Wau dila mongilu to halati lo sikisa u ma yilohi mayi lo Allahuta'ala ti Papa ode ola-U.”

¹² Mongopajule lo Roma wawu tauwaliyo wawu ta hepoddahawa bele lo Eya ta ilahula lo tawu lo Yahudi, ma loheupa oli Isa lapatao lomungu o-Liyo.

¹³ Bohuliyo timongoliyo lopotaluwo mao li Isa ode ole Hanas. Te Hanas yito moluhengiyo le Kayapas. Te Kayapas imamu da'a to tawunu boyito

¹⁴ ma helonasehati to mongotauwa lo tawu lo Yahudi deu lebe mopiyohu wonu tawu ngota mate ode bangusa lo Yahudi boti.

¹⁵ Te Simon Petrus wawu ngotaliyo lo muri li Isa lolunuhe mota oli Isa. Muri ngota boyito mo'otawa woli imamu da'a. Uwitolo sababuliyo tiyo lomaso mao pe'epe'enta woli Isa ode pango bele li imamu da'a.

¹⁶ Te Petrus lotitola to bulemengiyo to talu lo bubunggalo. Lapatao muri ngota ta mo'otawa wolo imamu da'a boyito, muli yilumuwalao wawu lobisala wolo tabuwa daha-daha pintu lo bubunggalo. Lapatao te Petrus dileloliyo mao lomaso ode delomiyo.

¹⁷ Wato tabuwa ta daha-daha bubunggalo boyito lobisala ode le Petrus odiye, ”Yio olo ngotaliyo lo muri lo Tawu boyito.” Te Petrus lolametao odiye, ”Dila.”

¹⁸ To wakutu boyito memangi mohuhulo. Mongowato wawu ta hedahawa ma lopodeito tulu potidengenga limongoliyo. Te Petrus tilimihula wawu lotidengenga wolimongoliyo pe'epe'enta.

¹⁹ Te Hanas ta bakasi lo imamu da'a boyito ma lomulayi hemohintu ode oli Isa tomimbihu muri-Liyo wawu pongajari-Liyo.

²⁰ Ti Isa loloiya ode oliyo odiye, ”Watiya helobisala wolo udila tohuliya to talu lo tawu ngohuntuwa. Watiya layito hemongajari to bele hepotabiyalo wawu to pango bele lo Eya, tambati lo tawu lo Yahudi hepotiambuwa. Watiya dipo pe'enta helobisala lo uhetuwa-tuwawuwa to tambati tutuo.

²¹ Yilongola ito bo hemohintu o-Latiya? Yintuwa mao olimongoliyo ta ma helodungohe pongajari Latiya. Tantu timongoliyo motota lo u hepilongajari Latiya.”

²² Tou ti Isa yilapata lobisala odito, ngotaliyo lo ta daha-daha teto lolambali o-Liyo wawu lobisala odiye, ”Buheli da'a Yio mobisala odito ode li imamu da'a!”

²³ Tameti Isa odiye, ”Wonu u heloiya Latiya tilala, poleleyanto mayi u tilala o-Latiya boyito. Bo wonu banari, yilongola ito lolambali o-Latiya?”

²⁴ Lapatao te Hanas lolawo oli Isa wolo olu'u pungu-pungu ode ole Kayapas imamu da'a.

²⁵ Tou te Simon Petrus donggo tihu-tihula hemotidengengo, woluwo ta loloiya ode oliyo odiye, ”Tantu yio boti muri-Liyo olo.” Tiyo lomahu wawu loloiya odiye, ”Dila.”

²⁶ Lapatao ngotaliyo lo wato li imamu da'a, warisi lo ta bulongaliyo pilontode Petrus, loloiya odiye, ”Entiye wau lo'onto olemu pe'epe'enta wo-Liyo to taman boyito?”

²⁷ Te Petrus lomahe poli wawu tou boyitolo maluo ma lo kukuyu'u.

²⁸ Lonto bele le Kayapas ti Isa dilelo limongoliyo ode istana li gubornur lo Roma. To wakutu boyito donggo dumodupa da'a. Bo tawu-tawuwala lo Yahudi lohihilawo dila lomaso ode delomiyo, alihu timongoliyo dila mowali najisi, sababu timongoliyo donggo moela obebasi lo tawu lo Yahudi lonto lipu lo Mesir.

²⁹ Uwitolo sababuliyo ti gubornur Pilatus lokaluwari mao wawu lobisala wolimongoliyo to diluwari odiye, ”Wolo u heda'awa limongoli to Tawu boti?”

³⁰ Tametao limongoliyo odiye, ”Wonu Tiyo boti dila lohutu u moleto, tantu amiyatiya dila lohudu mayi o-Liyo ode oli tuwani.”

³¹ Ti gubornur Pilatus lobisala ode olimongoliyo odiye, ”Delowalo Tiyo wawu mota butoa moturuti hukum limongoli!” Tawu-tawuwala lo Yahudi boyito lolametao oli gubornur odiye, ”Amiyatiya entelaliyo mohukumani to tawu sambe mate.”

³² Pasali boti lowali alihu meganapu loiya li Isa u piloposambewo-Liyo lopopatatayi wololo opopate-Liyo.

³³ Ti gubornur Pilatus luli lomaso mao ode delomo istanaliyo. Lapatao tiyo loipomaso mayi oli Isa wawu lohintu odiye, ”Yio boti olongiya lo tawu lo Yahudi?”

³⁴ Ti Isa lolametao odiye, ”Loiya boti memangi lonto batanga li gubornur lohihilawo meyalo woluwo tawu wuwewo ta losirita lo pasali boti ode oli gubornur?”

³⁵ Ti gubornur Pilatus lolametao odiye, ”Wau boti dila tawu lo Yahudi. Bangusa-Mu lohihilawo wawu mongotauwa lo imamu ta lohudu mayi ole-Mu ode olau. Wolo u ma pilohutu-Mu?”

³⁶ Ti Isa lolametao odiye, ”Yiladiya-U dila lonto duniya boti. Wonu Yiladiya-U lonto duniya boti, tahe kawaliya ola-U ma molawani, alihu Wau dila modehu ode olu'u lo tawu lo Yahudi boti. Bo Yiladiya-U dila lonto duniya boti!”

³⁷ Ti gubornur Pilatus loloiya ode o-Liyo odiye, ”Wonu odito, Yio boti olongiya.” Ti Isa lolametao odiye, ”Ti gubornur lohihilawo ta loloiya deu Watiya botiya olongiya. Makusudu lo u Watiya pilotutuliyo mayi wawu lonao mayi ode duniya boti, deuwitoyito me motombanga obobanari. Titalotita ta motohilawo lo obobanari, tiyo modungohe suwara Latiya.”

³⁸ Tou yilapatao loloiya odito, ti gubornur yilumuwalao poli mao lodudunggaya wolo tawu-tawuwala lo Yahudi wawu lobisala ode olimongoliyo odiye, ”Diyalu mao totala u yilotapu'u to Tawu boti.

³⁹ Bo biyasaliyo to dulahu buka poelaliyo obebasi lo tawu lo Yahudi lonto lipu lo Mesir, wau mopobebasi mao tawu ngota ode olimongoli. To dulahu buka boti otohila limongoli meyalo dila wau mopobebasi mao olongiya lo tawu lo Yahudi boti?”

⁴⁰ Lapatao timongoliyo hewuwatia hepotuntutiya, alihu te Barabas ta mollambata bebasiya li gubornur, uwalimongoliyo mao, ”Bebasi mayi olami te Barabas, dila Tawu boti!”

Yohanes

Video Yohanes 18

Ikuti Kami:

KONTAK | PARTISIPASI | DONASI