Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Me no aefa mangandrõ Yesu khõ Lowalangi, mofanõ Ia awõ ndra nifahaõ-Nia, la'õtõ mbombo Kidorona. Ba so kabu ba da'õ. Numalõ Yesu awõ ndra nifahaõ-Nia ba kabu andrõ.

² I'ila Yuda si manga mbõli nahia andrõ, bõrõ me asese so Yesu ba da'õ awõ nifahaõ-Nia.

³ Numalõ gõi Yuda ba da'õ. I'ohe zaradadu awõ zanaro ba Nomo Zo'aya nifatenge ndra ere sebua awõ ndra Farizai'o. La'ohe wandru ba sulu awõ wangõna.

⁴ I'ila Yesu hadia zedõna alua khõ-Nia. I'ondrasi ndra niha andrõ ba Imane khõra, "Haniha ni'aluimi?"

⁵ Lamane, "Yesu andrõ, banua Nazareta." Imane khõra Yesu, "Ya'odo da'õ." No muzizio gõi Yuda si manga mbõli andrõ awõra ba da'õ.

⁶ Me Imane Yesu, "Ya'odo da'õ," awuwu ira furi ba oi alau tou ba danõ.

⁷ Ifuli zui Isofu khõra Yesu Imane, "Haniha ni'aluimi?" Lamane wanema li, "Yesu andrõ, banua Nazareta."

⁸ Imane Yesu, "No nasa Uw̃a'õ Ya'odo da'õ. Ba na sindruhu Ya'o ni'aluimi, akha mofanõ zato andre."

⁹ (Ba zi manõ, alua zi no tohõna muw̃a'õ, imane: "He Ama, samõsa lõ si taya niha nibe'eu ba danga-Gu.")

¹⁰ So sara wõda khõ Zimoni Fetero me luo da'õ. Isõbi wõda andrõ ba ihare'õ khõ zawuyu gere sebua irege aetu dalinga kambõlõ. Malikho dõi zawuyu andrõ.

¹¹ Imane khõ Wetero Yesu, "Fuli saembugõ wõda andrõ! Hadia, ba dõdõu lõ omasi-Do Utaõgõ wamakao andrõ nibe'e Nama khõ-Gu?"

¹² Lara'u Yesu ira saradadu awõ gomandra ba ira sanaro andrõ niha Yahudi.

¹³ Si fõfõna la'ohe Yesu khõ Hanasi, ama matua Gayafa. Ere sebua Gayafa ba ginõtõ andrõ.

¹⁴ Ya'ia zo'amenesi niha Yahudi wa abõlõ sõkhi ha samõsa zi mate salahi zato moroi na tekiko zi sambua soi.

¹⁵ La'o'õ Yesu ira Simoni awõ nifahaõ bõ'õ si samõsa. Ba i'ila ere sebua nifahaõ si samõsa andrõ; andrõ lõ fao ia we'amõi ba golayama nomo gere sebua,

¹⁶ ibaloi Fetero baero ba mbawa ndruhõ. Numalõ baero nifahaõ ni'ila gere sebua, fahuhuo ia ba ndra alawe sanaro bawa ndruhõ, ba aefa da'õ i'ohe Wetero si bakha.

¹⁷ Muhede ndra alawe sanaro bawa ndruhõ andrõ khõ Wetero imane, "He, hadia tenga ya'ugõ samõsa ba gotalua nifahaõ-Nia gõi?" Imane Fetero, "Tenga."

¹⁸ No lahaogõ galitõ ira sawuyu awõ ndra sanaro, ba lalau moleu ba zi fasui alitõ andrõ, bõrõ me okafu hao danõ me inõtõ da'õ. So Wetero ba da'õ woleu ba gotaluara.

¹⁹ Ibe'e wanofu ere sebua khõ Yesu sanandrõsa ba nifahaõ-Nia awõ wamahaõ-Nia.

²⁰ Itema li Yesu Imane, "Lõ aetu fahuhuo Ndra'o fõna niha sato. Mamahaõ Ndra'o ba nomo wangandrõ awõ ba nahia gowuloa niha Yahudi. Lõ irai Ubini'õ wanguma'õ hadia ia.

²¹ Hana wa õsofu khõ-Gu? Sofu khõra si no mamondrongo famahaõ-Gu. Sofu khõra hadia zi no Uw̃a'õ khõra lõ tola lõ'õ la'ila."

²² Me Imanõ wehede Yesu, samõsa zanaro ba da'õ zamalisi Ya'ia, sanguma'õ, "Ha lõ barani Ndra'ugõ wehede si manõ khõ gere sebua!"

²³ Itema li Yesu, "Na no Uw̃a'õ hadia ia zi fatimba, ombakha'õ hadia zi fatimba andrõ! Ba hiza sindruhu niw̃a'õ-Gu andrõ, ba hana wa õfalisi Ndra'o?"

²⁴ Aefa da'õ ifatenge niha Hanasi wolohe Yesu khõ Gere Sebua Kayafa, no la bõbõ danga-Nia.

²⁵ No muzizio ba da'õ nasa Wetero woleu ya'ia. Lasofu khõnia niha lamane, "Hadia, tenga ya'ugõ gõi samõsa ba gotalua nifahaõ niha andrõ?" Itimbagõ Fetero. Imane, "Tenga!"

²⁶ Samõsa ba gotalua zawuyu gere sebua andrõ, si fahatõ khõ zawuyu andrõ ni'ew̃a Wetero talinga, imane, "Hadia, tenga ya'ugõ ni'ilagu zi fao khõ-Nia ba kabu andrõ?"

²⁷ Imane zui Fetero, "Tenga," -- ba faudu sibai ba ginõtõ da'õ miwo manu.

²⁸ Meno aefa da'õ la'ohe Yesu ba nomo gubernur. Ahulõ sibai wongi me inõtõ da'õ. Lõ mõi bakha ba nomo gubernur ndra niha Yahudi. Ena'õ lõ ta'unõ ira molo'õ agama, bõrõ me fao ira wemanga Gõ Fasa.

²⁹ Bõrõ da'õ mõi baero Wilato wanofu khõra imane, "Hadia wangadumi ba niha da'e?"

³⁰ Lamane, "Lõ ma'ohe Ia khõ Gubernur na lõ olalõw̃a-Nia."

³¹ Imane Filato khõra, "Mihalõ Ia, mifareso ba mi'etu'õ huku khõ-Nia molo'õ huku agama ba khõmi!" Ba hiza lamane niha Yahudi, "No tetenaw̃a ndra'aga wame'e huku famunu ba niha."

³² (Alua zi mane faudu ba zi no Iw̃a'õ Yesu, sanandrõsa ba wa'amate-Nia.)

³³ Ifuli mõi bakha ba nomo Wilato ba ikaoni Yesu. Aefa da'õ isofu khõ Yesu imane, "Hadia Ya'ugõ andre Razo niha Yahudi?"

³⁴ Imane wanema li Yesu, "Hadia fanofumõ samõsa da'e Tuha, ma so niha bõ'õ zi no mangombakha khõu sanandrõsa khõ-Gu?"

³⁵ Itema li Filato imane, "Hadia niha Yahudi ndra'odo? Soi-Mõ samõsa awõ ndra ere sebua zame'e Ya'ugõ ba danga-Gu. Hadia zi no Õlau?"

³⁶ Imane Yesu, "Tenga famatõrõ ba gulidanõ andre wamatõrõ-Gu. Na famatõrõ gulidanõ wamatõrõ-Gu, ba molaw̃a niha si fao khõ-Gu ena'õ fabõi tebe'e Ndra'o ba danga niha Yahudi. Ba hiza sindruhu tenga soroi gulidanõ wamatõrõw̃a-Gu!"

³⁷ Isofu khõnia Filato imane, "Na si manõ hadia sindruhu razo Ndra'ugõ?" Itema li Yesu imane, "Ya'ugõ zanguma'õ wa razo Ndra'odo. Ha sambalõ gohitõ dõdõ wa tumbu ba mõi Ndra'o ba gulidanõ andre, ya'ia, ba wamaduhu'õ sindruhu andrõ. Niha soroi zindruhu andrõ, zamondrondrongo khõ-Gu."

³⁸ Isofu khõnia Filato imane, "Hadia zindruhu andrõ?" Ba mõi baero zui Wilato, imane ba niha Yahudi, "Lõ nisõndragu olalõw̃a-Nia.

³⁹ Ba hiza molo'õ si to'õlõ u'efa'õ samõsa niha nikuru ba Ngaluo Gowasa Fasa. Hadia, omasi ami u'efa'õ razo niha Yahudi andrõ khõmi?"

⁴⁰ Latema linia mu'ao ira lamane, "Bõi! Bõi efa'õ Ia! Efa'õ Mbaraba!" (Baraba no samõsa sorabu.)

Yohanes

Video Yohanes 18

Ikuti Kami:

KONTAK | PARTISIPASI | DONASI