Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Naopu Yesus nosambaya nalaimo I'a ante anaguru-anaguruna mpaka ri sambote salu ue to nosanga ka Ue Kidron. Ri setu naria saongu pampa. Yesus ante anaguruna nalau nesua riara pampa etu.

² Yudas, to nompobalu Yesus etu, nangginjani pampa etu sabana Yesus bo anaguruna naoso nasiromu ri setu.

³ Jadi naratamo i'a ri setu nanggeni salunu tantara Roma bo topojaga Sapo Mpepue to nipakau balengga-balengga topanggeni agama bo tau-tau to Parisi. Ira narata nanggeni poindo, sulo bo parewa mposipatesi.

⁴ Ninjani Yesus puramo nuapa to majadi ri korona. Jadi nalaumo I'a nompakamosu tau dea etu pade nekutana ka ira, "Isema to nielo komi?"

⁵ Nesonomo ira, "Yesus to Nazaret." Nesonomo Yesus, "Aku e'imo I'a." Yudas topobalu Yesus etu wo'u nenggore ri tatongo ntau dea etu.

⁶ Tempo Yesus nanguli ka ira, "Aku e'imo I'a," nokanggaura ntalikumo tau dea etu pade nadungga sangganimo ira.

⁷ Pade Yesus nompekutana ira sangganipa, "Isema to nielo komi?" Nesonomo ira, "Yesus to Nazaret."

⁸ Pade nangulimo Yesus, "Niulikumo ka komi pani'a, Aku e'imo I'a. Jadi ane Akumo to nielo komi, palambamo roaku e'i malai."

⁹ Ante pantesana etu nadupamo tesa to niuli Yesus pani'a, "Uma, nggari pura-pura topantuki to niwaimu ka Aku da'a ria samba'a to natontona."

¹⁰ Nanggita kajadia etu i Simon Petrus nombabitu gumana pade nitimbena samba'a batua nu Balengga Topanggeni Agama to nosanga ka i Malkhus sampe napudumo talinga ngganana.

¹¹ Tapi nangulimo Yesus ka i Simon Petrus, "Boli mpanjilimo gumamu riara walombona! Iwenumo? Niulimu kupoara kasusa e'i to niwai Umaku ka Aku?"

¹² Naopu etu tantara-tantara Roma ante tadulakona bo topojaga Sapo Mpepue nombasoko Yesus pade nombaso'o I'a.

¹³ Pade Yesus pamulana nikeni ira mpaka ri ja'i Hanas, matu'a langgai i Kayafas. Kayafas etumo to najadi Balengga Topanggeni Agama mpae etu.

¹⁴ I'amo to nanguli ka topanggeniaka nto Yahudi bopia, "Nabelopa samba'a tau mamate manjambei todea."

¹⁵ Simon Petrus bo samba'a anaguru Yesus ntanina nantuki Yesus. Anaguru Yesus to samba'ana etu nosinjani ante Balengga Topanggeni Agama. Jadi i'a namala nesua mpasanggani-nggani ante Yesus ri lalowo sapo nu Balengga Topanggeni Agama etu.

¹⁶ Tapi i Petrus nopea ri sawalikuna namosu pewobo wala. Jadi anaguru Yesus ntanina to niposinjani Balengga Topanggeni Agama etu nesuwu mpaka ri sawalikuna. Pade notesamo i'a ka besi to nanggatono pewobo ala i Petrus rapaloga mesua riara wala etu. Pade nikenina i Petrus nesua riarana.

¹⁷ Nanggita i Petrus nangulimo besi topanggatono pewobo etu ka i'a, "Iwenu? Da'a komi wo'u samba'a anaguru tau ya'a?" Nesonomo i Petrus, "Da'a!"

¹⁸ Nggawengina etu naleni mpu'u. Jadi bara sakuya mba'a batua bo topojaga Sapo Mpepue nompakawaa apu nggari wuri niponeru ira ri lalowo etu. Pade i Petrus wo'u nenggore mpasanggani-nggani ante ira noneru ri apu etu.

¹⁹ Tempo etu nompamulamo Balengga Topanggeni Agama nompekutana Yesus, "Isema pura anagurumu, pade nuapa pura nipatudukimu ka ira?"

²⁰ Nesonomo Yesus, "Aku nabiasa nompatuduki ante nanoto ri ngayo ntau dea. Aku batena nompatuduki riara sapo mpodade bo riara Sapo Mpepue, peto'o tau to Yahudi nasiromu. Da'a ria sanggani Aku notesa nggalino.

²¹ Jadi nuapa sabana komi nompekutana Aku? Agina komi mompekutana tau dea to nangepe Aku nuapa to nitesaku ka ira. Iramo to nangginjani nuapa to nitesaku etu."

²² Tempo Yesus notesa iwetu naria samba'a topojaga Sapo Mpepue to nekanggore namosu ante Yesus nombasapa lenje Yesus, pade niulina, "Da'a nabelo Iko nombasono balengga topanggeni agama iwetu!"

²³ Nesonomo Yesus, "Ane nasala tesaku, tesa mpakanotomo nuapa to nasalana. Tapi ane nakono tesaku etu, nuapa sabana komi nombasapa Aku?"

²⁴ Naopu etu Hanas nompakau tau manggeni Yesus ante palena niso'o malau mpaka ri ja'i Kayafas to najadi Balengga Topanggeni Agama mpae etu.

²⁵ Tempo etu i Simon Petrus danoneru mpekanggore ri setu. Pade naria wo'umo tau nanguli ka i'a, "Iwenu? Da'a iko wo'u samba'a anaguru ntau ya'a?" Tapi nesapumo i Petrus, "Da'a!"

²⁶ Naria wo'umo samba'a batua Balengga Topanggeni Agama ri setu to nawela raposampesuwu tau to nitimbe i Petrus talingana sampe napudu pangane. Nangulimo tau etu ka i Petrus, "Da'a iko to nikitaku ri pampa nosanggani-nggani ante Yesus pangane?"

²⁷ Tapi nesapu wo'umo i Petrus, "Da'a!" Iwetu i Petrus notesa kaliu-liu nora'omo manu.

²⁸ Dabobayana mpu'u Yesus nikeni iramo nggari sapo i Kayafas nalau mpaka ri sapo Gubernur. Topanggeniaka-topanggeniaka nto Yahudi da'a nesua riara sapo Gubernur etu, sabana ira da'a madota majadi matantoru nantuki Atura-atura agama ira. Nipowia ira iwetu ala ira mamala manggoni panggoni posusa Paska ngina.

²⁹ Sabana etu i Pilatus nesuwu mpaka ri sawalikuna nosirata ka ira, pade nipekutanana ka ira, "Nuapa sala ntau e'i nipangadu komi?"

³⁰ Nesonomo ira, "Ane I'a da'a tau naja'a natantu kami da'a madota manggeni I'a ri ja'i komi, Uma."

³¹ Nanguli i Pilatus ka ira, "Ala komimo I'a, pade ratangara komi mbotomo salana nantuki Atura-atura agama komi!" Tapi nesonomo tau-tau to Yahudi etu, "Kami da'a nipaloga mombasuku tau sampe mamate."

³² Etu najadi ala madupa tesa to niuli Yesus bopia nombaboto jala nggamatena.

³³ Nangepe etu nesua wo'umo i Pilatus mpaka riara sapona pade nipakauna tau manggeni Yesus ri ja'ina. Pade nipekutanana ka Yesus, "Komimo Magau nto Yahudi?"

³⁴ Nesonomo Yesus, "Pekutana etu nggari ja'i komi mboto, atau naria tau nanguli ka komi ewa Aku?"

³⁵ Nanguli i Pilatus, "Aku e'i da'a tau to Yahudi! Tau-tau to Yahudi bo balengga-balengga topanggeni agama mbotomo to nanggeni Komi ri ja'iku. Sala nuapa ntoto nikawiamu?"

³⁶ Nesonomo Yesus, "Poparentaku da'a nggari dunia e'i. Ane rapana Aku magau nggari dunia e'i natantumo topantuki-topantuki Aku kana meewa ala Aku ne'e rasoko bo rakeni ri ja'i topanggeniaka-topanggeniaka nto Yahudi. Tapi poparentaku da'a nggari dunia e'i."

³⁷ Pade nekutana wo'umo i Pilatus ka I'a, "Ane iwetu tanu, magau mpu'u Komi?" Nesonomo Yesus, "Ewa niuli komi etu nakono, Aku e'i samba'a magau. Aku nipoanaka pade nomai riara dunia ante patuju mompatolele pepatuduki to nakonona. Isema-sema to natundu riara pepatuduki to nakonona, ira etumo to nompetalinga Aku."

³⁸ Nekutanamo i Pilatus, "Nuapa ntoto pepatuduki to nakonona?" Naopu etu nesuwu wo'umo i Pilatus nggariara njapona mpaka ri sawalikuna, pade niulina ka tau-tau to Yahudi, "Da'a ntoto naria sangaya sala ntau etu nirataku.

³⁹ Tapi nantuki kabiasa komi, ane Eo Bete Paska aku kana manggabasaka ka komi samba'a tau nitarunggu. Madota komi kukabasaka ka komi Magau nto Yahudi etu?"

⁴⁰ Tapi nongaremo ira ante suara namangga, "Ne'e! Ne'e I'a rakabasaka! Agina i Barabas rakabasaka ka kami!" Barabas etu samba'a parampo.

Yohanes

Video Yohanes 18

Ikuti Kami:

KONTAK | PARTISIPASI | DONASI